މިހާރު ކުޅެމުން އަންނަ ކުޅުންތެރިންގެ ލަނޑު ލިސްޓުގެ ހަވަނައިގައި ދަގަނޑޭ

މިހާރު ކުޅެމުން އަންނަ ކުޅުންތެރިންގެ ލަނޑު ލިސްޓުގެ ހަވަނައިގައި ރާއްޖޭގެ އަލީ އަޝްފާގު (ދަގަނޑޭ) ހިމެނިއްޖެއެވެ.

މި މަހުގެ 17 ވަނަ ދުވަހާ ހަމައަށް ބެލުމަށްފަހު ހަދާފައިވާ ލިސްޓުން ދަގަނޑޭއަށް ހަވަނަ ލިބުނީ އޭނާގެ ކެރިއަރުގައި ޖެހި 464 ލަނޑާއެކުއެވެ. ދަގަނޑޭ އެ އަދަދަށް ލަނޑު ޖަހާފައިވަނީ ޖުމްލަ 544 މެޗުންނެވެ.

އެގޮތުން ދަގަނޑޭ ވަނީ ކުލަބު ވެލެންސިއާއަށް 104 ލަނޑު، ނިއު ރޭޑިއަންޓް ސްޕޯޓްސް ކުލަބަށް 129 ލަނޑު، ބްރޫނީގެ ޑީޕީއެމްއެމް އެފްސީއަށް 2 ލަނޑު، ވީބީ އައްޑޫ އެފްސީއަށް 93 ލަނޑު، މެލޭޝިއާގެ ޕީޑީއާރުއެމް އެފްއޭއަށް 47 ލަނޑު، މާޒިޔާ ސްޕޯޓްސް އެންޑް ރެކްރިއޭޝަނަށް 8 ލަނޑު، ޓީސީ ސްޕޯޓްސް ކުލަބަށް 16 ލަނޑު، ކުލަބު ގްރީން ސްޓްރީޓްސްއަށް 11 ލަނޑު، ރާއްޖޭގެ ގައުމީ ފުޓްބޯޅަ ޓީމަށް 53 ލަނޑު އަދި 23 އަހަރުން ދަށުގެ ގައުމީ ފުޓްބޯޅަ ޓީމަށް 2 ލަނޑު ޖަހާފައެވެ.

މި ލިސްޓުގެ އެއްވަނައިގައި 760 ލަނޑާއެކު އޮތީ ޕޯޗުގަލުގެ ތަރި ކްރިސްޓިއާނޯ ރޮނާލްޑޯއެވެ. ދެވަނައިގައި 733 ލަނޑާއެކު އާޖެންޓީނާގެ ތަރި ލިއޮނެލް މެސީ އޮތްއިރު، ތިންވަނައިގައި 559 ލަނޑާއެކު އޮތީ ސްވިޑެންގެ ޒްލަޓާން އިބްރަހިމޮވިޗެވެ.

މިހާރު ކުޅެމުން އަންނަ ކުޅުންތެރިންގެ ލަނޑު ލިސްޓުގެ ހަވަނައިގައި ދަގަނޑޭ ހިމެނުނުއިރު، ދާދި ފަހުން އޭނާ ވަނީ މި ވަގުތު ފުޓްބޯޅަ ކުޅޭ ކުޅުންތެރިންގެ ތެރެއިން، މެޗުގެ ނިސްބަތުން ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިންގެ ލިސްޓުގެ ދެވަނަވެސް ހޯދާފައެވެ. އެ ލިސްޓުގެ ދެވަނައިގައި ދަގަނޑޭ އޮތީ ރޮނާލްޑޯ އާއި، މެސީ އަދި ނޭމާ ފަދަ ކުޅުންތެރިން ފަހަތަށް ޖައްސާލުމަށްފަހުއެވެ.

މެޗުގެ ނިސްބަތުން ލަނޑު ލިސްޓުގެ ދެވަނަ ދަގަނޑޭއަށް ލިބޭއިރު، މީގެ ކުރިން 2018 ވަނަ އަހަރުގެ ޖެނުއަރީ މަހު އޭނާ މި ލިސްޓުގެ އެއްވަނައިގައި އޮތެވެ. އެކަމަކު އެ އަހަރުގެ މާޗު މަހުން ފެށިގެން ދަގަނޑޭ ގައުމީ ޓީމުން ސަސްޕެންޑް ކުރުމާ ގުޅިގެން އޭނާއަށް ގިނަ މެޗުތަކެއް ގެއްލުނެވެ. އެ ސަސްޕެންޝަން އުވާލީ މިދިޔަ އަހަރުގެ ސެޕްޓެމްބަރު މަހު ފީފާ ވޯލްޑް ކަޕް އަދި އޭއެފްސީ އޭޝިއަން ކަޕުގެ ޖޮއިންޓް ކޮލިފައިންގައި މާލޭގައި ޗައިނާއާ ދެކޮަޅަށް ކުޅުނު މެޗުންނެވެ.

ދަގަނޑޭ މިހާތަނަށް ގައުމީ ފުޓްބޯޅަ ޓީމަށް 53 ލަނޑު ޖަހާފައިވާއިރު، އޭނާ ގައުމީ ޓީމަށް ކުޅެން ފެށީ 2004 ވަނަ އަހަރެވެ. ގައުމީ ޓީމަށް ކުޅުނު ފުރަތަމަ މެޗުގައި ދަގަނޑޭ ވަނީ 2004 ވަނަ އަހަރު ވޯލްޑް ކަޕް ޕްރީ-ޕްރިމިލަނަރީގައި މާލޭގައި މޮންގޯލިއާއާ ދެކޮޅަށް ކުޅުނު މެޗުގައި ހަތަރު ލަނޑު ޖަހައިގެން އެއް މެޗެއްގައި ގައުމީ ޓީމަށް އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑު ހަދާފައެވެ.

ސާފް ޗެމްޕިއަންޝިޕުގައި މިހާތަނަށް 20 ލަނޑު ޖަހައިގެން އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދާފައިވާ ދަގަނޑޭ ވަނީ ރާއްޖޭގެ މޮޅު ކުޅުންތެރިޔާގެ މަގާމު މިހާތަނަށް ހަ ފަހަރު ހޯދާފައެވެ. ދަގަނޑޭ އަކީ މި އެވޯޑު އެންމެ ގިނައިން ހޯދި ދިވެހި ކުޅުންތެރިޔާއެވެ.

މީގެ އިތުރުން ދަގަނޑޭ އަކީ އޭއެފްސީ ކަޕުގައި އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ހަތްވަނައިގައި އޮތް ކުޅުންތެރިޔާއެވެ. އެއީ ވެލެންސިއާ އާއި، ނިއު ރޭޑިއަންޓް އަދި ވީބީ އައްޑޫ އެފްސީއަށް ޖަހައިދިން 29 ލަނޑާއެކުއެވެ.