ލަންކާގައި ކޮވިޑުގެ ހާލަތު ގޯހުން ގޯހަށް، އިތުރު 866 މީހުން ޕޮޒިޓިވް ވެއްޖެ

އަވައްޓެރި ސްރީލަންކާއިން ހުކުރު ދުވަހު 866 މީހުން ޕޮޒިޓިވް ވެެއްޖެއެވެ.

މިއީ މިހާތަނަށް ލަންކާގައި މި ބަލި ފެނުނު ފަހުން އެންމެ ގިނަ އަދަދެއްގެ ބަޔަކު ޕޮޒިޓިވްވީ ދުވަހެވެ. މިއާ އެކު އެ ގައުމުން މި ބަލި ޖެހުނު މީހުންގެ އަދަދު 7153 އަށް އަރާފައެވެ. އަދި އެކްޓިވް ކޭސްގެ އަދަދަކީ 3495 އަށް އަރާފައެވެ.

އެގައުމުގެ ހެލްތް އޮތޯރިޓީން ބުނި ގޮތުގައި ހުކުރު ދުވަހު ޕޮޒިޓިވްވި 865 މީހުންނަކީ މިނުވަންގޮޑާ ކްލަސްޓަރއާ ގުޅުން ހުރި މީހުންނެވެ. މި ވަގުތު ލަންކާގައި މި ބައްޔަށް ފަރުވާ ހޯދަމުން އަންނަ 50 އިންސައްތަ މީހުން ގުޅިފައި ވަނީ މި ކްލަސްޓަރއާއެވެ.

ލަންކާއިން ކުއްލިއަކަށް ކޭސްތައް އިތުރު ވާން ފެށީ، މިނުވަންގޯޑާ ގައި ހުންނަ ގާމެންޓް ފެކްޓްރީ އެއްގައި މަސައްކަތް ކުރާ އުމުުރުން 39 އަހަރުގެ އަންހެނަކާއި އޭނާގެ 16 އަހަރުގެ އަންހެން ދަރިފުޅު މިހިނގާ އޮކްޓޫބަރު މަހުގެ ހަތަރު ވަނަ ދުވަހު ކޮވިޑް-19 އަށް ޕޮޒިޓިވް ވުމާއި ގުޅިގެންނެވެ.