ކުޑަކުދިންނަށް ދައުވާ ކުރުމުގެ ބަދަލުގައި އެހެން ފިޔަވަޅުތަކަށް ދެން އިސްކަން ދޭންޖެހޭނެ: އޭޖީ
20 ނޮވެމްބަރު 2020 | ހުކުރު 17:57ޖިނާއީ މަސްއޫލިއްޔަތު އުފުލަންޖެހޭ އުމުރަކީ 15 އަހަރު ކަމުގައި ގާނޫނުގައި ކަނޑައެޅިފައިވޭ
ބަންޑާރަ ނައިބް އިބްރާހިމް ރިއްފަތު
ކުޑަކުދިންގެ އަދުލުގެ ގާނޫނަށް އަމަލުކުރަން ފެށުމާއިއެކު ދައުވާ ކުރުމުގެ ބަދަލުގައި އެހެން ފިޔަވަޅުތަކަށް އިސްކަން ދޭން ޖެހޭނެ ކަމަށް އެޓާނީ ޖެނެރަލް (އޭޖީ) އިބްރާހިމް ރިއްފަތު ވިދާޅުވެއްޖެއެވެ.
ކުޑަކުދިންގެ އަދުލުުގެ ގާނޫނަށް ހުކުރު ދުވަހުން ފެށިގެން އަމަލުކުރަން ފެށުމާއި ގުޅިގެން އޭޖީ ކުރެއްވި ޓްވީޓެއްގައި ވިދާޅުވީ، 2019 ވަނަ އަހަރު ފާސްކުރެވުނު މި ގާނޫނު ގައި ކުޑަކުދިން ޖިނާއީ މަސްއޫލިއްޔަތު އުފުލަންޖެހޭ އުމުރަކީ 15 އަހަރު ކަމުގައި ކަނޑައެޅިފައިވާ ކަމަށެވެ. އަދި މި ގާނޫނު ތައާރަފުކުރާ ޑައިވާޝަން މެކޭނިޒަމް އަކީ، ކުޑަކުދިން ކުށްކުރުމުން ރައްކާތެރިކޮށްދީ، ރިހެބިލިޓޭޓްކޮށް މުޖުތަމައު އަށް އަނބުރާ އައުމަށް މަގު ފަހިކޮށްދޭނެ ފިޔަވަޅުތަކެއް ކަމަށް ވިދާޅުވިއެވެ.
އޭގެ އިތުރުން އޭޖީ ވިދާޅުވީ، ގާނޫނަށް އަމަލުކުރަން ފެށުމާއެކު، ކުޑަކުދިން ކުށްކުރާ މައްސަލަތަކުގެ ޝަރީއަތްތައް ކުރިއަށްގެންދަން ޖެހޭނީ، ކުޑަކުދިންނަށް ރަހުމަތްތެރި މާހައުލެއްގައި ކަމަށާއި، ކުށްކުރާ ކުޑަކުއްޖާ އަށް ލިބިދޭން ޖެހޭ ކަމަށް ގާނޫނުގައި ބަޔާންކުރާ އެންމެހާ ހައްގުތަކާއި ރައްކާތެރިކަން ލިބިދީގެން ކަމަށެވެ.
ކުޑަކުދިންގެ އަދުލުގެ ގާނޫނަކީ 2019 ވަނަ އަހަރުގެ ނޮވެމްބަރު މަހުގެ 14 ވަނަ ދުވަހު ރައްޔިތުންގެ މަޖިލީހުން ފާސްކޮށް، ހަމަ އެ އަހަރުގެ ނޮވެމްބަރު މަހުގެ 20 ވަނަ ދުވަހު ރައީސުލްޖުމްހޫރިއްޔާ ތަސްދީގު ކުރައްވާފައިވާ ގާނޫނެކެވެ.
މިގާނޫނުގެ ގެ ދަށުން ޑިޕާޓްމަންޓް އޮފް ޖުވެނައިލް ޖަސްޓިސް ވަނީ ހުކުރު ދުވަހު އުފައްދާފައެވެ. ޑިޕާޓްމަންޓް އޮފް ޖުވެނައިލް ޖަސްޓިސް އުފެދުމާއެކު، ހޯމް މިނިސްޓްރީގެ ދަށުން ހިނގަމުން އައި ޖުވެނައިލް ޖަސްޓިސް ޔުނިޓް އުވުނީއެވެ. އެއާއެކު ގާނޫނާ ހިލާފްވާ 18 އަހަރުން ދަށުގެ ކުދިންގެ މަސްލަހަތު ހިމާޔަތްކޮށް ދިނުމަށް، ކޭސްވާކް ކުރުމަށާއި، އެ ކުދިން އިސްލާހުކޮށް އަނބުރާ މުޖުތަމައު އަށް ގެނައުމަށް ރިހިބިލިޓޭޝަން ޕްރޮގްރާމްތައް ހުކުރު ދުވަހުން ފެށިގެން ހިންގާނީ ޑިޕާޓްމަންޓް އޮފް ޖުވެނައިލް ޖަސްޓިސްއިންނެވެ.
