ވާދަވެރި ޑޯޓްމުންޑް ބަލިކޮށް ބަޔާން އެއްވަނައަށް

ވާދަވެރި ބޮރޫޝިއާ ޑޯޓްމުންޑް ބަލިކޮށް ޖަރުމަން ލީގުގެ އެއްވަނައަށް އެންމެ ފަހުގެ ޗެމްޕިއަން ބަޔާން މިއުނިކް ޖެހިލައިފިއެވެ.

ރަށުން ބޭރުގައި ކުޅުނު މި މެޗުން ބަޔާން މޮޅުވީ 3-2 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ 24 ވަނަ މިނެޓުގައި ބަޔާނުގެ ފޯވާޑް ރޮބަޓް ލެވަންޑޯސްކީ ލަނޑެއް ކާމިޔާބުކުރި ނަމަވެސް، އޭނާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގަނެފައެއް ނުވެއެވެ. އެހެންކަމުން މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޑޯޓްމުންޑުންނެވެ. އެގޮތުން ފުރަތަމަ ހާފުގެ ފަހު މިނެޓުގައި މާކޯ ރެއުސް ވަނީ ޑޯޓްމުންޑަށް ލީޑު ނަގައިދީފައެވެ. އެކަމަކު ފުރަތަމަ ހާފު ނިމުމުގެ ކުރިން އިތުރު ވަގުތުގެ ތެރޭގައި ޑޭވިޑް އަލަބާ ވަނީ ބަޔާނަށް ނަތީޖާ އެއްވަރުކޮށްދީފައެވެ.

އަދި ދެވަނަ ހާފު ފަށައިގެން ދެވަނަ މިނެޓުގައި ބަޔާނުން ވަނީ މެޗުގައި ލީޑު ނަގާފައެވެ. ލޫކަސް ހެނާންޑެޒް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ލެވަންޑޯސްކީއެވެ. މިއީ މި ސީޒަނުގެ ޖަރުމަން ލީގުގައި ކުޅުނު ހަ މެޗުން ލެވަންޑޯސްކީ ކާމިޔާބުކުރި 11 ވަނަ ލަނޑެވެ. އަދި މިއީ އޭނާގެ ކުރިން ކުޅުނު ޑޯޓްމުންޑް ކޮޅަށް ޖެހި 17 ވަނަ ލަނޑެވެ.

ލެވަންޑޯސްކީގެ ލަނޑުން ބަޔާނުން މެޗުގައި ލީޑު ނެގިއިރު، އެ ޓީމުން ލީޑު ފުޅާކޮށްފައިވަނީ މެޗުގެ 80 ވަނަ މިނެޓުގައި ލެރޯއީ ސާނޭ ކާމިޔާބުކުރި ލަނޑުންނެވެ. އެކަމަކު އޭގެ ތިން މިނެޓު ފަހުން އާލިން ހާލާންޑް ވަނީ ޑޯޓްމުންޑަށް ފަރަގު ކުޑަކޮށްދީފައެވެ.

މި މޮޅާއެކު ބަޔާން އެއްވަނައަށް ޖެހިލީ ކުޅުނު ހަތް މެޗުން 18 ޕޮއިންޓް ހޯދައިގެންނެވެ. ކުރިން އެއްވަނައިގައި އޮތް އާރްބީ ލެއިޕްޒީގް ދެވަނައިގައި އޮތީ ހަތް މެޗުން 16 ޕޮއިންޓް ހޯދައިގެންނެވެ. އަދި ބަޔާން އަތުން ބަލިވި ޑޯޓްމަންޑް އޮތީ ހަތް މެޗުން 15 ޕޮއިންޓާއެކު ތިންވަނައިގައެވެ.