ޑިޖިޓަލް ނިޒާމެއްގެ ތެރެއިން ސަރުކާރު ހިންގަން ޖެހޭ: މިނިސްޓަރު މަލީހު
10 ނޮވެމްބަރު 2020 | އަންގާރަ 20:33ޒަމާނީ ޓެކްނޮލޮޖީގެ ބޭނުން ނުހިފާނަމަ ގައުމުދާނީ ވަރަށް ފަހަތަށް
ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު
ޑިޖިޓަލް ނިޒާމެއްގެ ތެރެއިން މުޅި ސަރުކާރު ހިންގުމަށްޓަކައި ކުރަންޖެހޭ މަސައްކަތްތައް ކުރަމުންދާ ކަމަށް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ސަރުކާރަށް ދެއަހަރު ފުރުމާއި ގުޅިގެން ދެއްވި ޚާއްސަ އިންޓަވިއުގައި މިނިސްޓަރު މަލީހު ވިދާޅުވީ މިއީ ޓެކްނޮލޮޖީގެ ޒަމާން ކަމަށާއި، ހުރިހާ ކަމެއް ބަރޯސާވަނީ ޓެކްނޮލޮޖީއަށް ކަމަށެވެ.
ޒަމާނީ ޓެކްނޮލޮޖީގެ ބޭނުން ނުހިފާނަމަ ގައުމުދާނީ ވަރަށް ފަހަތަށްކަން ފާހަގަކުރައްވައި މިނިސްޓަރު މަލީހު ވިދާޅުވީ އަދިވެސް ސަރުކާރުގެ ޕްއޮރިޓީ ލިސްޓަށް މިހާރަށް ވުރެ މާބޮޑަށް ޓެކްނޮލޮޖީގެ ކަންކަން ކުރިއަށް ޖައްސަން ޖެހޭ ކަމަށެވެ. އަދި ސަރުކާރުގެ އެއް މުއައްސަސާއާ އަނެއް މުއައްސަސާތަކާއި ގުޅިގެން މަސައްކަތްކުރަންޖެހޭ ކަމަށާއި، އެކަނި ކަންކަން ކުރުމުގެ ސަގާފަތް ދޫކޮށް ޖެހޭ ކަމަށް މިނިސްޓަރު ވިދާޅުވިއެވެ. އެގޮތުން މުޅި ނިޒާމު ޑިޖިޓަލައިޒް ކުރެވި، ޑިޖިޓަލް ނިޒާމެއްގެ ތެރެއިން މުޅި ސަރުކާރު ހިންގުމަށްޓަކައި ކުރަންޖެހޭ މަސައްކަތްތައް ކުރަމުންދާކަން މިނިސްޓަރު ފާހަގަކުރެއްވިއެވެ.
މީގެ އިތުރުން މިނިސްޓަރު މަލީހު ވިދާޅުވީ ރާއްޖޭއަށް ވަރުގަދަ ޑޭޓާ ސެންޓަރއެއް އަންނަން ޖެހޭ ކަމަށާއި ރާއްޖޭގެ ޓެކްނޮލޮޖީގެ އިންސްފްރާސްޓަކްޗަރ މިހާރަށްވުރެ ވަރުގަދަވާން ޖެހޭ ކަމަށެވެ. އަދި ސަރުކާރުގެ ކޮންމެ މުއައްޒަފަކީ ކޮންމެ ތަނެއްގައި ހުރެގެން ވެސް މަސައްކަތް ކުރެވޭ މުއައްޒަފަކަށްވާންޖެހޭ ކަމަށް މިނިސްޓަރު ވިދާޅުވިއެވެ.
ދާއިރާގައި މަސައްކަތްތެރިންނަށް އަލިއަޅުއްވާލައްވާ މިނިސްޓަރު ވިދާޅުވީ ސަރުކާރަށް ދެވޭ މުސާރައާއި އިންޑަސްޓްރީގެ އަގާއި ވަރަށް ނުބައްދަލު ކަމަށެވެ. އެހެންކަމުން މާލެނައިސް އެމީހަކު ހުރިތަނެއްގައި ހުރެގެން މަސައްކަތް ކުރެވޭ ނިޒާމެއް ހަމަޖެއްސުމުގެ މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.
ކުރަމުންދާ މަސައްކަތްތައް އިތުރަށް ތަފްސީލް ކޮށްދެއްވައި މިނިސްޓަރު މަލީހު ވިދާޅުވީ ފުރަތަމަ ފަހަރަށް ރައީސް އިބްރާހިމް މުހައްމަދު ސޯލިހުގެ ވިސްނުންފުޅާއެކު ލާމަރުކަޒީ ނިޒާމެއްގެ ތެރެއިން ރާއްޖޭގެ އަތޮޅެއްގެ ވަރުގަދަ ސޮފްޓްވެއަރ ޑިވެލޮޕްމެންޓް ސެންޓަރެއް ގާއިމް ކުރުމުގެ މަސައްކަތް މިހާރު ކުރިއަށްދާ ކަމަށެވެ. އަދި ހެލްޕް ހެލްޕް ޑެސްކް ވެސް އަތޮޅު ތެރޭއަށް ބަދަލު ކުރުމުގެ ވިސްނުންހުރިކަން މިނިސްޓަރު ފާހަގަކުރެއްވިއެވެ.
މިބަދަލުތަކާއިކު ހަގީގީ ތަރައްގީ ހާސިލްވެގެންދާނެ ކަމަށް މިނިސްޓަރު މަލީހު ވިދާޅުވިއެވެ.
