ޒިކުރާ މިސްކިތުގެ މައްސަލަ: ކުންފުނި ސަސްޕެންޑް ކުރުމަށް އޭސީސީން ފިނޭންސްއަށް އަންގައިފި
އެސްޖޭ ކޮންސްޓްރަކްޝަން ކުންފުންޏާ ހަވާލު ކޮށްފައި ވަނީ 2018 ވަނަ އަހަރުގެ ޖުލައި މަހު
ޒިކުރާ މިސްކިތް އިމާރާތް- މިއީ 1980ގެ އަހަރުތަކުގެ ކުރީކޮޅު އިމާރާތްކުރި މިސްކިތެއް
ޒިކުރާ މިސްކިތް އިމާރާތްކުރުމަށް ޙަވާލުކުރި އެސްޖޭ ކޮންސްޓްރަކްޝަން އާއެކު ވެފައިވާ އެއްބަސްވުން މި ސަރުކާރުން އުވާލާފައިވާއިރު، އެ ކުންފުނި ސަސްޕެންޑް ކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ފިނޭންސް މިނިސްޓްރީއަށް އަންގައިފިއެވެ.
އިތުބާރުހުރި މަސްދަރަކުން "ރާއްޖެއެމްވީ" އަށް ވަނީ އެކަން ކަށަވަރު ކޮށްދީފައެވެ. އެގޮތުން އެސްޖޭ ކޮންސްޓްރަކްޝަން ސަސްޕެންޑް ކުރުމަށް އޭސީސީން އަންގާފައިވަނީ މިހިނގާ ސެޕްޓެމްބަރު މަހުގެ 21 ވަނަ ދުވަހުއެވެ.
ރާއްޖެއެމްވީއަށް އެނގިފައިވާ ގޮތުގައި އޭސީސީން އެ ކުންފުނި ސަސްޕެންޑް ކުރުމަށް އަންގާފައިވަނީ މި މަޝްރޫއުގެ ބިޑް ހުށައެޅިއިރު، އެއްބަޔަކު ހިމެނޭ ގޮތަށް ތަފާތު އެކި ޕާރޓީތަކުގެ ނަމުގައި ގުޅިގެން ބިޑް ހުށައަޅާފައިވާތީއެވެ. އެގޮތުން ވާދަވެރިކަން ދެއްކުމުގެ ގޮތުން މިގޮތަށް ބިޑް ހުށައަޅާފައިވާތީ އޭސީސީން ވަނީ އެ ކުންފުނި ސަސްޕެންޑް ކުރުމަށް އަންގާފައެވެ.
އޭގެ އިތުރުން، މި މައްސަލައިގައި އެސްޖޭ ކުންފުންޏާއެކު ގުޅިގެން ބިޑް ހުށައެޅި އެހެން ކުންފުންޏެއްވެސް ސަސްޕެންޑް ކުރުމަށް އަންގާފައިވާކަން ރާއްޖެއެމްވީއަށް ވަނީ އެނގިފައެވެ.
ޒިކްރާ މިސްކިތް އަލުން އިމާރާތްކޮށް އެތަނުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏާ ހަވާލު ކޮށްފައި ވަނީ 2018 ވަނަ އަހަރުގެ ޖުލައި މަހުއެވެ. މި ސަރުކާރު ވުޖޫދަށް އައުމަށް ފަހު މަސައްކަތް ކުރިޔަށް ގެންގޮސްފައި ނުވާތީ ކޮންޓްރެކްޓް ބާތިލް ކުރަން އިސްލާމިކް މިނިސްޓްރީން 30 ދުވަހުގެ ނޯޓިސްއެއް އެ ކުންފުންޏަށް ދިނެވެ. ނޯޓިސް މުއްދަތު ހަމަވެ 23 މެއި 2019 ވަނަ ދުވަހުގެ ކުރިން އެތަން ހުސް ކުރުމަށް އެކުންފުންޏަށް އެންގިއެވެ. އެގޮތުން މިސަރުކާރުން އެއްބަސްވުން ބާތިލްކުރުމުން ބަދަލުގެ ގޮތުގައި 141 މިލިއަން ރުފިޔާ ހޯދަން ކުންފުނިން ވަނީ ސިވިލް ކޯޓަށް މައްސަލަވެސް ހުށައަޅާފައެވެ.
