ޕްރިމިއާ ލީގުގައި ފަސް ކުޅުންތެރިން ބަދަލުކުރެވޭ ގޮތަށް ހެދުމަށް ގާޑިއޯލާ އާއި ކްލޮޕް ގޮވާލައިފި
9 ނޮވެމްބަރު 2020 | ހޯމަ 12:34މިދިޔަ ސީޒަނުގެ ޕްރިމިއާ ލީގުގައި ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރި
ސިޓީ އާއި ލިވަޕޫލް ބައްދަލުކުރި މެޗުގެ ތެރެއިން ޕެޕް ގާޑިއޯލާ އާއި ޔާގެން ކްލޮޕް
މި ސީޒަނުގެ އިނގިރޭސި ޕްރިމިއާ ލީގުގައި ފަސް ކުޅުންތެރިން ބަދަލުކުރެވޭ ގޮތަށް ހެދުމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ އާއި ލިވަޕޫލުގެ ކޯޗު ޔާގެން ކްލޮޕް ގޮވާލައިފިއެވެ.
މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދު އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފާސްކޮށްފައިވަނީ ކޮވިޑް-19 އަށްފަހު ފުޓްބޯޅަ އަލުން ފެށުމުގެ ގޮތުން ފީފާއިން ހުށަހެޅުމުންނެވެ. މި ބަދަލު ގެންނަން އައިފެބުން ފާސްކުރީ ކުޅުންތެރިންނަށް ލިބޭ ވަރުބަލިކަމާއި، އަނިޔާތައް މަދުކުރުމުގެ ގޮތުންނެވެ. އެކަމަކު މި ކަމުގައި އެންމެ ފަހު ގޮތްތަކެއް ނިންމާނީ ލީގުތަކުގެ ބޯޑުންނެވެ.
އެގޮތުން ކޮވިޑް-19 ގެ ބްރޭކަށްފަހު މިދިޔަ ސީޒަނުގެ ޕްރިމިއާ ލީގު އަލުން ފެށިއިރު، ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރިއެވެ. އެކަމަކު މި ސީޒަނުގައި އެ ގަވާއިދަށް އަމަލުނުކުރަން ވަނީ ނިންމާފައެވެ.
ޕްރިމިއާ ލީގުގައި ހޮނިހިރު ދުވަހުގެރޭ ސިޓީ އާއި ލިވަޕޫލް އެއްވަރުވި މެޗަށްފަހު ގާޑިއޯލާ ބުނީ މެޗު ނިމުމާއެކު ކްލޮޕް އޭނާއާއެކު ފަސް ކުޅުންތެރިން ބަދަލުކުރެވޭ ގޮތަށް ހެދުމަށް އެކުގައި މަސައްކަތް ކުރުމަށް އޭނާއާއެކު މަޝްވަރާ ކުރި ކަމަށެވެ. މި ސީޒަނުގައި ގާތް ގާތުގައި ގިނަ މެޗުތަކެއް ކުޅެން ޖެހިފައިވުމާއެކު އެކަމުގެ އަސަރު ކުޅުންތެރިންނަށް ވަރަށް ބޮޑަށް ކޮށްފައިވާ ކަމަށާއި، އެގޮތުން ހޮނިހިރު ދުވަހުގެރޭ ކުޅުނު މެޗުގައި ލިވަޕޫލުގެ ޑިފެންޑަރު ޓްރެންޓް އަލެކްސަންޑަ-އާނޯލްޑަށް އަނިޔާވިއިރު، އެއީ އިންގްލެންޑަށްވެސް ލިބިގެންދިޔަ ބޮޑު ގެއްލުމެއް ކަމަށް ގާޑިއޯލާ ވަނީ ބުނެފައެވެ. އެހެންކަމުން ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރުމަށް އެންމެ އެކުގައި މަސައްކަތް ކުރުމަށް ގާޑިއޯލާ ވަނީ ގޮވާލާފައެވެ.
މި މެޗަށްފަހު ކްލޮޕް ވަނީ ޕްރިމިއާ ލީގުގެ ސީއީއޯ ރިޗާޑް މާސްޓާސްއަށް ފާޑު ކިޔާފައެވެ. އެގޮތުން މި ދަނޑިވަޅުގައި ތިން ކުޅުންތެރިން ބަދަލުކުރެވޭ ގޮތަށް ހެދުމުން އެކަމުގެ ފައިދާ އެއްވެސް ބަޔަކަށް ނުކުރާ ކަމަށާއި، ފަސް ކުޅުންތެރިން ބަދަލުކުރެވޭ ގަވާއިދަށް އަމަލުނުކުރަނީ ރިޗާޑް މާސްޓާސް އިހުމާލުން ކަމަށްވެސް ކްލޮޕް ވަނީ ބުނެފައެވެ.
މީގެ ކުރިންވެސް ކްލޮޕް ވަނީ ތިން ކުޅުންތެރިން ބަދަލުކުރާ ގޮތަށް ހެދުމުން ކަންބޮޑުވުން ފާޅުކޮށްފައެވެ. އެގޮތުން މީގެ ކުރިން ކްލޮޕް ބުނީ އޭނާ ކަންބޮޑުވަނީ ކުޅުންތެރިންނާ މެދު ކަމަށާއި، ޔޫރަޕުގެ އެހެން ހުރިހާ ލީގެއްގައި އެ ގަވާއިދަށް އަމަލުކުރާއިރު، ޕްރިމިއާ ލީގުގައި އެ ގަވާއިދަށް އަމަލުނުކުރަންވީ ސަބަބެއް ނެތް ކަމަށެވެ.
ޔޫރަޕުގެ ގަދަ ފަސް ލީގުގެ ތެރެއިން ފަސް ކުޅުންތެރިން ބަދަލުކުރެވޭ ގޮތަށް އަމަލުނުކުރާ ހަމައެކަނި ލީގަކީ ޕްރިމިއާ ލީގެވެ. މީގެ އިތުރުން ޔުއެފާގެ މުބާރާތްތަކުގައިވެސް ފަސް ކުޅުންތެރިން ބަދަލުކުރެވޭ ގަވާއިދަށް އަންނަނީ އަމަލުކުރަމުންނެވެ.
