ކުޅިވަރުގެ ޤާނޫނަށް ހުށަހެޅި އިސްލާހުތައް ބަލައިގަނެ ކޮމިޓީއަށް ފޮނުވައިފި

2015 ވަނަ އަހަރު އަމަލުކުރަން ފެށުނު ކުޅިވަރުގެ ޤާނޫނަށް އެމްޑީޕީގެ ޗެއާޕަސަން އަދި ކުރީގެ ކުޅިވަރާ ބެހޭ ވަޒީރުކަންވެސް ކުރައްވާފައިވާ ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފް ހުށަހެޅުއްވި އިސްލާހުތައް ރައްޔިތުންގެ މަޖިލީހުން ބަލައިގަނެ އިޖުތިމާޢީ ކޮމިޓީއަށް ފޮނުވުމަށް ފާސްކޮށްފިއެވެ.

ތިން ދުވަހަށް ދިގުދެމިގެން ދިޔަ ބަހުސްގެ މަރުހަލާއަށް ފަހު ބުދަ ދުވަހު ނެގުނު ވޯޓުގައި 30/2015 ކުޅިވަރުގެ ޤާނޫނަށް އިސްލާހު ގެނައުމުގެ ބިލު މަޖިލީހުން ބަލައިގަތުމަށް ވޯޓުގައި ބައިވެރިވި 42 މެންބަރުން ވޯޓުދެއްވިއެވެ. އެހެން ކަމުން މި ބިލް ދިރާސާކުރުމަށް އިޖުތިމާޢީ ކޮމިޓީއަށް ފޮނުވަން ވަނީ ނިންމާފައެވެ.

ބަހުސްގެ މަރުހަލާގައި ގިނަ މެންބަރުން ވަނީ ހަސަން ލަތީފް ހުށަހެޅުއްވި އިސްލާހުތަކަށް ތާއީދުކޮށް ވާހަކަ ދައްކަވާފައެވެ. އަދި ކޮމިޓީ މަރުހަލާގައި ބިލު އިތުރަށް ފުރިހަމަކުރުމަށް ގިނަ ފަރާތްތަކެއްގެ މަޝްވަރާ ހޯދުމަށްވެސް ބަހުސްގެ މަރުހަލާގައި މެމްބަރުން ވަނީ އެދިފައެވެ.

ބިލާ ބެހޭ ގޮތުން ފަހުބަސް ވިދާޅުވުމަށް ދެއްވި ފުރުސަތުގައި ހަސަން ލަތީފް ވަނީ ބިލަށް ވާހަކަދެއްކެވި ހުރިހާ މެންބަރުންނަށް ޝުކުރު އަދާކޮށްފައެވެ. ހަސަން ލަތީފް ވިދާޅުވީ ބިލު މަޖިލީހަށް ހުށަހެޅުއްވީ ކުޅިވަރުގައި ހުރި މައްސަލަތަކަށް ހައްލު ހޯދުމަށް ކަމަށާއި، އެގޮތުން ކުޅިވަރުގެ ތެރޭގައި ހިމެނޭ ހުރިހާ ދާއިރާއެއް ހިމެނޭގޮތަށް އިސްލާހުތައް ހުށަހަޅުއްވާފައިވާ ކަމަށެވެ.

ހަސަން ލަތީފް ވިދާޅުވީ ކުޅިވަރު ވަސީލަތްތައް ރާއްޖޭގެ އެކިކަންކޮޅުތަކުގައި ގާއިމުކުރާނެ އެންމެ ރަނގަޅު ތަންތަން ކަނޑައެޅުމުން، އެކަމުގެ އެންމެ ރަނގަޅު ނަތީޖާ ނެރެވޭނެ ކަމަށެވެ. އަދި އެއީ ކުރަންޖެހޭ ކަމެއް ކަމަށާއި އެކަންކުރާނެ ގޮތެއް ސްޕޯޓްސް އިނިސްޓިޓިއުޓަށް ހޯދައިދޭން ޖެހޭއިރު، ކުޅިވަރާ ބެހޭ ވަޒީރުގެ އެންމެ ބޮޑު މަސްއޫލިއްޔަތަކަށް ވެގެންދާނީ އެ ހުރިހާ މުއައްސަސާތަކުން އެކަންކަން ކުރޭތޯ ބަލައި، އެކަންކަން ކުރުވުން ކަމަށާއި، ނުކުރާނަމަ އެކަން ކުރެވޭނެ މަގު ފަހިކޮށްދިނުން ކަމަށްވެސް ވިދާޅުވިއެވެ.

