19 ވަނަ ގައުމީ ބޮޑީބިލްޑިންގ މުބާރާތް (މިސްޓަ މޯލްޑިވްސް) އަންނަ އަހަރުގެ މާޗު މަހު ބޭއްވުމަށް ބޮޑީބިލްޑިންގ އެސޯސިއޭޝަން އޮފް މޯލްޑިވްސް (ބީބީއޭއެމް) ން ނިންމައިފިއެވެ.

ގައުމީ ބޮޑީބިލްޑިންގ މުބާރާތް އަންނަ އަހަރުގެ މާޗު މަހުގެ 26 ވަނަ ދުވަހު ބޭއްވުމަށް ބީބީއޭއެމުން ނިންމިއިރު، މި އަހަރު ގައުމީ ބޮޑީބިލްޑިންގ މުބާރާތް ބާއްވާފައެއް ނުވެއެވެ. މި އަހަރުގެ މުބާރާތް ޖުލައި މަހު ބާއްވަން ތާވަލުކުރި ނަމަވެސް، މުބާރާތް ނުބާއްވަން ބީބީއޭއެމުން އެ ފަހަރު ނިންމީ ކޮވިޑް-19 ގެ ސަބަބުން ދުނިޔޭގައި އާއި ރާއްޖޭގައި އެޅިފައިވާ އެކިއެކި ފިޔަވަޅުތަކުގެ އިތުރުން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރެވިފައިވުމާއި ގުޅިގެންނެވެ.

އަދި މި އަހަރުގެ އޭޕްރީލް މަހުގެ ތިންވަނަ ދުވަހު ބޭއްވުމަށް ހަމަޖެހިފައި އޮތް ގައުމީ ބޮޑީބިލްޑިންގ ޓީމުގެ ސްކޮޑް އެކުލަވާލުން މުއްދަތެއް ނެތް ގޮތަށް ފަސްކުރިއެވެ. އެހެންކަމުން އަންނަ އަހަރުގެ މާޗު މަހު ގައުމީ ބޮޑީބިލްޑިންގ މުބާރާތް ބާއްވަން ނިންމިއިރު، ގައުމީ ބޮޑީބިލްޑިންގ ޓީމުގެ ސްކޮޑް އެކުލަވާލުން ތާވަލުކޮށްފައިވަނީ އަންނަ އަހަރުގެ އޭޕްރީލް މަހަށެވެ.

ކޮވިޑް-19 އާ ގުޅިގެން މި އަހަރު ބޮޑީބިލްޑިންގ އެއްވެސް މުބާރާތެއް ބާއްވާފައި ނުވާއިރު، މި އަހަރު ސެޕްޓެމްބަރު މަހު ރާއްޖޭގައި ބާއްވަން ހަމަޖެހިފައި އޮތް 54 ވަނަ އޭޝިއަން ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕުވެސް ވަނީ އަންނަ އަހަރަށް ފަސްކޮށްފައެވެ. އެހެންކަމުން މި މުބާރާތް ދެން ބޭއްވުމަށް ހަމަޖެހިފައިވަނީ އަންނަ އަހަރުގެ ސެޕްޓެމްބަރު މަހުގެ އެކަކުން ހަތްވަނަ ދުވަހުގެ ނިޔަލަށެވެ.

އޭޝިއަން ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް ރާއްޖޭގައި ބޭއްވުމުގެ ފުރުސަތު މިދިޔަ އަހަރު ލިބުނުއިރު، ޖުމްލަ 400 އެތުލީޓުންނާއެކު އެ މުބާރާތް ބާއްވަން ނިންމާފައިވަނީ ކ. މާފުށީގައެވެ.