ހެލްތު މިނިސްޓަރަށް ރުހުން ދިނުމުގެ މައްސަލަ ބުދަ ދުވަހުގެ ޖަލްސާއަށް އެޖެންޑާކޮށްފި
27 އޮކްޓޯބަރު 2020 | އަންގާރަ 16:43ކޮމިޓީތަކުން ހުށައަޅާ ކަންކަމުގެ ދަށުން ތިން ކޮމިޓީ ރިޕޯޓެއް ވަނީ އެޖެންޑާކުރެވިފަ
ހެލްތު މިނިސްޓަރ އަހުމަދު ނަސީމަށް މަގާމުގެ ފަތްކޮޅު އެރުވުމަށް ބޭއްވުނު ރަސްމިއްޔާތުގެ ތެރެއިން
ހެލްތު މިނިސްޓަރ އަހުމަދު ނަސީމަށް ރުހުން ދިނުމުގެ މައްސަލަ ބުދަ ދުވަހުގެ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
ހެލްތު މިނިސްޓަރ ނަސީމަށް ރުހުން ދިނުމުގެ މައްސަލަ އެޖެންޑާކޮށްފައިވާ އިރު، ބުދަ ދުވަހުގެ ޖަލްސާގައި މި މައްސަލަ ކަމާ ގުޅޭ ކޮމިޓީއަށް ފޮނުވޭނެއެވެ.
މީގެ އިތުރުން މާލޭގައި ޒުވާނުންނަށް ފަސޭހަކަމާއި އެކު މިއުޒިކް އަޑުއަހާލާ، އެކުވެރިންނާ ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީ ސަމާސާކޮށް މަޖާކޮށްލައި އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް ސަރުކާރަށް ގޮވާލައި ހުށައަޅާ ގަރާރުގެ ފުރަތަމަ ކިއުންވެެސް އިއްވުމަށް އެޖެންޑާކުރެވިފައެވެ. މި ގަރާރު ހުށައަޅުއްވަނީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއެވެ.
ކޮމިޓީތަކުން ހުށައަޅާ ކަންކަމުގެ ދަށުން ތިން ކޮމިޓީ ރިޕޯޓެއް ވަނީ އެޖެންޑާކުރެވިފައެވެ. އޭގެ ތެރޭގައި މޯލްޑިވްސް ބްރޯޑްކާސްޓިންގް ކޮމިޝަން (ބްރޯޑްކޮމް) ގެ މެމްބަރު ކަމުން ޒީނާ ޒާހިރު ވަކި ކުރުމާއި އޮޑިޓަރ ޖެނެރަލްގެ މާލީ ހިސާބުތައް ތައްޔާރު ކުރާނީ ރައްޔިތުންގެ މަޖިލީހުން ކަނޑައަޅާ ނަމޫނާއާ އެއްގޮތްވާ ގޮތުގެ މަތިން ކަމަށް ބަޔާންކޮށްފައިވާތީ އެ މައްސަލަ ދިރާސާކޮށް ތައްޔާރުކޮށްފައިވާ ރިޕޯޓެއްގެ މަސައްކަތް ހިމެނެއެވެ. އަދި އޮޑިޓަރ ޖެނެރަލްގެ އޮފީހުގެ 2021 ވަނަ އަހަރުގެ ބަޖެޓު ދިރާސާކޮށް ނިންމިގޮތުގެ ރިޕޯޓު ވަނީ އެޖެންޑާކުރެވިފައެވެ.
