ދަނޑުވެރިކަމުގެ ތަމްރީން ޕްރޮގްރާމްތައް ރަށްރަށުުގައި ހިންގުމަށް އެދި ހުށަހެޅުމުގެ ފުރުސަތު ހުޅުވާލައިފި
6 ޑިސެމްބަރު 2020 | އާދީއްތަ 14:57ޕްރޮގްރާމް ހިންގުމަށް އެދި ހުށަހަޅާނީ ކައުންސިލް ނުވަތަ ޖަމްއިއްޔާއެއް މެދުވެރިކޮށް
ދަނޑުވެރިކަން ފުޅާ ކުރުމަށް މިނިސްޓްރީން ދަނީ ގިނަ މަސައްކަތްތައް ކުރަމުން
ދަނޑުވެރިންގެ ފަންނީ ގާބިލުކަން އިތުރުކުރުމަށް 2021 ވަނަ އަހަރު ހިންގުމަށް ހަމަޖެހިފައިވާ ދަނޑުވެރިކަމުގެ ތަމްރީނު ޕްރޮގްރާމްތައް ރަށްރަށުގައި ހިންގުމަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރއިން ބުނީ ދަނޑުވެރިކަމުގެ ތަމްރީނު ޕްރޮގްރާމްތައް ހިންގުމަށް ބޭނުންވާ ރަށްރަށުން ޕްރޮގްރާމް ހިންގުމަށް އެދި ހުށަހަޅާނީ އެރަށެއްގެ ރަށު ކައުންސިލް ނުވަތަ އެރަށެއްގައި ހަރަކާތްތެރިވާ ހިލޭ ސާބަހަށް މަސައްކަތް ކުރާ ޖަމްއިއްޔާތަށް މެދުވެރިކޮށް ކަމަށެވެ.
ދަނޑުވެރިކަމާ ބެހޭ މިނިސްޓްރީން ބުނީ ތަމްރީނު ޕްރޮގްރާމް ހިންގުމަށް ލިބިފައިވާ ބަޖެޓާއި މިނިސްޓްރީގެ ފަންނީ މުވައްޒަފުން ތިބި މިންވަރަކުން ވީ އެންމެ ގިނަ ރަށެއްގައި ތަމްރީނު ޕްރޮގްރާމްތައް ހިންގައިދިނުމަށް މިނިސްޓްރީން މަސައްކަތްކުރާނެ ކަމަށެވެ. އަދި ގިނަ ރަށްތަކަކުން ތަމްރީނު ޕްރޮގްރާމް ހިންގުމަށް އެދިވާފައިވާނަމަ ކޯސް ހިންގުމަށް އެދި ހުށަހަޅާފައިވާ ފޯމުގައި ދީފައިވާ މައުލޫމާތު ތަކަށް ބަލައި ޕްރޮގްރާމް ހިންގުމަށް އެންމެ އެކަށީގެންވާ ކަމަށް ފެންނަ ރަށްތައް ކަނޑައަޅާ އެރަށްރަށުގައި 2021 ވަނަ އަހަރު ތަމްރީނު ޕްރޮގްރާމްތައް ހިންގައިދޭނެ ކަމަށް މިނިސްޓްރީން ބުނެއެވެ.
މީގެ އިތުރުން މިނިސްޓްރީން ބުނީ ތަމްރީނު ޕްރޮގްރާމްތައް ބައްޓަން ކުރެވޭނީ އެރަށެއްގައި ހުރި މައްސަލަތަކަށް ބެލުމަށްފަހު އެރަށަކަށް އެންމެ އެކަށީގެންވާނެ މައުލޫމާތުތައް ފޯރުކޮށްދެވޭނެ ގޮތަކަށް ކަމަށެވެ.
މިނިސްޓްރީން ބުނީ 2021 ވަނަ އަހަރު ކުރިއަށް ގެންދާނެ ދަނޑުވެރިކަމުގެ ތަމްރީނު ޕްރޮގްރާމްތަކުގެ ދިގުމިނަކީ 10 ދުވަހާއި 14 ދުވަހާއި ދެމެދުގެ މުއްދަތެއް ކަމަށެވެ.
ކޯހުގައި ބައިވެރިވުމުގެ ޝަރުތަކީ އަސާސީތައުލީމް ފެންވަރު އަދި ދަނޑުވެރިކަމަށް ޝައުގުވެރިކަން ހުރުމެވެ. އަދި ކޯސް ހިންގަން ބޭނުންވާ ނަމަ މިމަހުގެ 28 ވަނަ ދުވަހުގެ 14:00ގެ ކުރިން ފޯމް ހުށަހެޅުމަށް މިނިސްޓްރީން އެދިފައިވެއެވެ.
