އެމްބާޕޭ ކޮވިޑް-19 އަށް ޕޮޒިޓިވް ވެއްޖެ

ޕީއެސްޖީއަށް ކުޅެމުން އަންނަ ފްރާންސްގެ ތަރި ކީލިއަން އެމްބާޕޭ ކޮވިޑް-19 އަށް ޕޮޒިޓިވް ވެއްޖެއެވެ.

އެމްބާޕޭ ކޮވިޑް-19 އަށް ޕޮޒިޓިވްވީ ފްރާންސްގެ ގައުމީ ފުޓްބޯޅަ ޓީމަށް ނަގާފައިވާ ދަނޑިވަޅެއްގައެވެ. އެގޮތުން ޔުއެފާ ނޭޝަންސް ލީގަށް ފްރާންސުން އެކުލަވާލި ސްކޮޑުން އުމުރުން 21 އަހަރުގެ ފޯވާޑަށް ޖާގަ ދީފައިވާއިރު، ފްރާންސުން ކުޅުނު ފުރަތަމަ މެޗުގައި ސްވިޑެން އަތުން 1-0 ން މޮޅުވީ އެމްބާޕޭ ކާމިޔާބުކުރި ލަނޑުންނެވެ.

ފްރާންސްގެ ގައުމީ ފުޓްބޯޅަ ޓީމުން ހޯމަ ދުވަހުގެރޭ ނެރުނު ބަޔާނެއްގައި ބުނީ އެމްބާޕޭ ކޮވިޑް-19 އަށް ޕޮޒިޓިވްވުމާއެކު ކުރިއަށް އޮތް 14 ދުވަހަށް އޭނާ ސެލްފް-އައިސޮލޭޝަނަށް ގޮސްފައިވާ ކަމަށެވެ. އަދި އެމްބާޕޭގެ ހަށިގަނޑުން ވައިރަހުގެ އެއްވެސް އަލާމާތެއް ފެނިފައިނުވާ ކަމަށްވެސް މި ބަޔާނުގައި ވަނީ ބުނެފައެވެ.

ކޮވިޑް-19 އަށް ޕޮޒިޓިވްވެ އެމްބާޕޭ 14 ދުވަހަށް އައިސޮލޭޝަނަށް ދާން ޖެހުމާ ގުޅިގެން ފްރާންސުން އަމިއްލަ ގައުމުގައި އަންގާރަ ދުވަހުގެރޭ ކްރޮއޭޝިއާއާ ދެކޮޅަށް ކުޅޭ މެޗުގައި އެމްބާޕޭއަށް ނުކުޅެވޭނެއެވެ.

އެމްބާޕޭ އަކީ ޕީއެސްޖީން ކޮވިޑް-19 އަށް ޕޮޒިޓިވްވި ހަތްވަނަ ކުޅުންތެރިޔާއެެވެ. މީގެ ކުރިން ސްޕެއިންގެ ރަށެއް ކަމުގައިވާ އިބްޒާއަށް ޗުއްޓީ ހޭދަކުރަން ގޮސް އުޅެނިކޮށް ޕީއެސްޖީގެ ތަރި ނޭމާ އާއި، ފޯވާޑް އެންހެލް ޑި މަރިއާ އާއި، މިޑްފީލްޑަރު ލެއަންޑްރޯ ޕަރެޑެސް އާއި، ގޯލްކީޕަރު ކޭލޯ ނަވާސް އާއި، ފޯވާޑް މައުރޯ އިކާޑީީގެ އިތުރުން ޑިފެންޑަރު މާކީނިއޯސް ވަނީ ކޮވިޑް-19 އަށް ޕޮޒިޓިވް ވެފައެވެ.

ޕީއެސްޖީގެ ހަތް ކުޅުންތެރިއަކު ކޮވިޑް-19 އަށް ޕޮޒިޓިވް ވެފައިވާއިރު، މިދިޔަ އޮގަސްޓް މަހުގެ 21 ވަނަ ދުވަހު ފެށި ފްރެންޗް ލީގުގައި މިހާތަނަށް ޕީއެސްޖީން މެޗެއް ކުޅެފައެއް ނުވެއެވެ. ޕީއެސްޖީން ލީގުގެ ފުރަތަމަ މެޗުގައި މިދިޔަ މަހުގެ 24 ވަނަ ދުވަހު ލެންސްއާ ދެކޮޅަށް ނުކުންނަން އޮތް ނަމަވެސް، އެ މެޗު ވަނީ މި މަހުގެ 10 ވަނަ ދުވަހަށް ފަސްކޮށްފައެވެ. އެ މެޗު ފަސްކުރަން ފްރެންޗް ލީގުން ނިންމީ މިދިޔަ މަހުގެ ފަހުކޮޅު އޮތް ޔުއެފާ ޗެމްޕިއަންސް ލީގުގެ ފައިނަލްގައި ޕީއެސްޖީ ވާދަކުރުމުންނެވެ.