އީއެފްއެލް ޗެމްޕިއަންޝިޕް (ދެވަނަ ޑިވިޝަން) ގެ ޕްލޭއޮފް މެޗުން ބްރެންޓްފޯޑް ބަލިކޮށް ފުލަމް އަލުން އިނގިރޭސި ޕްރިމިއާ ލީގަށް ޕްރޮމޯޓް ވެއްޖެއެވެ.

އީއެފްއެލް ޗެމްޕިއަންޝިޕްގެ ޕްލޭއޮފް މެޗަކީ ދުނިޔޭގެ އެންމެ އަގު ބޮޑު މެޗެވެ. އެގޮތުން މި މެޗު ކާމިޔާބުކުރާ ޓީމަކަށް ޖުމްލަ 220 މިލިއަން ޑޮލަރު ލިބެއެވެ. އޭގެ ބަދަލުގައި ޔުއެފާ ޗެމްޕިއަންސް ލީގު ޗެމްޕިއަންކަން ހޯދާ ޓީމަކަށް ގިނަވެގެން 90 މިލިއަން ޑޮލަރު ލިބޭއިރު، ފީފާ ވޯލްޑް ކަޕް ޗެމްޕިއަން ޓީމަށް ލިބެނީ 38 މިލިއަން ޑޮލަރެވެ.

އަންގާރަ ދުވަހުގެރޭ ކުޅުނު އީއެފްއެލް ޗެމްޕިއަންޝިޕްގެ ޕްލޭއޮފް މެޗުން ފުލަމް މޮޅުވީ ބްރެންޓްފޯޑް އަތުން 2-1 ންނެވެ.

ވެމްބްލީ ސްޓޭޑިއަމްގައި ކުޅުނު މި މެޗުގެ ފުރިހަމަ ވަގުތު ހަމަވިއިރު، ދެ ޓީމުންކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެހެންކަމުން ނަތީޖާ ނެރުމަށް ކުޅުނު އިތުރު ވަގުތުގެ ފުރަތަމަ ހާފުގެ ފަހު މިނެޓުގައި ފުލަމްއިން ވަނީ ލީޑު ނަގާފައެވެ. ހިލޭ ޖެހުމަކުން މި ލަނޑު އެޓީމަށް ކާމިޔާބުކޮށްދިނީ ޑިފެންޑަރު ޖޯއި ބްރަޔަންއެވެ. އަދި މެޗު ނިމެން ތިން މިނެޓަށް ވެފައިވަނިކޮށް ޖޯއި ބްރަޔަން ވަނީ އިތުރު ލަނޑެއް ފުލަމްއަށް ކާމިޔާބުކޮށްދީފައެވެ. މެޗުގައި ބްރެންޓްފޯޑުން ޖެހި ހަމައެކަނި ލަނޑު އިތުރު ވަގުތުގައި ކާމިޔާބުކޮށްދިނީ ހެންރިކް ޑަލްސްގާޑެވެ.

މި މެޗުން މޮޅުވެ އަންނަ ސީޒަނުގެ ޕްރިމިއާ ލީގަށް ފުލަމް ޕްރޮމޯޓް ވިއިރު، އެޓީމު އެންމެ ފަހުން ޕްރިމިއާ ލީގުގައި ވާދަކޮށްފައިވަނީ 2018-2019 ވަނަ އަހަރުގެ ސީޒަނުގައެވެ. ސްކޮޓް ޕާކާގެ އިރުޝާދުގެ ދަށުން ފުލަމް ޕްރިމިއާ ލީގަށް ޕްރޮމޯޓް ވިއިރު، އޭނާ ޓީމާ ހަވާލުވެފައިވަނީ މިދިޔަ ސީޒަނުގެ މެދުތެރެއިން ކްލައުޑިއޭ ރަނިއޭރީގެ ބަދަލުގައެވެ.

އަންނަ ސީޒަނުގެ ޕްރިމިއާ ލީގަށް ދެވަނަ ޑިވިޝަނުން ޕްރޮމޯޓް ވެފައިވަނީ ފުލަމްގެ އިތުރުން އީއެފްއެލް ޗެމްޕިއަންޝިޕްގެ ޗެމްޕިއަންކަން ހޯދި ލީޑްސް ޔުނައިޓެޑާއި ވެސްޓް ބްރޮމްއެވެ.