އަދި ސްޕޯޓްސް ކޯޕަރޭޝަނެއް އޮވެ އެތަނުގެ ބޭނުންނުހިފި ދާއިރު، ކުޅިވަރުގެ ވަސީލަތް ތަރައްގީކޮށް ބެލެހެއްޓޭނީ ވިޔަފާރި އުސޫލުން އެކަންކޮށްގެން ކަމަށް މީގެ ކުރިން ކުޅިވަރާ ބެހޭ ވަޒީރުކަންވެސް ކުރެއްވި ހަސަން ލަތީފް ވިދާޅުވިއެވެ.

ކުޅިވަރާ ބެހޭ ވުޒާރާއަށް ވިޔަފާރި ނުކުރެވޭނެކަން ފާހަގަކުރައްވާ ހަސަން ލަތީފް ވިދާޅުވީ ކުޅިވަރު އެސޯސިއޭޝަންތަކަށް ސަރުކާރުން ޚަރަދުކުރާނެ ފައިސާ ބެލޭނެ ރަނގަޅު އޮޑިޓެއް ކުރެވޭނެ ގޮތެއް އުސޫލެއް އޮންނަން ޖެހޭއިރު، ހުރިހާ ގައުމީ ކުޅިވަރު އެސޯސިއޭޝަންތަކަށް އެއްގޮތް އަސާސީ ގަވާއިދެއް އޮންނަން ޖެހޭ ކަމަށާއި، އެކަން މި އިސްލާހުތަކުގައި ހިމެނިފައިވާނެ ކަމަށެވެ.

މީގެ އިތުރުން ހަސަން ލަތީފް ވިދާޅުވީ ކޮމިޓީ މަރުހަލާގައި ވީހާވެސް ގިނަ ފަރާތްތަކެއް، ހާއްސަކޮށް ކުޅިވަރާ ގުޅުންހުރި ބޭފުޅުންގެ މަޝްވަރާ އާއި ލަފާ ހޯދައިގެން ބިލަށް އިތުރަށް ގެންނަން ޖެހޭ ބަދަލުތައް ގެނައުމަކީ އުންމީދުކުރާ ގޮތް ކަމަށެވެ.

ކުޅިވަރުގެ ޤާނޫނަށް ހަސަން ލަތީފް ހުށަހެޅުއްވި އިސްލާހުތައް މައިގަނޑު ފަސް ބަޔަކަށް ބަހާލާފައިވާއިރު، އެ ފަސް ބައި ހިމެނޭ ގޮތަށް ގިނަ އިސްލާހުތަކެއް ވަނީ ހުށަހަޅުއްވާފައެވެ. މި އިސްލާހުތަކުގެ ތެރޭގައި ރާއްޖޭގެ ކުޅިވަރުގެ ނިޒާމުގެ ތެރޭގައި ހިމެނޭ ހުރިހާ އިދާރާތަކެއް ޝާމިލުވާ ގޮތަށް އިސްލާހުތައް ގެނައުމަށް ވަނީ ނިންމާފައެވެ. އޭގެ ތެރޭގައި ކުޅިވަރާ ބެހޭ ގައުމީ މަޖިލީހުގެ އިންތިޚާބާއި، ކުޅިވަރު އެސޯސިއޭޝަންތަކުގެ އިންތިޚާބުތައް ދެން ބާއްވާނީ އިލެކްޝަންސް ކޮމިޝަނުން ކަމަށް ވަނީ ބަޔާންކޮށްފައެވެ.

މި އިސްލާހުތަކުގެ ތެރެއިން ކުޅިވަރު އެސޯސިއޭޝަންތަކުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން އޮތް އޮތުމަށް ގައުމީ ކުޅިވަރު އެސޯސިއޭޝަންތަކުން ވަނީ ނުރުހުން ފާޅުކޮށް ބަޔާނެއްވެސް ނެރެފައެވެ. އަދި މިކަމާ ގުޅިގެން މީގެ ކުރިން ކުޅިވަރާ ބެހޭ ވަޒީރު އަޙްމަދު މަޙްލޫފުވެސް ވަނީ ވާހަކަ ދައްކަވާފައެވެ.