ޤާނޫނަށް ހުށަހެޅި އިސްލާހުތަކާއެކު ކުޅިވަރުގެ ކަންކަން ދެފުށް ފެންނަ ގޮތަށް ހިންގޭނެ: ރައީސް ނަޝީދު

ކުޅިވަރުގެ ޤާނޫނަށް ހުށަހެޅި އިސްލާހުތަކާއެކު ކުޅިވަރު މުއައްސަސާތަށް ދެފުށް ފެންނަ ގޮތަށް ހިންގޭނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

2015 ވަނަ އަހަރު އެކުލަވާލެވުނު ކުޅިވަރުގެ ޤާނޫނަށް ގިނަ އިސްލާހުތަކެއް ހުށަހެޅުއްވީ އެމްޑީޕީގެ ޗެއާޕަސަން އަދި ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފެވެ. ހަސަން ލަތީފް ހުށަހެޅުއްވި އިސްލާހުތަކުގެ ތެރޭގައި ކުޅިވަރާ ބެހޭ ގައުމީ މަޖިލީހާއި، ސްޕޯޓްސް ކޮމިޝަނާއި، ސްޕޯޓްސް ކޯޕަރޭޝަނާއި، ސްޕޯޓްސް އިނިސްޓިއުޓް އަދި ކުޅިވަރު އެސޯސިއޭޝަންތަކާއި ގުޅޭ ގިނަ ކަންކަން ހިމެނެއެވެ. އަދި ކުޅިވަރާ ބެހޭ ވަޒީރުގެ މަސްއޫލިއްޔަތުތަކާއި، ބާރުތަކާ ގުޅޭ ގޮތުންވެސް އިސްލާހުތަކެއް ވަނީ ހުށަހަޅުއްވާފައެވެ. އަދި ކުޅިވަރާ ބެހޭ ގައުމީ މަޖިލީހުގެ އިންތިޚާބާއި، ކުޅިވަރު އެސޯސިއޭޝަންތަކުގެ އިންތިޚާބުތައް ދެން ބާއްވާނީ އިލެކްޝަން ކޮމިޝަނުން ކަމަށްވެސް މި އިސްލާހުގައި ވަނީ ހިމަނާފައެވެ.

މިކަމާ ގުޅިގެން ކުރެއްވި ޓްވީޓެއްގައި ރައީސް ނަޝީދު ވިދާޅުވީ ކުޅިވަރު މުއައްސަސާތައް ޑެމޮކްރަޓައިޒްކޮށް، ދެފުށް ފެންނަ ގޮތަށް ހިންގުމަކީ އެމްޑީޕީގެ ވިސްނުން ކަމަށެވެ. އަދި ކުޅިވަރާއި، ކުޅިވަރުގެ ވަސީލަތްތައް ދެމެހެއްޓެނިވި ގޮތަކަށް ބެލެހެއްޓޭނެ ނިޒާމެއް އޮތުން ބޭނުންތެރި ކަމަށާއި، ހަސަން ލަތީފް ހުށަހެޅުއްވި ބިލުން އެކަަންކަން ހާސިލުވާނެ ކަމަށްވެސް ވިދާޅުވިއެވެ.

ކުޅިވަރުގެ ޤާނޫނަށް ހަސަން ލަތީފް އިސްލާހު ހުށަހެޅުއްވިއިރު، ކުޅިވަރުގެ ޤާނޫނު އިސްލާހުކުރަން ސަރުކާރުން ވައުދުވީ މިދިޔަ އަހަރުއެވެ. މީގެ ކުރިން ހަސަން ލަތީފް ވިދާޅުވީ ސަރުކާރުން ކުޅިވަރުގެ ޤާނޫނު އިސްލާހުކުރަން ވައުދުވެ، އެކަން ކުރަން ނިންމީ އެކަންކަމަށް އޮތް ފާޑުކިޔުން ހުއްޓުވުމަށް ކަމަށާއި، ކުޅިވަރުގެ ޤާނޫނު އިސްލާހުކުރެވުމުން ފަސޭހަކަމާއެކު ކުޅިވަރުގެ ކަންކަން ކުރެވޭނެ ގޮތް އޮތް ނަމަވެސް، މި އަހަރު ނިމިގެންދާއިރުވެސް މިދިޔަ އަހަރު ކުރަން ބުނެފައިވާ ކަމެއް ނުވެ އޮތުމަކީ ވަރަށް ކަންބޮޑުވާ ކަމެއް ކަމަށެވެ.

އަދި 2015 ވަނަ އަހަރު ފާސްކޮށްފައިވާ ކުޅިވަރުގެ ޤާނޫނުގައި ބުނެފައިވާ ގޮތުން ޤާނޫނުގެ ދަށުން އަމަލުކުރަންޖެހޭ ގަވާއިދުތައް އެއް އަހަރު ދުވަހުގެ ތެރޭގައި ހަދަން ޖެހޭ ކަމަށް ބުނެފައިވާއިރު، ގިނަ ގަވާއިދުތައް އޮތީ ނުހެދި ކަމަށާއި، އެ ގަވާއިދުތައް ނުހަދާ ތިބެނީ އެކަންކަން އެނގިހުރެ ގަސްދުގައި ކަމަށް ހަސަން ލަތީފް ވަނީ ތުހުމަތު ކުރައްވާފައެވެ.