ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ އިމަރޖެންސީ ކޯލް ސެންޓަރަށް ދިމާވި ކަރަންޓުގެ މައްސަލަ ހައްލުކޮށް ހިލޭ ގުޅޭ ނަންބަރު 1676 ގެ ޚިދުމަތް އަލުން ފަށައިފިއެވެ.
އެޗްޕީއޭގެ ކޯލް ސެންޓަރަށް ދިމާވި ކަރަންޓުގެ މައްސަލައަކާއި ގުޅިގެން ހިލޭ ގުޅޭ ނަންބަރު 1676 ގެ ޚިދުމަތް މެދުކެނޑިފައިވަނީ އާދިއްތަ ދުވަހުގެ އިރުއޮއްސުނު ވަގުތު ކަމަށެވެ.
ނަމަވެސް މިހާރު އެޗްޕީއޭއިން ވަނީ ހޮޓްލައިންއަށް ދިމާވި މައްސަލަ ހައްލުކޮށް ޚިދުމަތްތައް އަލުން ފަށާފައެވެ.
ކޮވިޑް-19އާ ގުޅިގެން އާންމު ރައްޔިތުންނަށް ޚިދުމަތްތައް ދިނުމަށް އެޗްޕީއޭއިން ވަނީ ހެލްޕްލައިންއެއް ގާއިމްކޮށްފައެވެ. އެގޮތުން މިހޮޓްލައިން މެދުވެރިކޮށް ކޮންމެ ދުވަހަކު ވެސް އެތަކެއް ރައްޔިތުންނަށް ދަނީ އެހީތެރިކަން ފޯރުކޮށްދެމުންނެވެ.
