އިންގްލެންޑަށް މޮޅެއް، ބެލްޖިއަމް އެއްވަރު

ބުރާސްފަތި ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުތަކުން ވެލްސް އަތުން ފަސޭހަކަމާއެކު އިންގްލެންޑް މޮޅުވިއިރު، އައިވަރީ ކޯސްޓާއި ބެލްޖިއަމް އެއްވަރުވެއްޖެއެވެ.

ވެމްބްލީ ސްޓޭޑިއަމުގައި ކުޅުނު މެޗުން ވޭލްސް އަތުން އިންގްލެންޑް މޮޅުވީ 3-0 ގެ ނަތީޖާއަކުންނެވެ.

މި މެޗު ފަށައިގެން 26 ވަނަ މިނެޓުގައި އިންގްލެންޑުން ވަނީ ލީޑު ނަގާފައެވެ. ގައުމީ ޓީމަށް ކުޅުނު ފުރަތަމަ މެޗުގައި މި ލަނޑު އިންގްލެންޑަށް ކާމިޔާބުކޮށްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ޒުވާން ފޯވާޑް ޑޮމިނިކް ކަލްވެޓް-ލެވިނެވެ. މި ލަނޑު އޭނާ ކާމިޔާބުކުރީ ޖެކް ގްރީލިޝް ނަގައިދިން ހުރަހަކުންނެވެ.

މެޗުގައި އިންގްލެންޑުން ލީޑު ފުޅާކޮށްފައިވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. ކިއެރަން ޓްރިޕިއާގެ އެހީއާއެކު މި ލަނޑު ކާމިޔާބުކޮށްދިނީ ކޮނާ ކޯޑީއެވެ. އަދި މެޗުގެ 63 ވަނަ މިނެޓުގައި ޑެނީ އިންގްސް ވަނީ އިންގްލެންޑުގެ ތިންވަނަ ލަނޑު ޖަހާފައެވެ.

މީގެ އިތުރުން ބައިނަލްއަގުވާމީ އެކުވެރިކަމުގެ މެޗެއްގައި ބުރާސްފަތި ދުވަހުގެރޭ ބެލްޖިއަމާއި އައިވަރީ ކޯސްޓް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ބެލްޖިއަމުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން އަށްވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު ބެލްޖިއަމަށް ކާމިޔާބުކޮށްދިނީ މިޝީ ބަޓްޝުއާއީއެވެ. މިއީ ބަޓްޝުއާއީ ބެލްޖިއަމަށް އެންމެ ފަހުން ކުޅެދިން ފަސް މެޗުގައި ޖެހި ހަތްވަނަ ލަނޑެވެ.

މި މެޗުން ބެލްޖިއަމް މޮޅުވާން ދަނިކޮށް އައިވަރީ ކޯސްޓުން ނަތީޖާ އެއްވަރުކުރީ މެޗު ނިމެން ތިން މިނެޓަށް ވެފައިވަނިކޮށެވެ. އެ ޓީމަށް ލިބުނު ޕެނަލްޓީއަކުން މި ލަނޑު ޖަހައިދިނީ ފްރޭންކް ކެސީއެވެ.

މީގެ އިތުރުން ބައިނަލްއަގުވާމީ އެކުވެރިކަމުގެ މެޗެއްގައި ބުރާސްފަތި ދުވަހުގެރޭ ރަޝިއާ އަތުން ސްވިޑެން ވަނީ 2-1 ން މޮޅުވެފައެވެ.