ރާއްޖެޓީވީ ރޯކޮށްލި މައްސަލަ: ދެން އޮތީ ސިއްރު ހެކިބަސް ނެގުން!

"ރާއްޖެޓީވީ" ރޯކޮށްލި މައްސަލައިގައި ސިއްރު ނޫން 3 ހެކިވެރިއެއްގެ ހެކިބަސް ނަގައިފިއެވެ.

2013 ވަނަ އަހަރުގެ އޮކްޓޫބަރު 7 ވަނަ ދުވަހުގެ ރޭ މެންދަމުގެ ވަގުތެއްގައި ރާއްޖެޓީވީ ހިންގާ އިމާރާތުގައި ރޯކޮށްލައި، އެތައް މިލިއަން ރުފިޔާއެއްގެ ގެއްލުން ސްޓޭޝަނަށް ލިބިފައިވާއިރު، މި މައްސަލައިގެ ތަހުޤީޤު ނިންމައި ދައުވާ ކުރުމަށް ޕްރޮސެކިއުޓަރ ޖެނެރަލް އޮފީހަށް ފޮނުވާފައިވަނީ 2015 ވަނަ އަހަރުގެ ޖެނުއަރީ މަހުގެ 7 ވަނަ ދުވަހުއެވެ.

މި މައްސަލައާ ގުޅިގެން ދައުލަތުން ދައުވާ އުފުލާފައިވަނީ ހ. ގަސްވާ މުޙައްމަދު މީއާދުގެ މައްޗަށެވެ. އެގޮތުން މީއާދުގެ މައްޗަށް ވަނީ ޓެރަރިޒަމްގެ ދައުވާ އުފުލާފައެވެ.

މީއާދުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފައިވާއިރު، މި މައްސަލައިގެ ހިމެނޭ ސިއްރު ނޫން 3 ހެކިވެރިއެއްގެ ހެކިބަސް ވަނީ ނަގާފައެވެ. އަދި ދެން މި މައްސަލައިގައި އޮންނާނީ ސިއްރު ހެކިންގެ ހެކިބަސް ނެގުން ކަމަށް މައްސަލަ ބައްލަވާ ގާޒީ ވަނީ ވިދާޅުވެފައެވެ. ގާޒީ ވަނީ މި މައްސަލަ އަވަސް މުއްދަތެއްގައި ޝެޑިއުލް ކުރައްވާނެ ކަމަށް ވިދާޅުވެފައެވެ. އެހެންނަމަވެސް އަޑުއެހުން އޮންނާނެ ވަކި ތާރީޚެއް ވިދާޅުވެފައެއްނުވެއެވެ.

ރާއްޖެޓީވީ ހިންގަމުން ގެންދިޔަ އިމާރާތުގައި ރޯކޮށްލުމުގެ ޖަރީމާ ހިންގާފައިވަނީ 2013 ވަނަ އަހަރުގެ އޮކްޓޫބަރު 7 ވަނަ ދުވަހުގެ ރޭ މެންދަމުގެ ވަގުތެއްގައެވެ. ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލާ ހުރިހާ އިކުއިޕްމެންޓެއް އަންދައި އަޅިއަށް ހަދާލާފައިވަނީ، ރާއްޖެޓީވީއަށް ހަމަލާދޭން އުޅޭކަމުގެ މައުލޫމާތު ލިބި، އެކަން ފުލުހުންގެ ސަމާލުކަމަށް ގެނެސްފައިވަނިކޮށެވެ. އެގޮތުން މި ޖަރީމާގެ ސަބަބުން 11.65 މިލިއަން ރުފިޔާގެ ގެންލުން ރާއްޖެޓީވީއަށް ލިބިފައިވެއެވެ.

މާސްކު އަޅައިގެން ތިބި ފަސް މީހުން ރާއްޖެޓީވީ ހުރި އިމާރާތަށް ވަދެ ސްޓޫޑިއޯ ރޯކޮށް އަނދާ އަޅިއަށް ހެދިތާ7 އަހަރު ފާއިތުވެގެން ދިޔައިރު ވެސް އެކަމުގައި ރާއްޖެ ޓީވީއަށް އިންސާފު ލިބިފައެއް ނެތެވެ.މި ފަސް މީހުން ރާއްޖެޓީވީ ހުރި މި ޖަރީމާ ހިންގި މަންޒަރު ފެންނަން ހުރި ނަމަވެސް، މިމައްސަލައިގައި ހައްޔަރުކުރި މީހުންގެ ތެރެއިން ދައުވާ އުފުލައި ޝަރީއަތްވެސް ހިންގަމުން ދަނީ މީއާދުގެ މައްޗަށް އެކަންޏެވެ.