ޖިންސީ ފުރައްސާރައިގެ ތުހުމަތުތައް ވިޔާ ދޮގުކޮށްފި

އެމެރިކާގެ ނިއުޔޯކް ސިޓީ އެފްސީއަށް ކުޅުނުއިރު އެޓީމުގެ އަންހެން މުވައްޒަފަކަށް ޖިންސީ ފުރައްސާރަކުރި ކަމަށް ބުނެ ދައްކަމުން އަންނަ ވާހަކަތައް ސްޕެއިންގެ ގައުމީ ޓީމުގެ ކުރީގެ ފޯވާޑް ޑޭވިޑް ވިޔާ ދޮގުކޮށްފިއެވެ.

ވިޔާ ޖިންސީ ފުރައްސާރަކުރި ކަމަށް ބުނެ ޓްވިޓާގައި "ސްކައިލާ ބީ" ގެ ނަމުގައި ހަދާފައިވާ އެކައުންޓެއް މެދުވެރިކޮށް އަންހެނަކު ބުނީ ވިޔާ ނިއުޔޯކް ސިޓީއަށް ކުޅުނުއިރު ތަކުރާރުކޮށް އޭނާއަށް ޖިންސީ ފުރައްސާރަ ކޮށްފައިވާ ކަމަށާއި، އެކަން ނިއުޔޯކް ސިޓީގެ ބައެއް އިސްވެރިންނަށް އެނގޭނެ ކަމަށެވެ. އަދި އެކަން އެ ކްލަބުގެ އިސްވެރިން ދުށީ ވިޔާ ސަމާސާއަކަށް ކުރާ ކަމެއްގެ ގޮތުގައި ކަމަށްވެސް އެ އަންހެން މީހާ ބުނެފައިވެއެވެ.

ވިޔާ ޖިންސީ ގޮތުން ނިއުޔޯކް ސިޓީގެ އަންހެން މުވައްޒަފަކަށް ފުރައްސާރަކުރި ކަމަށް ބުނެ ދައްކަމުން އަންނަ ވާހަކަތައް ހޫނުވުމާ ގުޅިގެން ނިއުޔޯކް ސިޓީން ވަނީ ނޫސް ބަޔާނެއް ނެރެފައެވެ. އެޓީމުން ނެރުނު ނޫސް ބަޔާނުގައި ބުނެފައިވަނީ އެ ޓީމަށް ކުޅުނު ކުޅުންތެރިޔަކު އެ ކްލަބުގެ މުވައްޒަފަކަށް ޖިންސީ ފުރައްސާރަކުރި މައްސަލަ އަޑުއަހާފައިވާ ކަމަށާއި، މި މައްސަލަ އެ ކްލަބުން ތަހުގީގު ކުރަމުން އަންނަ ކަމަށެވެ. އަދި މިފަދަ މައްސަލަތަކަކީ ޓީމުން ދޫކޮށްލާނެ މައްސަލަތަކެއް ނޫން ކަމަށްވެސް ވަނީ ބުނެފައެވެ.

މި މައްސަލައާ ގުޅިގެން ވިޔާވެސް ވަނީ ބަޔާނެއް ނެރެފައެވެ. ވިޔާ ބުނީ އޭނާގެ މައްޗަށް ކުރާ ތުހުމަތުތަކަކީ ކޮން މަގުސަދެއްގައި ކުރާ ކަމެއްކަން އޭނާއަށް ނޭނގޭ ކަމަށާއި މިއީ ކަނޑައެޅިގެން ދޮގު ވާހަކަތަކެއް ކަމަށެވެ. މީގެ އިތުރުން ވިޔާ ބުނީ އެއްވެސް ހާލެއްގައި މީހަކަށް ޖިންސީ ގޮތުން ފުރައްސާރަ ކުރެވިގެން ނުވާނެ ކަމަށާއި މިފަދަ ހަޑި އަމަލެއް އޭނާ ކޮށްފައި ނުވާނެ ކަމަށެވެ. އަދި ބުނީ މި މައްސަލައިގައި އަޅަންޖެހޭ ފިޔަވަޅުތައް އޭނާގެ ޤާނޫނީ ޓީމުން އަޅަމުންދާނެ ކަމަށެވެ.

2015-2018 ށް ބިޔާ ނިއުޔޯކް ސިޓީއަށް ކުޅުނުއިރު، އޭނާ ވަނީ އެ ކްލަބަށް 126 މެޗު ކުޅެދީ 80 ލަނޑު ކާމިޔާބުކޮށްފައެވެ. ވިޔާ އަކީ ސްޕެއިންގެ ގައުމީ ޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އޭނާ ވަނީ ސްޕެއިންގެ ގައުމީ ޓީމަށް ކުޅެދިން 98 މެޗުގައި 59 ލަނޑު ޖަހާފައެވެ.