ސިޓީ އަތުން ލީޑްސް ޕޮއިންޓެއް ހޯދައިފި

ވަރުގަދަ މެންޗެސްޓާ ސިޓީ އަތުން ލީޑްސް ޔުނައިޓެޑް ޕޮއިންޓެއް ހޯދައިފިއެވެ.

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ލީޑްސް އާއި ސިޓީ ބައްދަލުކުރި މެޗު އެއްވަރުވީ 1-1 ންނެވެ.

ލީޑްސްގެ ދަނޑުގައި ކުޅުނު މި މެޗުގެ ކުރީކޮޅު ރަނގަޅު ކުޅުމެއް ދެއްކީ ސިޓީންނެވެ. އެގޮތުން މެޗުގެ ކުރީކޮޅު ސިޓީން ގިނަ ހަމަލާތަކެއް އުފެއްދިއިރު، އެ ޓީމުގެ މިޑްފީލްޑަރު ކެވިން ޑި ބްރޭނާ ހިލޭ ޖެހުމަކުން ފޮނުވާލި ބޯޅައެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ.

މެޗުގެ ކުރީކޮޅު ރަނގަޅު ކުޅުމެއް ދައްކަމުން އައި ސިޓީން ވަނީ މެޗުގެ 17 ވަނަ މިނެޓުގައި ލަނޑު ޖަހާ ލީޑު ނަގާފައެވެ. މި ލަނޑު ސިޓީއަށް ކާމިޔާބުކޮށްދިނީ ފޯވާޑް ރަހީމް ސްޓާލިނެވެ. މިއީ މި ސީޒަނުގެ ޕްރިމިއާ ލީގުގައި ސްޓާލިން ކާމިޔާބުކުރި ފުރަތަމަ ލަނޑެވެ.

ސިޓީން މެޗުގެ ކުރީކޮޅު ލީޑު ނެގި ނަމަވެސް، އޭގެ ފަހުން ލީޑްސްއިން ވަނީ ކުޅުން ރަނގަޅުކޮށް ސިޓީގެ ގޯލަށް ނުރައްކާ ކޮށްފައެވެ. އެގޮތުން ފުރަތަމަ ހާފުގައި ލީޑްސްގެ ސްޓުއާޓް ޑަލަސް އާއި ލޫކް އައިލިންގަށް ވަނީ ހުސް ދެ ފުރުސަތު ލިބިފައެވެ. އެކަމަކު މި ދެ ކުޅުންތެރިންނަށް ލިބުނު ފުރުސަތުތަކުގެ ހުރަހަކަށްވީ ސިޓީގެ ގޯލްކީޕަރު އެޑާސަނެވެ.

ލީޑްސްއިން ދެވަނަ ހާފުގައި މޮޅު ކުޅުމެއް ދެއްކިއިރު، އެ ޓީމުން ނަތީޖާ އެއްވަރުކޮށްފައިވަނީ މެޗުގެ 59 ވަނަ މިނެޓުގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރިތާ ތިންވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ރޮޑްރިގޯ މޮރޭނޯއެވެ. މިއީ މި ޓްރާންސްފާ ބާޒާރުގައި ވެލެންސިއާ ދޫކޮށް ލީޑްސްއާ ގުޅުނު ފޯވާޑް އެ ޓީމަށް ޖަހައިދިން ފުރަތަމަ ލަނޑެވެ.

މި މެޗުން ލިބުނު ޕޮއިންޓާއެކު ލީޑްސް އޮތީ ތާވަލުގެ ފަސްވަނައިގައި ކުޅުނު ހަތަރު މެޗުން ލިބުނު ހަތް ޕޮއިންޓާއެކުއެވެ. އަދި ސިޓީ އޮތީ ތާވަލުގެ 11 ވަނައިގައި ތިން ،މެޗުން ހަތަރު ޕޮއިންޓާއެކުއެވެ.

ސިޓީ އަތުން ލީޑްސް ޕޮއިންޓެއް ހޯދިއިރު، 16 އަހަރަށްފަހު އަލުން ޕްރިމިއާ ލީގުގައި ވާދަކުރަމުން އަންނަ ލީޑްސްއިން އަންނަނީ މާސެލޯ ބިއެލްސާގެ އިރުޝާދުގެ ދަށުން މޮޅު ކުޅުމެއް ދައްކަމުންނެވެ. އެގޮތުން ލީޑްސް އަތުން ލީގުގެ ފުރަތަމަ މެޗުގައި އެންމެ ފަހުގެ ޗެމްޕިއަން ލިވަޕޫލަށް އަމިއްލަ ދަނޑުގައި މޮޅުވެވުނީ ކިރިޔާއެވެ. އަދި އޭގެ ފަހުން ކުޅުނު ދެ މެޗުންވެސް ލީޑްސް ވަނީ މޮޅުވެފައެވެ.