އިތުރު 27 މީހަކު ޕޮޒިޓިވް، 24 މީހުން ޕޮޒިޓިވްވީ މާލެ ސަރަހައްދުން!
13 ނޮވެމްބަރު 2020 | ހުކުރު 17:29ފާއިތުވި 24 ގަޑީއިރު 1256 ސާމްޕަލްއެއް ޓެސްޓުކޮށްފައިވޭ
މާލެ ސިޓީ، މިހާތަނަށް 11،244 މީހަކު ބަލިން ރަނގަޅުވެފައިވާ ކަަމަށް އެޗްޕީއޭއިން ބުނޭ
ކޮވިޑް-19ށް އިތުރު 27 މީހަކު ޕޮޒިޓިވްވެ، 19 މީހަކު ބަލިން ރަނގަޅުވެއްޖެ އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުރާސްފަތި ދުވަހުގެ އިރުއޮއްސި 6:00ން ހުކުރު ދުވަހުގެ އިރުއޮއްސި 6:00ށް 27 މީހަކު ޕޮޒިޓިވްވެފައިވާ ކަމަށެވެ. އެއީ 17 ދިވެހިންނާއި އެހެނިހެން ގައުމުތަކަށް ނިސްބަތްވާ 10 މީހުންނެވެ.
ފާއިތުވި 24 ގަޑީއިރު 1256 ސާމްޕަލްއެއް ޓެސްޓުކޮށްފައިވާއިރު، 24 މީހަކު ޕޮޒިޓިވްވެފައިވަނީ މާލެ ސަރަހައްދުންނެވެ. އަދި ތިން މީހަކު ޕޮޒިޓިވްވެފައިވަނީ ރިސޯޓާއި އަތޮޅުތެރެއިން ކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ 820 އެކްޓިވް ކޭސް ހިމެނޭ ކަމަށާއި، މިވަގުތު އައިސޮލޭޝަން ފެސިލިޓީގައި 243 މީހުން އެބަތިބި ކަމަށެވެ. 52 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ.
ރާއްޖޭގައި މިހާތަނަށް 12،112 މީހަކު ޕޮޒިޓިވްވެފައިވާއިރު، 11،244 މީހަކު ބަލިން ރަނގަޅުވެފައިވެއެވެ. އަދި 41 މީހަކު ބަލީގައި ވަނީ މަރުވެފަ އެވެ.
މީގެ އިތުރުން އެޗްޕީއޭއިން ބުނީ 9 ރަށަކުން އަދި 25 ރިސޯޓަކުން އެކްޓިވް ކޭސް ފެނިފައިވާ ކަމަށެވެ. މީގެ ތެރެއިން 55 ފަތުރުވެރިން ކޮވިޑަށް ޕޮޒިޓިވްވެފައިވާއިރު، އެކި ރިސޯޓުތަކުގައި މަސައްކަތް ކުރާ ޖުމްލަ 133 މުވައްޒަފަކު ވަނީ ޕޮޒިޓިވްވެފައެވެ.
ރާއްޖޭގައި ކޮވިޑްގެ ކޭސްތައް ރިޕޯޓު ކުރާ މިންވަރު މަދުވި ނަމަވެސް ރައްކާތެރިވުމަށް އަޅާފައިވާ ފިޔަވަޅުތަކަށް ފަރުވާ ކުޑަނުކުރުމަށް އެޗްއީއޯސީން އިލްތިމާސްކުރެ އެވެ.
