ދާއިރާގައި ހަރަކާތްތެރިވާ އެންމެން ކޮލިޓީ ސްޓެންޑަރޑް ތަމްރީންވުމަކީ ދެކޭ ހުވަފެނެއް: ޓޫރިޒަމް މިނިސްޓަރ

ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ ކުއަލިޓީ ސްޓޭންޑެޑެއް ޤާއިމްކުރުމުގެ ގޮތުން ކޮމްޕްލަޔަންސް އޮފިސަރ ޓްރެއިނިންގ ޕްރޮގްރާމެއް ހިންގުމަށް ތައްޔާރުވަމުންދާއިރު ދެކޭ ހުވަފެނަކީ މި ދާއިރާގައި ހަރަކާތްތެރިވާ ހުރިހާ ފަރާތްތަކުންވެސް މި ސެޓްފިކެޓް ހާސިލް ކުރުން ކަމަށް މިނިސްޓަރ އޮފް ޓުއަރިޒަމް ޑރ. އަބްދުﷲ މައުސޫމް ވިދާޅުވެއްޖެއެވެ.

މި ޓްރެއިނިންގ ޕްރޮގްރާމް އިފްތިތާޙް ކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ ބައިނަލްއަޤްވާމީ ދުނިޔޭގައި ރާއްޖެއަކީ މަޤްބޫލު މަންޒިލެއް ކަމަށާއި އެހެންނަމަވެސް މި ލިބުނު ފުރުޞަތުގެ އަލީގައި ރާއްޖެއަށް އަންނަ ފަތުރުވެރިންގެ މެދުގައި މިހާރަށް ވުރެ ބޮޑަށް ރާއްޖެއާއި މެދު ދެކޭ ގޮތް ބަދަލު ވެގެންދާނެ ކަމަށެވެ.

ކޮވިޑްގެ މިހާލަތުގައި މިފަދަ ޕްރޮގްރާމެއް ފެށުމަކީ ވަރަށް މުހިއްމު ކަމެއް ކަމަށާއި އަދި މިއީ މުހިއްމު ކަމެއްގެ ފެށުން ކަމަށް މިނިސްޓަރ ވިދާޅުވިއެވެ. އަދި މިއީ ފަތުރުވެރިކަމަށް ދިމާވެފައިވާ ގޮންޖެހުމުން އަރައިގަންނަން ލިބުނު ރަނގަޅު ފުރުޞަތެއް ކަމަށާއި ރިސޯޓް، ގެސްޓްހައުސް އަދި ސަފާރީތަކުންވެސް ބައިނަލްއަޤްވާމީ ފެންވަރެއްގެ ސެޓްފިކެޓެއް ހޯދުމަކީ އެފަރާތްތަކުން ފަތުރުވެރިންނަށް ދެވޭ ޚިދުމަތުގައި އިތުބާރު ދެމެހެއްޓިގެންދާނެ ކަމެއް ކަމަށް ވިދާޅުވިއެވެ.

ފަތުރުވެރިކަމުގެ ޚިދުމަތް ދޭ ތަންތަނުގެ ކުއަލިޓީ ސްޓޭންޑެޓް އޮތުމަކީ ދުނިޔޭގެ ފަތުރުވެރިކަމަށް ރާއްޖެ ހުޅުވާލާއިރު ލިބިގެންދާނެ ވަރަށް ބޮޑު ކުރިއެރުމެއް ކަމަށްވެސް ޑރ. މައުސޫމް ވަނީ ފާހަގަކުރައްވާފައެވެ.

މި ސްޓޭމްޕްގެ ސަބަބުން ޙިދުމަތްދޭ ތަންތަނާއި މެދު ޚިދުމަތް ހޯދާ ފަރާތްތަކުގެ އިތުބާރު ބޮޑުވެގެންދާނެއެވެ. އަދި އެފަދަ ފަރާތްތަކުން ދެވޭ ޚިދުމަތުގައި މައްސަލައެއް އުޅޭ ކަމަށްވާނަމަ އެއިފެކްއަށް، ކޮމްޕްލަޔަންސްގެ ގޮތުގައި ޚިދުމަތް ހޯދާ ފަރާތުން މައްސަލަވެސް ހުށަހެޅޭނެއެވެ.

މި ޓްރެއިނިން ޕްރޮގްރާމްގައި 830 މީހުންނަށް ބައިވެރިވުމުގެ ފުރުޞަތު ހުޅުވާލާފައިވާއިރު އޭގެ ތެރެއިން 630 ޖާގަ ހުސްކޮށްފައިވަނީ ގެސްޓްހައުސްތަކަށެވެ. އަދި ބާކީ 200 ޖާގަ ހުސްކޮށްފައިވަނީ ކައުންސިލްތަކަށެވެ.

މި ޕްރޮގްރާމް ފެށުމަށްޓަކައި ވާން ޖެހޭ ތައްޔާރީތައް އާދިއްތަ ދުވަހުން ފެށިގެން ކުރިއަށްދާނެ ކަމަށް ޓުއަރިޒަމް މިނިސްޓްރީން ވަނީ މައުލޫމާތުދީފައެވެ. އެގޮތުން ކައުންސިލްތަކުންނާއި ގެސްޓްހައުސްތަކުން މިޕްރޮގްރާމްގައި ބައިވެރިވުމަށްޓަކައި އެފަރާތްތަކަށް ދައުވަތު ދެވޭނެ ކަމަށް މިނިސްޓްރީން ބުންޏެވެ. އޮންލައިންކޮށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމް ކުރިއަށްދަނީ އެއިފެކްއާއި ޔުނިވަރސިޓީ އޮފް ޓިއުރިންއާއި އަދި އެމްއެންޔޫ ގުޅިގެންނެވެ.

ކޮންމެ ދުވަހަކު ދެ ގަޑިއިރަށް، ފަސް ދުވަހުގެ މުއްދަތަށް ކުރިއަށްގެންދާ މިޓްރެއިނިން ޕްރޮގްރާމް ފެށުމަށް ގަސްތުކޮށްފައިވަނީ އޮކްޓޯބަރ 20 ވަނަ ދުވަހުއެވެ. މުޅިން ހިލޭ ކުރިއަށް ގެންދާ ޓްރެއިނިން ޕްރޮގްރާމް ނޮވެމްބަރ 2 ގެ ނިޔަލަށް ކުރިއަށްގެންދާ މިޕްރޮގްރާމް ނިމުމުން ބައިވެރިންނަށް އެއިފެކްގެ ސެޓްފިކެޓެއް ލިބޭނެއެވެ.