މައްސަލައަށް ބަހުސް ކުރަން ފެންނަ ކަމަށް 35 މެމްބަރުން ވޯޓުދެއްވި
ކުޑަހުވަދޫ ދާއިރާގެ މެމްބަރ އަހުމަދު އާމިރު
ކަނޑިންމަ ރިސޯޓްގެ މުވައްޒަފަކު ކޮވިޑް-19 ޖެހިގެން ނިޔާވި މައްސަލަޔާއި ގުޅިގެން ހުށައެޅި ކުއްލި މައްސަލައިގެ ބަހުސް ފަށައިިފިއެވެ.
އަންގާރަ ދުވަހުގެ ޖަލްސާގައި ދ މާއެނބޫދޫ އާދަމް ނަސީރު ނިޔާވި މައްސަލައިގައި މަޖިލީހަށް ކުއްލި މައްސަލަ ހުށަހެޅުއްވީ ކުޑަހުވަދޫ ދާއިރާގެ މެމްބަރ އަހުމަދު އާމިރު އެވެ.
ކުއްލި މައްސަލަ ހުށައަޅުއްވަމުން އާމިރު ވިދާޅުވީ އާދަމް ނަސީރުގެ ބަލި ހާލަތު ގޯސްވެ، އެ ރިސޯޓުން އެކަށީގެންވާ ފަރުވާއެއް ލިބެން ނެތުމުން، ފަރުވާ ހޯދުމަށް ރިސޯޓުން ފުރައިގެން ދިއުމުގެ ހުއްދަށް އެދުމުން ރިސޯޓުގެ މެނޭޖްމެންޓުން އެކަމަށް އިޖާބަ ދީފައިނުވާ ކަމަށެވެ.
ނަތީޖާ އެއްގެ ގޮތުން އޭނާގެ ބަލި ހާލަތު ގޯސްވެ، އޮކްޓޯބަރު މަހުގެ 30 ވަނަ ދުވަހު، ދ. އަތޮޅު ހޮސްޕިޓަލުގައި ފަރުވާ ހޯދަމުންދަނިކޮށް ނިޔާވެފައިވާއިރު މި މައްސަލައާއި ގުޅިގެން ލިބެން ހުރި މައުލޫމާތުތަކުން ކަނޑިންމަ ރިސޯޓުގެ މެނޭޖްމެންޓުގެ އިހުމާލު ވަރަށް ބޮޑުކަން އެނގިގެންދާކަމަށް އާމިރު ވިދާޅުވިއެވެ.
މި މައްސަލަ ސަރުކާރުގެ ކަމާ ގުޅުން ހުރި އިދާރާތަކުގެ ސަމާލުކަމަށް ގެނައުމަށް ހުށައެޅި ކުއްލި މައްސަލައަށް ބަހުސް ކުރަން ފެންނަ ކަމަށް 35 މެމްބަރުން ވޯޓުދެއްވި އެވެ.
ކަނޑިންމަ ރިސޯޓުގެ މުވައްޒަފު ކޮވިޑް-19 އާއި ގުޅިގެން ނިޔާވެފައިވާއިރު އެކަމުގައި ރިސޯޓްގެ އިހުމާލުތަކެއް އުޅޭކަމަށް އޭނާގެ އާއިލާއިން ބުންޏެވެ. އެގޮތުން އާދަމް ނަސީރު ތަކުރާރުކޮށް ޑޮކްޓަރަށް ދައްކަން ދިޔުމަށް އެދުމުންވެސް އެފުރުސަތު ދީފައިނުވާކަމަށް އާއިލާއިން ބުންޏެވެ.
މިކަމާއި ގުޅިގެން އެޗްއީއޯސީގައި ބޭއްވި ނޫސްވެރިންގެ ބައްދަލުވުމެއްގައި ޑރ. ނަޒްލާ ރަފީޤު ވިދާޅުވެފައިވަނީ މި ކޭސްގައި އާދަމް ނަސީރުގެ ހިސްޓްރީގެ މައުލޫމާތު ދީފައިވަނީ އެކި ފަހަރު އެކިގޮތަށް ކަމަށެވެ. އަދި މިކަމުގައި އިތުރަށް ބަލަންޖެހޭ ކަންކަން ހުރުމުން ފުލުހުން ދަނީ މި މައްސަލަ އިތުރަށް ބަލަމުންނެވެ.
