ސްޕެނިޝް ލީގުގައި އާދީއްތަ ދުވަހުގެރޭ ލެވާންޓޭ އަތުން އަމިއްލަ ދަނޑުގައި ބާސެލޯނާ މޮޅުވެއްޖެއެވެ.
މި މެޗުން ބާސާ މޮޅުވީ 1-0 ގެ ނަތީޖާއަކުންނެވެ.
ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގެ ކުރީކޮޅު ލެވާންޓޭގެ ފްރޫތޯސްއަށް ވަނީ ލީޑު ނަގަން ރަނގަޅު ފުރުސަތެއް ލިބިފައެވެ. އެކަމަކު އޭރިއާ ތެރެއިން ހުހަށް ހުރެ އޭނާ ފޮނުވާލި ހަމަލާ ބާސާގެ ގޯލްކީޕަރު މާކް-އަންދްރޭ ޓާ ސްޓެގެން ވަނީ ދިފާއުކޮށްފައެވެ. އަދި އޭގެ ފަހުން ފުރަތަމަ ހާފުގައި ބާސާގެ ފޯވާޑް މާޓިން ބްރެތުވެއިޓާއި އެންޓޮއިން ގްރީޒްމަން ފޮނުވާލި ހަމަލާތައް ލެވާންޓޭގެ ގޯލްކީޕަރު އައިތޯރް ވަނީ ހުށިޔާރުކަމާއެކު ދިފާއުކޮށްފައެވެ.
މި މެޗުގައި ފެނިގެންދިޔަ ހަމައެކަނި ލަނޑު ބާސާއިން ކާމިޔާބުކުރީ 76 ވަނަ މިނެޓުގައެވެ. ފްރެންކީ ޑި ޔޮން ދިން ޕާހަކުން މި ލަނޑު ބާސާއަށް ޖަހައިދިނީ ކެޕްޓަން ލިއޮނެލް މެސީއެވެ. މިއީ ބާސާގެ 10 ނަންބަރު ޖާޒީގައި މެސީ ޖެހި 600 ވަނަ ލަނޑެވެ.
މި މޮޅާއެކު ބާސާ އޮތީ ލީގު ތާވަލުގެ އަށްވަނައިގައި 11 މެޗުން 17 ޕޮއިންޓާއެކުއެވެ. އަދި ބާސާ އަތުން ބަލިވި ލެވާންޓޭ އޮތީ ތާވަލުގެ ފުލުން ތިންވަނައިގައި 12 މެޗުން 11 ޕޮއިންޓާއެކުއެވެ.
