ކުދިންނަކީ މުޖްތަމައުއަށް ދިމާވެފައިވާ އިޖްތިމާއީ ކަންކަމަށް ހެޔޮބަދަލެއް ގެންނާނެ ޗޭންޖް އޭޖެންޓްސް ކަމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވެފައިވަނީ ބައިނަލްއަގްވާމީ ކުޑަކުދިންގެ ދުވަހާ ގުޅިގެން ވާހަކަދައްކަވަމުންނެވެ. އެގޮތުން އެކަމަނާ ވަނީ ކުޑަކުދިންނާ މުހާތަބު ކުރައްވާ ލިބިފައިވާ ހައްގުތަކުގެ ބޭނުން ޒިންމާދާރު ކާމާއިއެކު ހިފުމަށް އެކުދިންނަށް އިލްތިމާސްކުރައްވާފައެވެ. އަދި ދިރިއުޅުމަށް ހެޔޮބަދަލެއް ގެނައުމަށް މަސައްކަތް ކުރުމަށް އިލްތިމާސްކޮށް، އެކަމަނާ ވަނީ ކުޑަކުދިންގެ އަޑު ވަރަށް މުހިއްމު ކަމަށް ވިދާޅުވެފައެވެ. އެގޮތުން ކުދިންނާއި ގުޅޭ ކަންކަން ނިންމުމުގައި، ނުވަތަ އަސަރު ކުރާނެ ކަންކަމުގައި ބަސްބުނެ އަޑު އުފުލަން ލިބޭ ކޮންމެ ފުރުސަތެއްގެ ބޭނުން ހިފުމަށް އެކަމަނާ ހިތްވަރު ދެއްވާކަން ހާމަކުރެއްވިއެވެ.
މީގެ އިތުރުން ކުޑަކުދިންގެ ބައިވެރިވުން މުޖުތަމައުގައި އޮތުމަކީ ކުދިންނަށް ލިބިދޭ ހައްގެއް ކަމަށް ވިދާޅުވަމުން އެކަމަނާ ވަނީ އެއީ ކުޑަކުދިންގެ ހައްގުތަކާ ބެހޭ ބައިނަލްއަގްވާމީ މުއާހަދާގެ އެންމެ މުހިއްމު އެއް އަސާސްކަމަށް ވިދާޅުވެފައެވެ. އެގޮތުން އަޑު އުފުލުމުގެ ހައްގު ބޭނުން ކުރުމަކީ ކުޑަކުދިންގެ ހައްގުތަކާ ބެހޭ ގާނޫނާއި ސީއާރްސީ ތަންފީޒު ކުރުމަށް މުހިއްމު ކަމެއް ކަމަށާއި އޭގެ ސަބަބުން ކުދިންނާ ގުޅޭ ކަންކަން ނިންމުމުގެ ފެންވަރު ރަނގަޅުވާކަމަށް އެކަމަނާ ވިދާޅުވިއެވެ.
އެކަމާ ވިދާޅުވީ ބައިނަލްއަގްވާމީ ކުޑަކުދިންގެ ދުވަސް އިއްތިފާގަކުން މިފަހަރު ދިމާވީ ކުޑަކުދިންގެ އަދުލުގެ ޤާނޫނަށް އަމަލް ކުރަން ފެށުނު ދުވަހާކަމަށެވެ. އަދި އަބަދުވެސް ހަނދާން ބަހައްޓަންވީ ކަމެއްގެ ގޮތުގައި އެކަމަނާ ވަނީ ޒިންމާއާއި ނުލާ ބަސްބުނުގެ ހައްގެއްވެސް އަދި އެހެން އެއްވެސް ހައްގެއްގެ ބޭނުމެއް ނުހިފޭނެކަން ހަނދާން ބެހެއްޓުމަށް އިލްތިމާސްކުރައްވާފައެވެ.
މީގެ އިތުރުން ކުޑަކުދިންގެ އަދުލުގެ ޤާނޫނަގެ ވާހަކަ ދައްކާއިރު އެންމެ ބޮޑު ޒިންމާއަކީ ކުށް ކުރުމުން ދުރުހެލިވުމާއެކު ކުށްކުރާ މީހުންނާ ދުރުހެލި ވުންކަމަށާއި ކުޑަކުދިންނަށް ހާއްސަ ގާނޫނެއް އޮތުމަކީ އޭގެ ސަބަބުން އިސްލާހު ވުމަށް ފުރުސަތު ހޯދައިދޭ ކަމެއްގެ ގޮތުގައި އެކަމަނާ ސިފަކުރެއްވިއެވެ. އަދި ކުށެއް ކޮށްފިނަމަ އޭގެ ޒިންމާ ނަގަން ޖެހޭނެކަމަށާއި ކުޑަކުދިންގެ ހައްގުތަކާ ރައްކާތެރިކަމާ ގުޅޭ ތަހުޒީބު ގާނޫނުތައް ތައާރަފް ކުރެވުނަސް، މިކަމުގައި މަސައްކަތް ކުރާ ދައުލަތުގެ އެންމެހާ މުއައްސަސާއެއްގެ މެދުގައި މަސައްކަތް ކުރެވޭ އިންތިޒާމްތައް ހަރުދަނާ ކުރުމާއި ނަތީޖާ ނެރުމަށް އިސްކަންދިނުން އެއީ ކޮންމެ ދުވަހަކު އަހައްމިއްޔަތުކަންދޭ ކަމަކަށްވުން މުހިއްމު ކަމަށް އެކަމަނާ ވަނީ ވިދާޅުވެފައެވެ.
އެކަމަނާވަނީ ކުޑަކުދިންނަކީ ކުށްކުރުމާ ދުރުހެލި، ޒިންމާދާރު ކަމާއެކު މުޖުތަމައުގައި ބައިވެރިވެ، ބަސްވިކޭ ބަޔަކަށްވުމަށް އުއްމީދުކުރައްވާކަމަށް ވިދާޅުވެފައެވެ.
