މި އަހަރު ނިމުމުގެ ކުރިން ވެކްސިނެއް ލިބޭނެކަމުގެ އުއްމީދު ބޮޑު: ޑަބްލިއުއެޗްއޯ
10 ނޮވެމްބަރު 2020 | އަންގާރަ 17:04ފިޒަރ ވެކްސިންގެ އުއްމީދު ބޮޑު
ވެކްސިން ޓެސްޓް ކުރުމުގެ މަރުހަލާގެ ތެރެއިން މީހެއްގެ ގަޔަށް ވެކްސިން ޖަހަނީ
މި އަހަރު ނިމުމުގެ ކުރިން ވެކްސިން ލިބޭނެކަމުގެ އުއްމީދު ކުރާ ކަމަށާއި، ފިޒަރގެ ވެކްސިންގެ އުއްމީދު ބޮޑު ކަމަށް ޑަބްލިއުއެޗްއޯއިން ބުނެފިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ޗީފް ޓެޑްރޯސް އަދަނޯމް ގެބްރިއޭސަސް ވިދާޅުވީ މި އަހަރު ނިމުމުގެ ކުރިން ވެކްސިނެއް ލިބޭނެ ކަމުގެ އުއްމީދު އެބައޮތް ކަމަށެވެ. އެގޮތުން އެމެރިކާގެ ފިޒަރ ކުންފުނީގެ ވެކްސިންގެ އިތުރުން، އިތުރު ވެކްސިންތަކެއް ވެސް ލިބޭނެ ކަމުގެ އުއްމީދު ބޮޑު ކަމަށް ވިދާޅުވިއެވެ.
ޑަބްލިއުއެޗްއޯގެ އެފްރިކާގެ ރީޖަނަލް ޑިރެކްޓަރ މަޓްޝިޑިސޯ މޮއިޓީ ވެސް ވަނީ މި މޭރުމުން ވާހަކަދައްކަވާފައެވެ. އަދި ވިދާޅުވީ ވެކްސިނެއް އުފެއްދުމުން އެފްރިކާ ބައްރަށް ވެސް ބޭނުންވާ ވެކްސިން ލިބިގެންދާނެ ކަމަށެވެ.
ސައިންސްވެރިން ބުނެފައި ވަނީ ފިޒާ އަދި ބައޯންޓެކްގެ ވެކްސިން 90 އިންސައްތަ ރައްކާތެރި ކަމަށް ދައްކާ ކަމަށެވެ. ރިޕޯޓްތައް ބުނާ ގޮތުން ފިޒާ އަދި ބައޯންޓެކްގެ ވެކްސިން 43،500 މީހުންގެ ގަޔަށް ޖަހާ ޓެސްޓުކޮށްފައިވާއިރު މިހާތަނަށް މި ވެކްސިންގެ ރައްކާތެރިކަމާ މެދު އެއްވެސް ކަހަލަ ޝަކުވާއެއް ލިބިފައި ނުވެއެވެ. އަދި މި ވެކްސިން ޖެހި މީހުންގެ ދިފާއީ ނިޒާމުގައި ކޮވިޑާއި ދެކޮޅަށް މަސައްކަތް ކުރާކަން ފާހަގަވެފައިވާ ކަމަށް ސައިންސްވެރިން ބުނެއެވެ.
ފިޒާ އަދި ބައޯންޓެކްއިން އަންނަނީ މި ވެކްސިން ބޭނުން ކުރުމުގެ އެމަރޖެންސީ ހުއްދައަށް އަންނަ މަހު އެދުމަށް މަސައްކަތް ކުރަމުންނެވެ. ޖަރުމަނުގެ ބައޯންޓެކްއިން އުފައްދާ ވެކްސިން އަދި އެމެރިކާގެ ނިއުޔޯކްގެ ފިޒާ ކޮމްޕެނީއިން އުފައްދާ ވެކްސިން އިނގިރޭސިވިލާތުގެ މެޑިސިންސް އެންޑް ހެލްތުކެއަރ ރެގިއުލޭޓަރީ އެޖެންސީ (އެމްއެޗްއާރުއޭ) އިން އަންނަނީ ވެކްސިން ރިވިއުކުރުމުގެ މަސައްކަތް ކުރަމުންނެވެ.
މި ރިވިއުގެ ތެރޭގައި އެމްއެޗްއާރުއޭއަށް ކްލިނިކަލް ޑާޓާތައް ވަގުތުން ބަލާލެވޭނެއެވެ. މިކަންކަމަށް ބެލުމަށްފަހު ވެކްސިން ބޭނުންކުރުމުގެ ހުއްދަދިނުމުގެ ކަންކަން އަވަސްކުރެވިގެންދާނެއެވެ. މިއީ ޕަބްލިކް ހެލްތު އެމަރޖެންސީގައި ބޭނުންވާ ޑްރަގްސް އާއި ވެކްސިންގެ ކަންކަން އަވަސްކުރުމަށް ކުރާކަމެކެވެ.
