އަދީބާއި އޭނާގެ މާސްޓަރާއި ބައިވެރިންނަށް މައާފް ކުރެވޭނެ ކަމުގެ ޔަގީންކަމެއް ނެތް: ނިޔާޒު
ނިޔަޒު ވިދާޅުވީ ކުރީގެ ކަޅު ހަނދާންތައް ތާޒާކަމާއެކު އަދިވެސް ހުންނަ ކަމަށް
ކުރީގެ އޮޑިޓަރ ޖެނެރަލް ނިޔާޒް އިބްރާހިމް؛ އެމްއެމްޕީއާރުސީގެ 1.2 ބިލިއަން ރުފިޔާގެ ހިޔާނާތް ފަޅާއަރުވާލީ ނިޔާޒު މަގާމުގައި ހުންނަވައިގެން
އަދީބާއި އޭނާގެ މާސްޓަރު އަދި ބައިވެރިންނަށް މައާފް ކުރެވޭނެ ކަމުގެ ޔަގީންކަމެއް ނެތް ކަމަށް، މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ހިޔާނާތުގެ މައްސަލަ ފަޅާ އަރުވާލި ކުރީގެ އޮޑިޓަރ ޖެނެރަލް ނިޔާޒް އިބްރާހިމް ވިދާޅުވެއްޖެއެވެ.
ނިޔާޒު މިހެން ވިދާޅުވީ އެމްއެމްޕީއާރުސީގެ ކޮރަޕްޝަންގެ ތުހުމަތު ކުރެވޭ ކުރީގެ ނައިބު ރައީސް އަހްމަދު އަދީބު އަބްދުލްޢަފޫރު ތައުބާވެ، ރައްޔިތުންގެ ކިބައިން މައާފަށް އެދިވަޑައިގަތުމާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.
ނިޔާޒު ވިދާޅުވީ އޭނާއާއި އޭނާގެ އާއިލާ މިކަމުގައި ތަހައްމަލުތަކެއް އުފުލަން ޖެހުނު ކަމަށެވެ. އަދި އެ ކަޅު ހަނދާންތައް މިއަދުވެސް ތާޒާކަމާއެކު ހުންނަ ކަމަށާއި، ނަމަވެސް މައާފު ކުރުމަކީ ރިވެތި ކަމެއް ކަމަށެވެ. އެހެންނަމަވެސް އަދީބާއި އޭނާގެ މާސްޓަރާއި ބައިވެރިންނަށް މައާފްކުރެވިދާނެ ކަމާއިމެދު ޔަގީންކަމެއް ނެތް ކަމަށް ޓްވީޓު ކުރެއްވިއެވެ.
އެމްއެމްޕީއާރުސީގެ ހިޔާނާތާއި ގުޅިގެން ކަޅުފައިސާ ދޮވުނުކަމުގެ ކުށް ސާބިތުވެ 5 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ވެރިކަމުގައި އޮޑިޓަރ ޖެނެރަލަކަށް ނިޔާޒު ހުންނަވައި އެމްއެމްޕީއާރުސީގެ ހިޔާނާތް ފަޅާ އަރުވާލި މައްސަލައިގައި އޭނާއަށް އެކި ގޮތްގޮތުން އިންޒާރު ލިބިވަޑައިގަތުމާއި ގުޅިގެން ދިރިއުޅުން ސްރީލަންކާއަށް ބަދަލުކުރެއްވިއެވެ.
ރާއްޖޭގައި ފަހުގެ ތާރީޚެއްގައި ހިންގާފައިވާ އެންމެ ބޮޑު ކޮރަޕްޝަން، އެމްއެމްޕީއާރުސީގެ 1.2 ބިލިއަން ރުފިޔާގެ ޚިޔާނާތް ފަޅާ އަރުވައިލުމުން ލިބުނު އިންޒާރުތަކާ ގުޅިގެން ސްރީލަންކާއަށް ދިރިއުޅުން ބަދަލުކުރެއްވުމަށްފަހު ނިޔާޒު އެނބުރި ރާއްޖެ ވަޑައިގެންނެވީ މިދިޔަ އަހަރުގެ ފެބްރުއަރީގައެވެ.
