ޑޭވިޑް ސިލްވާ ކޮވިޑް-19 އަށް ޕޮޒިޓިވް ވެއްޖެ

ދާދި ފަހުން ރެއާލް ސޮސިއެޑާޑަށް ބަދަލުވި ސްޕެއިންގެ ތަޖުރިބާކާރު މިޑްފީލްޑަރު ޑޭވިޑް ސިލްވާ ކޮވިޑް-19 އަށް ޕޮޒިޓިވް ވެއްޖެއެވެ.

ސިލްވާ ކޮވިޑް-19 އަށް ޕޮޒިޓިވްވިކަން ސޮސިއެޑާޑުން ވަނީ ކަށަވަރުކޮށްދީފައެވެ. އެ ކުލަބުން ހާމަކުރި ގޮތުގައި ސިލްވާ ކޮވިޑް-19 އަށް ޕޮޒިޓިވްވީ ޕްރީ-ސީޒަން ފެށުމުގެ ކުރިން ކުރިއަށް ގެންދިޔަ ޓެސްޓުންނެވެ. އަދި ވައިރަހަށް ޕޮޒިޓިވްވި ނަމަވެސް، ސިލްވާގެ ހަށިގަނޑުން އެއްވެސް އަލާމާތެއް ފެނިފައިނުވާ ކަމަށްވެސް ސޮސިއެޑާޑުން ވަނީ ހާމަކޮށްފައެވެ.

ސިލްވާ ކޮވިޑް-19 އަށް ޕޮޒިޓިވްވުމާ ގުޅިގެން އޭނާ މިހާރު ވަނީ ސެލްފް-އައިސޮލޭޝަނަށް ބަދަލުވެފައެވެ. އަދި ސޮސިއެޑާޑްގެ ފަރިތަކުރުންތަކަށް ސިލްވާ ނުކުންނާނީ 14 ދުވަސް ފަހުން ކަމަށް ރިޕޯޓުތައް ބުނެއެވެ.

މެންޗެސްޓާ ސިޓީގައި 10 އަހަރު ހޭދަކުރުމަށްފަހު އުމުރުން 34 އަހަރުގެ ސިލްވާ ސޮސިއެޑާޑާ ގުޅުނީ ހިލޭ ޓްރާންސްފާއެއްގެ ދަށުންނެވެ. ރިޕޯޓުތައް ބުނާ ގޮތުން އުފަން ގައުމު ކަމަށްވާ ސްޕެއިނަށް ބަދަލުވާން ސިލްވާ ނިންމީ ކެރިއަރުގެ ފަހު ކޮޅުގައި އުފަން ގައުމުގައި އާއިލާއާ އެކުގައި ގިނަ ވަގުތު ހޭދަކުރުމަށެވެ.

ވެލެންސިއާއިން 2010 ވަނަ އަހަރު ސިޓީއަށް ބަދަލުވި މިޑްފީލްޑަރު ސިޓީ ދޫކޮށް ސޮސިއެޑާޑަށް ބަދަލުވިއިރު، އޭނާ ވަނީ ސިޓީގައި ގިނަ ކާމިޔާބީތަކެއް ހޯދައިފައެވެ. ސިޓީއަށް ކުޅެދިން 436 މެޗުގައި 77 ލަނޑު ކާމިޔާބުކޮށްފައިވާ ސިލްވާ ވަނީ ސިޓީއާއެކު އިނގިރޭސި ޕްރިމިއާ ލީގުގެ ޗެމްޕިއަންކަން ހަތަރު ފަހަރު ހޯދުމުގެ އިތުރަށް އެފްއޭ ކަޕް ދެ ފަހަރު ކާމިޔާބުކޮށްފައެވެ.

ސިޓީއަށް ސިލްވާ ކޮށްދިން ޚިދުމަތް ބަލައިގަނެ އެ ޓީމުން ވަނީ ސިޓީގެ އިއްތިހާދު ސްޓޭޑިއަމް ބޭރުގައި ސިލްވާގެ ސްޓެޗޫއެއް ބަހައްޓަން ނިންމާފައެވެ.

އުމުރުން 16 އަހަރުން ފަށައިގެން ސްޕެއިންގެ ގައުމީ ޓީމުތަކަށް ކުޅުނު ސިލްވާ ވަނީ ސްޕެއިންގެ ސީނިއާ ޓީމަށް ކުޅުނު 125 މެޗުގައި 35 ލަނޑު ކާމިޔާބުކޮށްފައެވެ. އޭނާ ވަނީ ސްޕެއިން ގައުމީ ޓީމާއެކު ފީފާ ވޯލްޑް ކަޕް އެއް ފަހަރު އަދި ޔޫރޯ ފުޓްބޯޅަ މުބާރާތް ދެ ފަހަރު ކާމިޔާބުކޮށްފައެވެ.

ސިޓީ ދޫކޮށް އަންނަ ސީޒަނަށް ސޮސިއެޑާޑާ ސިލްވާ ގުޅުނުއިރު، އެޓީމުން ވަނީ މިދިޔަ ސީޒަނުގައި ސްޕެނިޝް ލީގުގެ ހަވަނައިގައި ނިންމައި، އަންނަ ސީޒަނުގެ ޔުއެފާ ޔޫރޮޕާ ލީގުން ޖާގަ ހޯދާފައެވެ.