ގދ. ފަރެސްމާތޮޑާ އެއަރޕޯޓު ތަރައްގީ ކުރަން މިނިސްޓްރީ އޮފް ނެޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރއިން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލު ކޮށްފިއެވެ.
ޕްލޭނިންގ މިނިސްޓްރީއިން އެމްޓީސީއާއެކު މި އެއްބަސްވުންތަކުގައި ސޮއި ކޮށްފައިވަނީ އަންގާރަ ދުވަހު ބޭއްވި ރަސްމިއްޔާތެއްގެ ތެރެއިންނެވެ. މި މަޝްރޫއުގެ ދަށުން 1200 މީޓަރުގެ ރަންވޭއެއް އެޅުމާއެކު ޓަރމިނަލް އިމާރާތް ހެދުމަށްވެސް ވަނީ ހަމަޖެހިފައެވެ. ޕްލޭނިންގ މިނިސްޓްރީއިން ބުނީ މި މަޝްރޫއު އަކީ 144 މިލިއަން ރުފިޔާގެ މަޝްރޫއެއް ކަމަށާ މި މަޝްރޫއު ނިންމުމަށް ހަމަޖެހިފައިވަނީ 600 ދުވަހުގެ ތެރޭގައި ކަމަށެވެ.
މި ރަސްމިއްޔާތުގައި އިތުރު 6 ރަށެއްގެ ބިިން ހިއްކުމާއި، 3 ރަށެއްގެ ބަނދަރު ތަރައްގީ ކުރުމުގެ މަޝްރޫއު ވެސް އެމްޓީސީސީއާ ވަނީ ހަވާލުކޮށްފައެވެ.
މި އެއްބަސްވުންތަކުގައި މިނިސްޓްރީ އޮފް ނެޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ ޢާދަމް އާޒިމްއެވެ.
