ފުވައްމުލައް ސިޓީގައި ''ރަށިރިހިވޭލި އެގްޒިބިޝަން 2020" ބާއްވަން ނިންމައިފި
އެގްޒިބިޝަން އޮތީ މިމަހުގެ 12 ގައި
ފުވައްމުލައް ސިޓީ، މިއީ އަމިއްލައަށް ތަކެތި އުފައްދާ ފަރާތަކަށް ޚާއްސަކޮށްގެން ބާއްވާ އެގްޒިބިޝަނެއް
އަމިއްލައަށް ތަކެތި އުފައްދާ ފަރާތަކަށް ޚާއްސަކޮށްގެން ފުވައްމުލައް ސިޓީގައި ''ރަށިރިހިވޭލި އެގްޒިބިޝަން 2020" ބާއްވަން ނިންމައިފިއެވެ.
ފުވައްމުލައް ކައުންސިލުން ބުނީ ޖުމްހޫރީ ދުވަހާއި ގުޅިގެން 12 ނޮވެމްބަރ 2020 ވަނަ ދުވަހު ބޭއްވުމަށް ހަމަޖެހިފައިވާ މައުރަޒުގައި އަމިއްލަ ތަކެތި އުފައްދާ ފަރާތްތަކުން އެތަކެތި މާކެޓް ކުރުމަށްޓަކައި ބާއްވާ އެގްޒިބިޝަންގައި ބައިވެރިވުމުގެ ފުރުސަތު އާންމުކޮށް ހުޅުވާލެވިފައިވާ ކަމަށެވެ.
ކައުންސިލުން ބުނީ މިއެގްޒިބިޝަންގައި ކާބޯތަކެތީގެ ބާވަތްތަކުގެ އިތުރުން ފުވައްމުލަކުގެ ކޮންމެ އުފެއްދުއް ވެސް ބައިވެރިކުރެވޭނެ ކަމަށެވެ.
މިމައުރަޒުގެ މަގުސަދަކީ ފުވައްމުލަކަށް ޒިޔާރަތްކުރާ ފަރާތްތަކަށާއި ފުވައްމުލަކުގެ ރައްޔިތުންނަށް ފުވައްމުލަކުން ލިބެން ހުރި ޚިދުމަތްތަކާއި އުފެއްދުންތައް މާކެޓްކޮށް ވިޔަފާރީގެ ފުރުސަތުތައް ފަހިކޮށްދިނުމާއިއެކު އެއްތަނަކުން ޚިދުމަތްތަކާއި އުފެއްދުންތަކުގެ މައުލޫމާތު ފޯރުކޮށްދިނުން ކަމަށް ކައުންސިލުން ބުނެއެވެ.
ކައުންސިލުން ބުނީ މިއެގްޒިބިޝަންގައި ބައިވެރިވުމަށް ޝައުގުވެރިވާ ފަރާތްތަކުން 08 ނޮވެމްބަރ 2020 ވަނަ ދުވަހުގެ މެންދުރު 12:00 ގެ ކުރިން ނަމާއި ގުޅޭނެ ފޯނު ނަންބަރާއި އެކު 7487900 އަށް މެސެޖް ކުރުމަށް އެދޭ ކަމަށެވެ.
