އޭސީ މިލާނަށް ކުޅެމުން އަންނަ ސްވިޑެން ފޯވާޑް ޒްލަޓާން އިބްރަހިމޮވިޗް ކޮވިޑް-19 އަށް ޕޮޒިޓިވް ވެއްޖެއެވެ.

ބުރާސްފަތި ދުވަހުގެރޭގެ ވަގުތެއްގައި އުމުރުން 38 އަހަރުގެ އިބްރަހިމޮވިޗް ވަނީ އޭނާ ކޮވިޑް-19 އަށް ޕޮޒިޓިވް ވިކަން ހާމަކޮށްފައެވެ. އިބްރަހިމޮވިޗް ކުރި ޓްވީޓެއްގައި ބުނެފައިވަނީ ބުދަ ދުވަހު ކުރި ޓެސްޓުން އޭނާ ނެގެޓިވްވި ނަމަވެސް، ބުރާސްފަތި ދުވަހު ކުރި ޓެސްޓުން އޭނާ ކޮވިޑް-19 އަށް ޕޮޒިޓިވް ވެފައިވާ ކަމަށެވެ. އަދި ވައިރަހަށް ޕޮޒިޓިވްވި ނަމަވެސް، އޭނާގެ ހަށިގަނޑުން އެއްވެސް އަލާމާތެއް ފެނިފައިނުވާ ކަމަށްވެސް އިބްރަހިމޮވިޗް ވަނީ ބުނެފައެވެ.

އިބްރަހިމޮވިޗް ކޮވިޑް-19 އަށް ޕޮޒިޓިވްވީ ޔުއެފާ ޔޫރޮޕާ ލީގުގެ ކޮލިފައިންގައި ނޯވޭގެ ބޯޑޯ/ގްލިމްޓާ ދެކޮޅަށް ބުރާސްފަތި ދުވަހުގެރޭ މިލާން ކުޅެން އޮތް މެޗުގެ ކުރިންނެވެ. އެހެންކަމުން މި މެޗުގެ ސްކޮޑުން އިބްރަހިމޮވިޗް ބާކީކޮށްފައިވާއިރު، އޭނާ މިހާރު ވަނީ ހޯމް-އައިސޮލޭޝަނަށް ގޮސްފައެވެ.

މިލާނުން ނެރުނު ބަޔާނެއްގައި ބުނީ ބުރާސްފަތި ދުވަހު ކުރިއަށްގެންދިޔަ ޓެސްޓުތަކުން އިބްރަހިމޮވިޗް ކޮވިޑް-19 އަށް ޕޮޒިޓިވްވި ނަމަވެސް، އެ ޓީމުގެ އެހެން ކުޅުންތެރިއަކު ވައިރަހަށް ޕޮޒިޓިވް ނުވާ ކަމަށެވެ. އެކަމަކު ބުދަ ދުވަހު ބްރެޒިލްގެ ޑިފެންޑަރު ލެއީ ޑުއާޓޭ ކޮވިޑް-19 އަށް ޕޮޒިޓިވްވި ކަމަށް މިލާނުން ވަނީ ބުނެފައެވެ.

މިލާނުގެ ފޯވާޑް އިބްރަހިމޮވިޗް ކޮވިޑް-19 އަށް ޕޮޒިޓިވް ވިއިރު، އޭނާ ވަނީ މިދިޔަ ހޯމަ ދުވަހުގެރޭ އައު ސީޒަނުގެ އިޓާލިއަން ލީގުގައި މިލާނުން ކުޅުނު ފުރަތަމަ މެޗުގައި ބޮލޯނިއާ ކޮޅަށް ދެ ލަނޑު ޖަހާފައެވެ. އެ މެޗުގައި އިބްރަހިމޮވިޗް ދެ ލަނޑު ޖެހިއިރު، 1999 ވަނަ އަހަރު ފުޓްބޯޅަ ކެރިއަރު ފެށި އިބްރަހިމޮވިޗް މިހާރު ވަނީ މިހާތަނަށް ކުޅުނު 22 ސީޒަނުގައިވެސް ލަނޑު ޖަހާފައެވެ.

މިދިޔަ އަހަރުގެ ޑިސެމްބަރު މަހުގެ ފަހުކޮޅު މިލާނާ ގުޅުނު އިބްރަހިމޮވިޗް އެ ޓީމުގައި މޮޅު ކުޅުމެއް ދައްކަމުން އަންނައިރު، މިލާނުން މިހާރު ވަނީ އިބްރަހިމޮވިޗުގެ އެއްބަސްވުން މި ސީޒަނުގެ ނިޔަލަށް އާކޮށްފައެވެ.