ހެލްތް މިނިސްޓަރ އަމީން މަސައްކަތުން އެކަހެރިވެ ވަޑައިގަތުމަށް ގަސްތު ކުރައްވައިފި
17 އޯގަސްޓު 2020 | ހޯމަ 13:57އަމީން މަސައްކަތުން އެކަހެރިވެވަޑައިގެންނެވީ މިނިސްޓްރީގެ ކޮރަޕްޝަންގެ މައްސަލަތަކެއް ފެންމަތިވެ ތަހުގީގުކުރަން ފަށާފައިވަނިކޮށް
އޮޑިޓް ރިޕޯޓުން ކޮރަޕްޝަންގެ މައްސަލަތެއް ފާހަގަވެ ތަހުގީގުކުރަން ފަށާފައިވާ އިރު ހެލްތް މިނިސްޓަރ ވަނީ މަސައްކަތުން އެކަހެރިކޮށްފައި
ހެލްތް މިނިސްޓަރ އަބްދުﷲ އަމީން މަސައްކަތުން އެކަހެރިވެ ވަޑައިގަތުމަށް ގަސްތު ކުރައްވައިފިއެވެ.
ހެލްތް މިނިސްޓަރ އަބްދުﷲ އަމީން ރައީސް އިބްރާހިމް މުހައްމަދު ސޯލިހަށް ފޮނުއްވި ސިޓީގައި ވިދާޅުވެފައިވަނީ ކޮވިޑް 19-އާއިގުޅޭ މިނިސްޓްރީ އޮފް ހެލްތުގެ ޚަރަދުތަކުގެ ކޮމްޕްލައަންސް އޮޑިޓް ރިޕޯޓްގައިފާހަގަކޮށްފައިވާ ކަންތައްތަކާއިގުޅިގެން، ކަމާބެހޭ މުއައްސަސާތަކުން އެ މައްސަލަ ތަހުގީގުކޮށް ގޮތެއް ނިންމަންދެން ނުވަތަ ރައީސް ވަކި ގޮތެއް އަންގަވަންދެން، މިނިސްޓްރީ އޮފް ހެލްތުގެ މަސައްކަތްތަކުން އެކަހެރިވުމަށް ގަސްތުކުރައްވާ ކަމަށެވެ.
ހެލްތް މިނިސްޓަރު އަމިއްލައަށް މަސައްކަތުން އެކަހެރިވާން ގަސްދުކުރައްވާ ކަމަށް ވިދާޅުވެފައިވާ އިރު، ކޮވިޑް-19 އާއި ގުޅޭ މިނިސްޓްރީ އޮފް ހެލްތުގެ ޚަރަދުތަކުގެ ކޮމްޕްލައަންސް އޮޑިޓް ރިޕޯޓްގައި ކޮރަޕްޝަންގެ ބޮޑެތި ކަންކަން ވަނީ ފާހަގަކޮށްފައެވެ. ހެލްތް މިނިސްޓްރީގެ އޮޑިޓް ރިޕޯޓުގައި ކޮވިޑުގެ ބަލި މީހުންނަށް ފަރުވާ ދޭން ރާއްޖެއަށް ބޭނުންވާ 75 ވެންޓިލޭޓަރު ގެނައުމުގައި ހެލްތް މިނިސްޓްރީން އޮޅުވާލުންތަކެއް އޮޅުވާލާފައިވާ ކަމަށް އޮޑިޓް ރިޕޯޓުގައި ވަނީ ބުނެފައެވެ. މި ރިޕޯޓުގައި ބުނާ ގޮތުން ވެންޓިލޭޓަރުތައް ގެންނަން ހަވާލު ކުރި ދުބާއީގެ އެގްޒެކިއުޓާސް ޖެނެރަލް ޓްރޭޑިންގ ކުންފުންޏަކީ ޑަބްލިއުއެޗްއޯގެ ލަފާގެ މަތިން ހަމަޖައްސާފައިވާ ކުންފުންޏެއް ނޫނެވެ. ވެންޓިލޭޓަރުގެ އިތުރުން މެޑިކަލް ސާމާނު ގެނައުމުގައި ވެސް އެތައް މިލިއަން ރުފިޔާއެއް މާލިއްޔަތު ގަވާއިދާ ޚިލާފަށް ޚަރަދު ކުރުމާއި ޚަރަދުކުރި ފައިސާ އަށް މުދާ ލިބުނު ކަން ކަށަވަރުނުވާ މައްސަލަ އެ ރިޕޯޓުގައި ވަނީ ފާހަގަ ކޮށްފައެވެ.
ވެންޓިލޭޓަރު ގަތުމުގައި ދައުލަތަށް ގެއްލުންވާ ގޮތަށް އަމަލުކޮށްފައިވާ މައްސަލައިގައި އޮޑިޓް އޮފީހުން ކުރި ޚާއްސަ އޮޑިޓު ރިޕޯޓުގައި ބުނެފައި ވަނީ ސިއްހީ ސާމާނު ގަތުމަށް 32 މިލިއަން ރުފިޔާ އެޑްވާންސްކޮށް އެސްޓީއޯ އަށް ދައްކާފައިވާ ކަމަށެވެ. އެކަމަކު އޭގެ ތެރެއިން ހެލްތު މިނިސްޓްރީ އަށް ލިބިފައި ވަނީ 2،000 ސާޖަން ކެޕް އެކަނި ކަމަށް އޮޑިޓްގައި ފާހަގަކޮށްފައިވެއެވެ.
