މެޓަލް ވާރސް މޯލްޑިވްސްއިން ހެވީ މެޓަލް މުބާރާތެއް ބާއްވަނީ

މެޓަލް ވާރސް މޯލްޑިވްސްއިން ހުޅުވާލާއިގެން ރާއްޖޭގެ މެޓަލް ބޭންޑްތަކަށް ހެވީ މެޓަލް މުބާރާތެއް ބާއްވަން ނިންމާފިއެވެ.

މެޓަލް ވާރސް މޯލްޑިވްސްއިން ބުނީ މި މުބާރާތް ބާއްވަން ނިންމީ ދިވެހި ހެވީ މެޓަލް އައު ލަވަތަކެއް ނެރުމުގެ މަގުސަދުގައި ކަމަށާއި، މި މުބާރާތުގައި މިހާތަނަށް 7 ބޭންޑަކުން ބައިވެރިވެފައިވާ ކަމަށެވެ.

މި މުބާރާތް ކާމިޔާބުކުރާ ބޭންޑަކަށް 38،000 ރުފިޔާގެ އިނާމެއް ދޭން ނިންމާފައިވާ ކަމަށާއި، އޭގެ ތެރޭގައި ތިން މަސް ދުވަހަށް ފަރިތަކުރުންތައް ކުރިޔަށް ގެންދިޔުމަށް ސްޓޫޑިއޯ އެއް ދިނުމާއި، ޕްރޮފެޝަނަލީ މެޓަލް ލަވަތައް ރެކޯޑް ކުރުމުގެ ފުރުސަތު ދިނުމުގެ އިތުރުން ލައިވް ޝޯވ އެއް ހުށަހެޅުމުގެ ފުރުސަތު ލިބިގެންދާނެ ކަމަށެވެ.

މެޓަލް ވާރސް ވޯލްޑްސްއިން އިތުރަށް ބުނީ މިފަދަ މުބާރާތެއް އިންތިޒާމުކޮށް ކުރިޔަށް ގެންދަނީ މެޓަލް މިއުޒިކް ކުޅެމުން އަންނަ ބޭންޑްތަކުގެ އެއްބާރުލުމާއިއެކުގައި ކަމަށާއި، މި މުބާރާތުގެ ޖަޖުންނަކީ މެޓަލް މިއުޒިކްގައި ފުންނާބު އުސް ފަރާތްތަކެއް ކަމަށެވެ.

މިއީ މިފަދަ މުބާރާތެއް ރާއްޖޭގައި ބާއްވާ ފުރަތަމަ ފަހަރެވެ.