އިންޑިއާ އާއި ރާއްޖެ ގުޅިގެން ކުރަމުންދާ މަސައްކަތްތައް ދާގޮތް ރިވިއުކޮށްފި

ފޮރިން ސެކްރެޓަރީ ހަރްޝް ޝްރިންގްލާ މިވަގުތު ރާއްޖެއަށް ކުރައްވަމުނެ ގެންދަވާ ދަތުރުފުޅުގެ ތެރެއިން ދިވެހިރާއްޖޭގެ މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ މުޙައްމަދު އަސްލަމް އާއި، މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޒް އިސްމާއިލް އާއި މިނިސްޓަރ އޮފް ފިނޭންސް އިބްރާހިމް އަމީރުއާއި އެކުގައި ބައްދަލުކުރައްވާ، އިންޑިއާ އާއި ދިވެހިރާއްޖޭގެ މެދުގައިވާ ތަރައްގީގެ ބައިވެރިކަމާއި، ދެގައުމު ގުޅިގެން ކުރަމުންދާ މަސައްކަތްތައް ދާގޮތް ބައްލަވާ ރިވިއުކުރައްވައިފިއެވެ.

މިނިސްޓަރުންނާއި އެކު ބޭއްވުނު މި ބައްދަލުވުމާ ގުޅޭ ގޮތުން ރާއްޖޭގައި ހުންނަ އިންޑިއާ އެމްބަސީން ބުނީ އިންޑިއާގެ 1.3 ބިލިއަން ޑޮލަރުގެ ލައިން އޮފް ކްރެޑިޓްގެ ދަށުން ކުރިއަށް ގެންދެވޭ 8 މަޝްރޫއުއާއި ބެހޭގޮތުން މަޝްވަރާ ކޮށްފައިވާ ކަމަށެވެ. މި މަޝްރޫއުތަށް ބާރު ސްޕީޑުގައި ކުރިއަށް ގެންދިއުމުގައި މިނިސްޓްރީތަކުން ކުރަމުން ގެންދާ އަގުހުރި އެހާމެ މުހިންމު މަސައްކަތްތައް ފޮރިން ސެކްރެޓަރީ ފާހަގަކުރެއްވި ކަމަށެވެ. އަދި ކުރިއަށް އޮތް ދެމަސް ދުވަހުގެ ތެރޭގައި ލައިން އޮފް ކްރެޑިޓްގެ ދަށުން ކުރިއަށް ގެންދެވޭ 4-5 މަޝްރޫއުއެއްގެ އިފްތިތާހު ކުރެވޭނެކަން ފާހަގަ ކުރެއްވި ކަމަށް އެމްބަސީން ބުނެއެވެ.

Advertisement

ފޮރިން ސެކްރެޓަރީ ޝްރިންގްލާ ވަނީ ރާއްޖޭގެ ކުރީގެ ރައީސް މައުމޫނު އަބްދުލް ގައްޔޫމްގެ އަރިހަށް އިހްތިރާމްގެ ޒިޔާރަތެއް ކުރައްވާފައެވެ. މި ބައްދަލުވުމުގައި ފޮރިން ސެކްރެޓަރީ ވަނީ އިންޑިއާ އާއި ރާއްޖޭގެ މެދުގައިވާ ގުޅުމުގެ ބިންގާ ވަރުގަދަކުރުމަށް އެމަނިކުފާނު ކޮށްދެއްވި އަގުހުރި މަސައްކަތްޕުޅު ފާހަގަކުރައްވާފައެވެ. އަދި ރައީސް މައުމޫނާއި އެމަނިކުފާނުގެ އާއިލާއަށް ހެޔޮއެދުންތައް އަރިސްކުރެއްވިއެވެ.

މިނިސްޓަރ އޮފް ހޯމް އެފެއާޒް އަދި ކޯލިޝަންގައި ހިމެނޭ އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އާއި ބައްދަލުކުރައްވާ، ފޮރިން ސެކްރެޓަރީ ވަނީ ރާއްޖެއާއި އިންޑިއާގެ މެދުގައިވާ ގާތް ގުޅުން ކުރިއެރުވުމަށް، ސަރުކާރު ހިންގާ ކޯލިޝަންގެ މެމްބަރެއްގެ ހައިސިއްޔަތުން އަދާލަތު ޕާޓީ ކުރަމުންގެންދާ މަސައްކަތް ފާހަގަ ކުރައްވާފައެވެ. މީގެ އިތުރުން ސެކްރެޓަރީ ވަނީ ޖުމްހޫރީ ޕާޓީގެ ރައީސް ގާސިމް އިބްރާހީމާއި ބައްދަލުކުރައްވާ، ރާއްޖޭގެ އިގްތިސާދީ ރިކަވަރީ އާއި ގުޅޭ ގޮތުން މަޝްވަރާ ކުރައްވާފައެވެ.

މީގެ އިތުރުން ފޮރިން ސެކްރެޓަރީ ވަނީ އޮޕޮޒިޝަން ޕްރޮގްރެސިވް ކޯލިޝަންގެ އިސްވެރިންނާއި ބައްދަލުކުރައްވާފައެވެ. މި ބައްދަލުވުމުގެ ސަބަބުން ރާއްޖެ އާއި އިންޑިއާ އިން ޑިމޮކްރެސީގެ އުސޫލުތަކަށްދޭ އަހައްމިއްޔަތާއި، ދެގައުމުގެ މެދުގައިވާ ޒަމާންވީ ގުޅުމުގެ ބަދަހިކަން ސާބިތުވެގެންދެއެވެ.

ރާއްޖެއާއި އިންޑިއާގެ މެދުގައި ވާ ގާތް ގުޅުމަކީ މުއްސަންދި ތާރީޚެއް ލިބިގެންވާ، އިންޑިއާ އިން ވަރަށް ބޮޑު އަހައްމިއްޔަތު ކަމެއްދޭ ގުޅުމެކެވެ. ފޮރިން ސެކްރެޓަރީގެ މި ދަތުރުފުޅުގެ ސަބަބުން ދެ ގައުމުގެ މެދުގައިވާ ގުޅުން ވަނީ އިތުރަށް ބަދަހިވެގެންގޮސްފައެވެ.