މޭޖާ ޖެނެރަލް ޝިޔާމްގެ މައްސަލަ އަލުން ބެލުމަށް އޭސީސީއަށް ޕީޖީ އަންގަވައިފި
އޭނާގެ ދިރިއުޅުން އެތަނުގައި ހަމަޖެހުނީ މޭޖަރ ޖެނެރަލްގެ އެންގުމުގެ މަތިން
އެމްއެންޑީއެފްގެ ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް އަހްމަދު ޝިޔާމް
މޯލްޑިވްސް ނޭޝަނަލް ޑިފެންސް ފޯސް ގެ ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް އަހްމަދު ޝިޔާމްގެ ބައްޕަ އެމްއެންޑީއެފްގެ ވީ.އައި.ޕީ އިމާރާތެއްގައި ދިރިއުޅުއްވި މައްސަލަ އަލުން ބެލުމަށް އެންޓި ކޮރަޕްޝަން ކޮމިޝަން (އޭސީސީއަށް) ޕްރޮސެކިއުޓަރ ޖެނެރަލް ހުސައިން ޝަމީމް އަންގަވައިފިއެވެ.
މި މައްސަލަ އޭސީސީން އޭރު ތަހުޤީޤުކޮށް، މި މައްސަލައަކީ ކޮރަޕްޝަންގެ ކުށެއް އެކުލެވިގެން ނުވާ މައްސަލައެއް ކަމަށް އޭރު އޭސީސީން ވަނީ ނިންމާފައެވެ. އެގޮތުން އޭރު އޭސީސީން މި މައްސަލަ ނިންމައި އާންމުކުރި ރިޕޯޓްގައި ބުނެފައިވަނީ، ކ ވިލިނގިލީގައި ހުންނަ ކޯސްޓްގާރޑުގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރްސީސީ) އިމާރަތް ހުންނަ ގޯތީގައިވާ ވީ.އައި.ޕީ ގޭގައި ޝިޔާމްގެ ބައްޕަ ދިރިއުޅުނު ކަމާއި، އޭނާގެ ދިރިއުޅުން އެތަނުގައި ހަމަޖެހުނީ މޭޖަރ ޖެނެރަލްގެ އެންގުމުގެ މަތިން ކަމަށެވެ.
ސިފައިން ގޭގައި އަމަލު ކުރަމުންދާ އުސޫލުގެ ދަށުން ވީ.އައި.ޕީ ގޭގައި ޗީފް އޮފް ޑިފެންސް ފޯސް، ވައިސް ޗީފް އޮފް ޑިފެންސް ފޯސް އަދި ކޯސްޓްގާރޑުގެ ކޮމާންޑަރު އަންގާ ގޮތެއްގެ މަތިން އެކި ފަރާތްތަކުގެ ހުރުމުގެ ކަންތައްތައް ހަމަޖެހޭކަމަށް ކޮމިޝަނަށް ލިބިފައިހުރި ލިއެކިއުންތަކުންނާއި، ކޮމިޝަނުގެ ތަހުޤީޤަށް ލިބިފައިވާ މައުލޫމާތުން އެނގޭކަންވެސް ބަޔާން ކޮށްފައިވެއެވެ.
އެއާއެކު ވީ.އައި.ޕީ ގޭގައި މޭޖަރ ގެ ބައްޕަގެ ދިރިއުޅުން ހަމަޖައްސާފައިވަނީ އެ ފަރާތަށް ނާޖާއިޒު ފައިދާއެއް ހޯދައިދިނުމުގެ މަޤްސަދުގައިކަމަށް ނުބެލެވޭކަމަށާއި، އެންޓި ކޮރަޕްޝަން ކޮމިޝަނުގެ ޤާނޫނުގެ ދަށުން މި މައްސަލައަކީ ކޮރަޕްޝަންގެ ކުށެއް އެކުލެވިގެން ނުވާ މައްސަލައެއް ކަމަށް އޭސީސީން އޭރު ވަނީ ނިންމާފައެވެ.
އެހެން ނަމަވެސް މި މައްސަލަ އަލުން ބެލުމަށް ޕީޖީ ހުސައިން ޝަމީމް ވަނީ އޭސީސީއަށް އަންގަވާފައެވެ.
