ހުއިފިލަނޑާގެ ވިޔަފާރި ކުރިއަރުވާ ފަރާތްތަކަށް މަގުދައިކޭދޭ ޕްލޭން އެކުލަވާލައިފި
މި ޕްލޭން ވާނީ ދިވެހިރާއްޖޭގެ ހުއިފިލަނޑާގެ މަސްވެރިކަން ބެލެހެއްޓުމުގައި މަގުދައްކައިދޭ މައިގަނޑު އަސާސަށް
ހުއިފިލަނޑާގެ ބާވަތެއް
ހުއިފިލަނޑާގެ މަސްވެރިކަމާއި ވިޔަފާރި ދެމެހެއްޓެނިވި ގޮތެއްގައި ކުރިއެރުވުމުގައި ޝާމިލްވާ ދައުލަތުގެ އިދާރާތަކާއި އެންމެހައި މަޞްލަޙަތުވެރިންނަށް މަގުދައްކައިދޭ ޕްލޭނެއް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން އެކުލަވާލައިފިއެވެ.
އެ މިނިސްޓްރީން ބުނީ މި މެނޭޖްމަންޓް ޕްލޭނަކީ، ދިވެހިރާއްޖޭގެ މަސްވެރިކަމުގެ ޤާނޫނު ގެ 18 ވަނަ މާއްދާގެ ދަށުންހަދައިފައިވާ، އެ ޤާނޫނުގެ 17 ވަނަ މާއްދާގެ (ހ) ގެ 12 ވަނަ ނަންބަރުގައި ބަޔާންކޮށްފައިވާ މަސްވެރިކަން ރާވައި، ހިންގައި، ބެލެހެއްޓުމުގެ ޕްލޭންކަމަށެވެ. އަދި މި ޕްލޭންވާނީ ދިވެހިރާއްޖޭގެ ހުއިފިލަނޑާގެ މަސްވެރިކަން ބެލެހެއްޓުމުގައި މަގުދައްކައިދޭ މައިގަނޑު އަސާސްކަމަށް މިނިސްޓްރީންވަނީ މައުލޫމާތު ދީފައެވެ.
ފިޝަރީޒް މިނިސްޓްރީން ބުނީ މި ޕްލޭން އެކުލަވާލުމުގެ މައިގަނޑު ދެ މަގްސަދެއްވާކަމަށެވެ. އެގޮތުން މި ވިޔަފާރި ކުރިއަރުވާ ފަރާތްތަކަށް މަގުދެއްކުމުގެ އިތުރުން އަނެއް މަގްސަދަކީ ހުއިފިލަނޑާގެ މަސްވެރިކަން ރާވައި، ހިންގުމުގެ އިންތިޒާމެއް ޤާއިމުކޮށް، ޒިންމާދާރު ގޮތެއްގައި ހުއިފިލަނޑާގެ މަސްވެރިކަން ބަލަހައްޓައި، އެ މަސްވެރިކަމުގެ ފައިދާ ދިގު މުއްދަތަކަށް ދިވެހި ރައްޔިތުންނަށް ލިއްބައިދިނުން ކަމަށް ބުންޏެވެ.
