ޔުއެފާ ނޭޝަންސް ލީގުގައި ހޯމަ ދުވަހުގެރޭ ކުޅުނު މެޗުން ނެދަލެންޑްސް ބަލިކޮށް ލީގު އޭ ގްރޫޕް އެކެއްގެ އެއްވަނައަށް އިޓަލީ ޖެހިލައިފިއެވެ.
ހޯމަ ދުވަހުގެރޭ ކުޅުނު މެޗުން މެޗުން ނެދަލެންޑްސް އަތުން އިޓަލީ މޮޅުވީ 1-0 ގެ ނަތީޖާއަކުންނެވެ. މިއީ މިދިޔަ އަހަރުގެ ނޭޝަންސް ލީގުގެ ފައިނަލް މެޗުގައި ޕޯޗުގަލް އަތުން ބަލިވި މެޗަށްފަހު ނެދަލެންޑްސް ބަލިވި ފުރަތަމަ މެޗެވެ.
ނެދަލެންޑްސްގައި ކުޅުނު މި މެޗުގައި އިޓަލީން ރަނގަޅު ކުޅުމެއް ދެއްކިއިރު، އެޓީމުން ވަނީ މެޗު ޑޮމިނޭޓުކޮށް ނެދަލެންޑްސްގެ ގޯލަށް ނުރައްކާކޮށްފައެވެ. އޭގެ ބަދަލުގައި މި މެޗުގައި ނެދަލެންޑްސްގެ ފަރާތުން އެންމެ އެދެވޭ ކުޅުމެއް ފެނިފައިނުވާއިރު، އެޓީމުން މުޅި މެޗުގައިވެސް އިޓަލީގެ ގޯލާ އަމާޒުކޮށް ފޮނުވާލާފައިވަނީ އެންމެ ތިން ހަމަލާއެވެ.
މި މެޗުގައި ފެނިގެންދިޔަ ހަމައެކަނި ލަނޑު އިޓަލީން ކާމިޔާބުކޮށްފައިވަނީ ފުރަތަމަ ހާފުގެ އިތުރު ވަގުތުގައެވެ. ޗީރޯ އިމޮބިލޭ ހުރަސްކޮށްދިން ބޯޅައަކުން މި ލަނޑު އިޓަލީއަށް ކާމިޔާބުކޮށްދިނީ ނިކޯލޯ ބަރެއްލާއެވެ.
އޭގެ ފަހުން ދެވަނަ ހާފުގައި ނެދަލެންޑްސްއިން ނަތީޖާ އެއްވަރުކުރުމަށް ބުރަ މަސައްކަތްތަކެއް ކުރި ނަމަވެސް، އިޓަލީގެ ތަޖުރިބާކާރު ޑިފެންޑަރުން ވަނީ ނެދަލެންޑްސް ހުއްޓުވާފައެވެ. އަދި މި މެޗު ނިމެން ގާތްވެފައި ވަނިކޮށް އިޓަލީގެ ފޯވާޑް މޮއިސް ކީންއަށް ވަނީ ލީޑު ފުޅާކުރަން ރަނގަޅު ފުރުސަތެއް ލިބި ބޭކާރުވެފައެވެ.
މި މޮޅާއެކި ރޮބާޓޯ މަންޗިނީގެ އިރުޝާދުގެ ދަށުން ކުޅެމުން އަންނަ އިޓަލީން ވަނީ މެޗަކުން ބަލިނުވެ 16 މެޗު ފުރިހަމަ ކޮށްފައެވެ. އެޓީމު އެންމެ ފަހުން މެޗަކުން ބަލިވީ މިދިޔަ ސީޒަނުގެ ނޭޝަންސް ލީގުގައި ޕޯޗުގަލް އަތުންނެވެ.
މި މެޗުން ލިބުނު ތިން ޕޮއިންޓާއެކު އިޓަލީ ގްރޫޕްގެ އެއްވަނައަށް ޖެހިލީ ހަތަރު ޕޮއިންޓާއެކުއެވެ. ދެވަނައިގައި އޮތް ނެދަލެންޑްސް އާއި ތިންވަނައިގައި އޮތް ޕޮލެންޑަށްވެސް ތިން ޕޮއިންޓް ލިބިފައިވާއިރު، ފުލުގައި އޮތް ބޮސްނިއާއަށް ލިބިފައިވަނީ އެންމެ ޕޮއިންޓެކެވެ. ހޯމަ ދުވަހުގެރޭ ޕޮލެންޑް ވަނީ 2-1 ން ބޮސްނިއާ ބަލިކޮށްފައެވެ.
މީގެ އިތުރުން ނޭޝަންސް ލީގުގައި ހޯމަ ދުވަހުގެރޭ ކުޅުނު ބައެއް އެހެން މެޗުތަކަށް ބަލާއިރު، ބޮރޫޝިއާ ޑޯޓްމުންޑްގެ ޒުވާން ފޯވާޑް އާލިން ހާލަންޑް ކުޅެމުން އަންނަ ނޯވޭ ވަނީ ނޮދަން އަޔަލެންޑް އަތުން 5-1 ގެ ތަފާތު ބޮޑު ނަތީޖާއަކުން މޮޅުވެފައެވެ. އަދި ރޫމޭނިއާ ވަނީ އޮސްޓްރިއާ އަތުން 3-2 ން މޮޅުވެފައެވެ.
