ރިސޯޓުން ރިލީޒް ނުލިބޭތީ ކިތުނާއަށް ފަރިތަކުރުންތަކަށް ނުނިކުމެވިފައި

ރިޒޯޓުން އަދިވެސް ރިލީޒް ނުދޭތީ، ގައުމީ ފުޓްބޯޅަ ޓީމުގެ ފަރިތަކުރުންތަކަށް އަދިވެސް ނުނިކުމެވޭ ކަމަށް ފޯވާޑް އާދަމް ނިޒާމް (ކިތުނާ) ބުނެފިއެވެ.

މިއަހަރު ބޭއްވި ދެވަނަ ޑިވިޝަން ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި ކިތުނާ ގައުމީ ފުޓްބޯޅަ ޓީމުގެ ސްކޮޑަށް މުޅިން އަލަށް ނަގާފައިވަނީ ފެބްރުއަރީ މަހުގެ ތެރޭގައެވެ.

ކޮވިޑް-19 އާ ގުޅިގެން ގައުމީ ޓީމުން މާޗު މަހު ފަރިތަކުރުންތައް މެދުކަނޑާލިއިރު، މި މަހުގެ ކުރީކޮޅު އަލުން ވަނީ ފަރިތަކުރުންތައް ފަށާފައެވެ.

ރާއްޖެ.އެމްވީއަށް މައުލޫމާތުދެމުން ކިތުނާ ބުނީ އަދި މިހާތަނަށް އޭނާ މަސައްކަތް ކުރަމުން އަންނަ ސޮނެވާފުށި ރިޒޯޓުން ރިލީޒް ދީފައިނުވާ ކަމަށާއި، ރިސޯޓުން ވީއްލިހާ އަވަހަކަށް ގައުމީ ޓީމުގެ ފަރިތަކުރުންތަކުގައި ބައިވެރިވާން ތައްޔާރަށް ހުރި ކަމަށެވެ.

މިކަމާ ގުޅިގެން ރާއްޖެ.އެމްވީއާ ވާހަކަދައްކަމުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ކިތުނާގެ ރިލީޒް ހޯދުމުގެ މަސައްކަތް ސްޕޯޓްސް ކޮމިޝަނުން ކުރައްވަމުންދާ ކަމަށާއި، އެކަން ކުޅިވަރާ ބެހޭ ވަޒީރު އަޙްމަދު މަޙްލޫފްގެ ސަމާލުކަމަށްވެސް ގެންނަވާފައިވާނެ ކަމަށެވެ.

މައުލޫމާތު ލިބޭ ގޮތުގައި ރާއްޖޭގެ ބޯޑަރު އަލުން ހުޅުވާލުމާއެކު، ކިތުނާ މަސައްކަތް ކުރަމުން އަންނަ ސޮނެވާފުށި ރިސޯޓަށްވެސް ފަތުރުވެރިން ޒިޔާރަތްކުރަން ފަށާފައިވުމާއެކު، ކިތުނާއަށް ރިލީޒް ދިނުމަށް ރިސޯޓުން ދެކޮޅު ހަދާފައިވަނީ މުވައްޒަފުންގެ ދަތިކަމާ ގުޅިގެންނެވެ.

ފީފާ ވޯލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަން މެޗުތަކަށް ތައްޔާރުވުމަށް 32 ކުޅުންތެރިންގެ ސްކޮޑަކާއެކު ގައުމީ ފުޓްބޯޅަ ޓީމުން ފަރިތަކުރަމުން އަންނައިރު، ދެވަނަ ޑިވިޝަނުގައި މޮޅު ކުޅުމެއް ދައްކާ، މިހާރު މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެފައިވާ ކިތުނާއަށް ގައުމީ ސްކޮޑުން ޖާގައެއް ދިން އެއް ސަބަބަކީ، މާޒިޔާއަށް ކުޅެމުން އަންނަ ތަޖުރިބާކާރު ފޯވާޑް އަސަދުﷲ އަބްދުﷲއަށް އަނިޔާވެ ކުޅުމާއި ދުރަށްދާން ޖެހުމުންނެވެ. އަސަދުﷲއަށް އަނިޔާވީ އޭއެފްސީ ކަޕް ޕްލޭއޮފްގައި މާޒިޔާ އަދި ބެންގަލޫރު އެފްސީ މާލޭގައި ބައްދަލުކުރި މެޗުގެ ތެރެއިންނެވެ.

ކޮވިޑް-19 ގެ ސަބަބުން ފަސްކުރި ކޮލިފައިންގ މެޗުތައް އޮކްޓޯބަރު މަހާއި ނޮވެމްބަރު މަހަށް ތާވަލު ކޮށްފައއިވާއިރު، ރާއްޖެ އާއި ޗައިނާގެ މެޗު މިހާރު ވަނީ އޮކްޓޯބަރު މަހުގެ އަށްވަނަ ދުވަހަށް ތާވަލު ކޮށްފައެވެ. މީގެ އިތުރުން ރާއްޖެ އާއި ސީރިއާ ކުޅޭ މެޗު އޮކްޓޯބަރު މަހުގެ 13 ވަނަ ދުވަހަށް މާލޭގައި ކުޅުމަށް ތާވަލު ކޮށްފައިވާއިރު، ރަށުން ބޭރުގައި ފިލިޕީންސް އާ ދެކޮޅަށް ރާއްޖެ ކުޅޭ މެޗު ވަނީ ނޮވެމްބަރު މަހުގެ 17 ވަނަ ދުވަހަށް ތާވަލުކޮށްފައެވެ.

އޭޝިއާ ސަރަހައްދުން ހަތަރު ގައުމެއް 2022 ވަނަ އަހަރުގެ ފީފާ ވޯލްޑް ކަޕަށް ކޮލިފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ޗައިނާ ހަތަރު މެޗުން ހަތް ޕޮއިންޓާއެކު ދެވަނައިގައި އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓު ހޯދާފައިވާ ފިލިޕީންސެވެ. ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެ ޕޮއިންޓެއް ލިބިފައިނުވާ ގުއާމެވެ.