ރަޝްފޯޑުގެ ލަނޑާއެކު ޔުނައިޓެޑުން ޕީއެސްޖީ ބަލިކޮށްފި

ޔުއެފާ ޗެމްޕިއަންސް ލީގުގެ ގްރޫޕް އެޗުގައި އަންގާރަ ދުވަހުގެރޭ ޕީއެސްޖީ އަތުން ފަހު ވަގުތު މެންޗެސްޓާ ޔުނައިޓެޑް މޮޅުވެއްޖެއެވެ.

ޕީއެސްޖީގެ ދަނޑުގައި ކުޅުނު މި މެޗުން ޔުނައިޓެޑް މޮޅުވީ 2-1 ގެ ނަތިޖާއަކުންނެވެ.

މި މެޗުގައި ޔުނައިޓެޑުގެ ކެޕްޓަން ބޭންޑް އަޅައިގެން ކުޅުނީ ބްރޫނޯ ފެނާންޑޭސްއެވެ. މުޅިން އަލަށް ފެނާންޑޭސްއާ ކެޕްޓަން ބޭންޑް ހަވާލުކުރީ އަނިޔާގެ ސަބަބުން ކެޕްޓަން ހެރީ މެގުއާ ޓީމާއެކު ދަތުރު ނުކުރުމުންނެވެ. މެގުއާގެ އިތުރުން މި މެޗަށް އެކުލަވާލި ސްކޮޑުގައި ޔުނައިޓެޑުގެ ޒުވާން ފޯވާޑް މޭސަން ގްރީންވުޑް އަދި ދާދި ފަހުން ޔުނައިޓެޑާ ގުޅުނު ޕީއެސްޖީގެ ކުރީގެ ފޯވާޑް އެޑިންސަން ކަވާނީވެސް ހިމެނިފައެއް ނުވެއެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޔުނައިޓެޑުންނެވެ. މެޗުގެ 24 ވަނަ މިނެޓުގައި ޕެނަލްޓީއަކުން މި ލަނޑު ޔުނައިޓެޑަށް ކާމިޔާބުކޮށްދިނީ ފެނާންޑޭސްއެވެ. މިއީ ޔުނައިޓެޑުގެ އެންތަނީ މާޝިއަލަށް ކުރި ފައުލަކަށް ރެފުރީ ދިން ޕެނަލްޓީއެވެ. އެގޮތުން ފެނާންޑޭސް ފުރަތަމަ ފޮނުވާލި ޕެނަލްޓީ ޕީއެސްޖީގެ ގޯލްކީޕަރު ކޭލޯ ނަވާސް މަތަކުރި ނަމަވެސް، ގޯލުގެ ރޮނގަށްވުރެ ކުރީގައި ނަވާސް ހުރުމުން، ދެވަނަ ފަހަރަށް ޕެނަލްޓީ ޖަހަން ދިނެވެ.

މި މެޗުގައި ޕީއެސްޖީން ނަތީޖާ އެއްވަރުކުރީ ދެވަނަ ހާފު ފަށައިގެން 10 ވަނަ މިނެޓުގައެވެ. މި ލަނޑަކީ ޔުނައިޓެޑުގެ މާޝިއަަލް އަތުން ބައިކޮޅަށް ވަން ލަނޑެވެ. މި މެޗުގައި ޕީއެސްޖީން ގިނަ ހަމަލާތަކެއް އުފެއްދިއިރު، އެ ހަމަލާތަކުގެ ހުރަހަކަށްވީ މެޗުގައި މޮޅު ކުޅުމެއް ދެއްކި ޔުނައިޓެޑުގެ ގޯލްކީޕަރު ޑޭވިޑް ޑެ ހެއާއެވެ.

މެޗު އެއްވަރުވާން ދަނިކޮށް ޔުނައިޓެޑް މި މެޗުން މޮޅުވީ މެޗު ނިމެން ތިން މިނެޓަށް ވެފައިވަނިކޮށް މާކަސް ރަޝްފޯޑް ޖެހި ލަނޑުންނެވެ.

ޗެމްޕިއަންސް ލީގުގެ ގްރޫޕް ސްޓޭޖުގައި ކުޅުނު ފުރަތަމަ މެޗުގައި ޔުނައިޓެޑުން ޕީއެސްޖީ ބަލިކުރިއިރު، އެ ޓީމުން ވަނީ މިދިޔަ ސީޒަނުގެ ނޮކައުޓް ބުރުންވެސް ޕީއެސްޖީ ކަޓުވާލާފައެވެ.

މީގެ އިތުރުން ގްރޫޕް އެޗުގައި އަންގާރަ ދުވަހުގެރޭ އާރްބީ ލެއިޕްޒީގުން ވަނީ އިސްތަންބޫލް ބަޝަކްޝެހީރް އަތުން 2-0 ން މޮޅުވެފައެވެ. އަދި ގްރޫޕް އީގައި ހިމެނޭ ޗެލްސީ އާއި ސެވިއްޔަ ބައްދަލުކުރި މެޗު ނިމުނީ ދެ ޓީމުންކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ.