ސިޓީ އާއި ޔުނައިޓެޑް ކުއާޓާއަށް

އިނގިރޭސި ލީގު ކަޕުގެ ހަތަރުވަނަ ބުރުގައި ބުދަ ދުވަހުގެރޭ ކުޅުނު މެޗުތަކުން މޮޅުވެ އެންމެ ފަހުގެ ޗެމްޕިއަން މެންޗެސްޓާ ސިޓީ އާއި މެންޗެސްޓާ ޔުނައިޓެޑް ކުއާޓާއިން ޖާގަ ހޯދައިފިއެވެ.

ބުދަ ދުވަހުގެރޭ ކުޅުނު މެޗުން ސިޓީ މޮޅުވީ ބާންލީ އަތުން 3-0 ންނެވެ.

ބާންލީގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ސިޓީން ވަނީ ލީޑު ނަގާފައެވެ. މެޗުގެ 35 ވަނަ މިނެޓުގައި ބެންޖަމިން މެންޑީގެ އެހީއާއެކު ސިޓީއަށް ލީޑު ނަގައިދިނީ ރަހީމް ސްޓާލިންއެވެ. އަދި ދެވަނަ ހާފު ފަށައިގެން ހަތަރުވަނަ މިނެޓުގައި ސްޓާލިން ވަނީ ސިޓީއަށް ލީޑު ފުޅާކޮށްދީފައެވެ.

މެޗުގައި ސިޓީން ކާމިޔާބުކުރި ތިންވަނަ ލަނޑު މެޗުގެ 65 ވަނަ މިނެޓުގައި ސްޓާލިންގެ އެހީއާއެކު ކާމިޔާބުކޮށްދިނީ ފެރާން ޓޮރޭސްއެވެ. މިއީ މި ޓްރާންސްފާ ބާޒާރުގައި ވެލެންސިއާ ދޫކޮށް ސިޓީއާ ގުޅުނު ޒުވާން ފޯވާޑް ކާމިޔާބުކުރި ފުރަތަމަ ލަނޑެވެ.

އަދި ސިޓީއާ ވާދަވެރި ޔުނައިޓެޑް މި މުބާރާތުގެ ކުއާޓާއަށް ދަތުރުކުރީ ބުދަ ދުވަހުގެރޭ ބްރައިޓަން އަތުން 3-0 ން މޮޅުވެގެންނެވެ.

ބާންލީގެ ދަނޑުގައި ކުޅުނު މި މެޗުގެ ފުރަތަމަ ހާފުގެ ފަހު މިނެޓުގައި ޔުނައިޓެޑުން ވަނީ ލީޑު ނަގާފައެވެ. ހުއާން މާޓާގެ އެހީއާއެކު މި ލަނޑު ޔުނައިޓެޑަށް ކާމިޔާބުކޮށްދިނީ ސްކޮޓް މެކްޓޮމިނޭއެވެ.

އަދި މެޗުގެ 75 ވަނަ މިނެޓުގައި ޑޮނީ ވެން ޑަ ބީކްގެ އެހީއާއެކު މާޓާ ޔުނައިޓެޑަށް ލީޑު ފުޅާކޮށްދިންއިރު، ޔުނައިޓެޑުގެ ތިންވަނަ ލަނޑު މެޗު ނިމެން 10 މިނެޓަށް ވެފައި ވަނިކޮށް ޖަހައިދިނީ ޕައުލް ޕޮގްބާއެވެ.

މީގެ އިތުރުން ބުދަ ދުވަހުގެރޭ ކުޅުނު މެޗުތަކުން މޮޅުވެ އެވަޓަނާއި ނިއުކާސަލް ޔުނައިޓެޑުވެސް ވަނީ ލީގު ކަޕުގެ ކުއާޓާއަށް ދަތުރުކޮށްފައެވެ. އަމިއްލަ ދަނޑުގައި ވެސްޓް ހޭމް ޔުނައިޓެޑް އަތުން 4-1 ން އެވަޓަން މޮޅުވިއިރު، ރަށުން ބޭރުގައި ނިއުޕޯޓް ކައުންޓީ އަތުން ނިއުކާސަލް މޮޅުވީ ޕެނަލްޓީ ޖަހައިގެން 5-4 ންނެވެ.