މާލޭ ލީގުގައި ވިކްޓްރީ ސްޕޯޓްސް ކްލަބް އަތްދަށުކޮށް މާޒިޔާ ސްޕޯޓްސް އެންޑް ރެކްރިއޭޝަން ޕޮއިންޓް ތާވަލުގެ އެއްވަނައަށް ޖެހިލައިފި އެވެ.
އަންގާރަ ދުވަހު ހަވީރު ކުޅުނު މި މެޗު ވިކްޓްރީއާ ވާދަކޮށް މާޒިޔާ އިން މެޗު ކާމިޔާބުކުރީ 0-1 ގެ ނަތީޖާއަކުންނެވެ.
ގަލޮޅު ރަސްމީ ދަނޑުގައި ކުޅުނު މި މެޗު ފެށިގެން ފުރަތަމަ ބޯޅަ ކޮންޓްރޯލްކޮށް ރަނގަޅަށް ކުޅުނީ ވިކްޓްރީންނެވެ. އެގޮތުން އެޓީމުން ވަނީ މާޒިޔާގެ ހާފަށް ބާރުބޮޑުކޮށް ލަނޑު ޖެހުމަށްވެސް ފުރުސަތުތަކެއް ތަނަވަސްކޮށްފައެވެ. އެގޮތުން 15 ވަނަ މިނެޓުގައި ވިކްޓްރީގެ ކެރިޗް އެންދްރެޖް އަށް ވަނީ ލީޑު ނެގުމަށް ހުސް ފުރުސަތެއް ލިބިފައެވެ. އެހެންނަމަވެސް ކެރިޗް ފޮނުވާލި ބޯޅަ ދިޔައީ ގޯލާ ދުރުން ބޭރަށެވެ.
ވިކްޓްރީގެ އިތުރުން މާޒިޔާ އިން ވެސް ވަނީ ރަނގަޅު ކުޅުމެއް ދައްކާ ލީޑު ނެގުމަށް ފުރުސަތުތަކެއް ހޯދާފައެވެ. އެގޮތުން 37 ވަނަ މިނެޓުގައި އަސަދުﷲ އަބްދުﷲ (އަސައްކޮ) ކީޕަރު ކައިރިން ނައްޓާލުމަށްފަހު ފޮނުވާލި ބޯޅަ ދިޔައީ ގޯލު ދަނޑިކައިރިން ބޭރަށެވެ.
ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.
ދެވަނަ ހާފްގައި ދެޓީމުގެ ފަރާތުންވެސް މޮޅު ކުޅުމެއް ފެނިގެންދިޔައިރު، މާޒިޔާ އިން ވަނީ ދެވަނަ ހާފްގައި އެޓީމުގެ ކުޅުން އިތުރަށް ރަނގަޅުކޮށްފައެވެ. އެގޮތުން އެޓީމުން އުފެއްދި ހަމަލާތައްވެސް ދެވަނަ ހާފްގައި ގިނައެވެ.
މާޒިޔާ އިން މެޗުގައި ލީޑު ނެގީ 49 ވަނަ މިނެޓުގައި ޕެނަލްޓީ އޭރިޔާ ރޮނގުމަތިން ކަހަލަ ގޮތަކަށް އެޓީމަށް ލިބުނު ހިލޭ ޖެހުމުން އެލެގްޒެންޑްރާ ރަކިޗްއެވެ. މި ހިލޭ ޖެހުމަކީ ޕެނަލްޓީއެއްކަމަށް މާޒިޔާ އިން އެޕީލް ކުރިއިރު، ރެފްރީ ވަނީ އެއީ ހިލޭ ޖެހުމެއް ކަމަށް ނިންމާފައެވެ.
މި ލަނޑާއެކު މާޒިޔާ އިން އިތުބާރާއެކު ކުޅެމުންދިޔައިރު، ލަނޑު ޖެހުމަށް ގިނަ ފުރުސަތުތަކެއް އެޓީމުން ވަނީ ތަނަވަސްކޮށްފައެވެ. އެގޮތުން އަސަދުﷲ އަށް ލިބުނު ފުރުސަތުތައް ހިމެނެއެވެ.
މެޗުގައި ރެފްރީގެ ނިންމުންތަކާމެދު ސުވާލު އުފެދޭ ކަންތައްތަކެއް ފެނިފައިވާއިރު، މާޒިޔާގެ ކޯޗުވެސް ވަނީ ރެފްރީގެ ނިންމުންތަކާ މެދު ވަރަށް ބޮޑަށް ނުރުހުން ފާޅުކޮށްފައެވެ. ފަހަކަށް އައިސް ލީގުގައި ރެފްރީންގެ ނިންމުންތަކާ މެދު ގިނަ ކޯޗުން ފާޑުކިޔަމުން އަންނަ އިރު، އެ ކޯޗުންގެ ނިންމުންތަކާ މެދު ބައެއްފަހަރު ސުވާލުއުފެދެއެވެ.
މި ނަތީޖާއާއެކު މާޒިޔާ އޮތީ ކުޅުނު ހަތަރު މެޗުން ލިބުނު 12 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި ވިކްޓްރީ އޮތީ އެއްވެސް މެޗަކުން މޮޅު ނުވެ ޕޮއިންޓް ތާވަލުގެ ހަތްވަނައިގަ އެވެ.
