ޔުނައިޓެޑް ކަޓުވާލުމަށްފަހު ޗެލްސީ ފައިނަލަށް

ސެމީފައިނަލްގައި މެންޗެސްޓާ ޔުނައިޓެޑް ބަލިކޮށް އިނގިރޭސި އެފްއޭ ކަޕްގެ ފައިނަލަށް ޗެލްސީ ދަތުރުކޮށްފިއެވެ.

އާދީއްތަ ދުވަހުގެރޭ ކުޅުނު ސެމީގެ މެޗުން ޗެލްސީ މޮޅުވީ 3-1 ގެ ނަތީޖާއަކުންނެވެ.

ވެމްބްލީ ސްޓޭޑިއަމްގައި ކުޅުނު މި މެޗުގައި ޗެލްސީން ރަނގަޅު ކުޅުމެއް ދެއްކިއިރު، ފުރަތަމަ ހާފު ނިމުމުގެ ކުރިން އެޓީމުން ވަނީ ލީޑު ނަގާފައެވެ. ފުރަތަމަ ހާފުގެ އިތުރު ވަގުތުގައި ކެޕްޓަން ސެޒާ އަޒްޕިލިކުއެޓާ ހުރަސް ކޮށްދިން ބޯޅައަކުން މި ލަނޑު ޗެލްސީއަށް ކާމިޔާބުކޮށްދިނީ އޮލިވިއޭ ޖިރޫޑެވެ.

އަދި ދެވަނަ ހާފު ފަށައިގެން ފުރަތަމަ މިނެޓުގައި ޗެލްސީން ވަނީ ލީޑު ފުޅާކޮށްފައެވެ. ޗެލްސީގެ މޭސަން މައުންޓް ތިރިތިރިން ފޮނުވާލި ބޯޅަ ގޯލަށް ވަނީ ޔުނައިޓެޑްގެ ގޯލްކީޕަރު ޑޭވިޑް ޑެހެއާގެ އަތުގައި ޖެހިފައެވެ. އަދި މެޗުގެ 74 ވަނަ މިނެޓުގައި ޗެލްސީން ވަނީ އެޓީމުގެ ތިންވަނަ ލަނޑު ކާމިޔާބުކޮށްފައެވެ. މި ލަނޑަކީ ޔުނައިޓެޑްގެ ކެޕްޓަން ހެރީ މެގުއާ އަތުން ބައިކޮޅަށް ވަން ގޯލެކެވެ.

މެޗުގައި ޔުނައިޓެޑުން ޖެހި ހަމައެކަނި ލަނޑު 86 ވަނަ މިނެޓުގައި ޕެނަލްޓީއަކުން ކާމިޔާބުކޮށްދިނީ ބްރޫނޯ ފެނާންޑޭސްއެވެ.

މި މެޗުން ބަލިވުމާއެކު ޔުނައިޓެޑުން ހުރިހާ މުބާރާތެއްގައި ބަލިނުވެ ދަމަހައްޓަމުން އައި ރެކޯޑަށް، 19 މެޗަށް ފަހު ވަނީ ނިމުން އައިސްފައެވެ.

ޔުނައިޓެޑް ބަލިކޮށް އެފްއޭ ކަޕްގެ ފައިނަލަށް ޗެލްސީ ދަތުރުކުރިއިރު، ފައިނަލްގައި ޗެލްސީ ނުކުންނާނީ އާސެނަލާ ދެކޮޅަށެވެ. އާސެނަލުން ފައިނަލްގެ ޖާގަ ހޯދީ ސެމީގެ ފުރަތަމަ މެޗުގައި އެންމެ ފަހުގެ ޗެމްޕިއަން މެންޗެސްޓާ ސިޓީގެ މައްޗަށް 2-0 އިން ކުރިހޯދައިގެންނެވެ.

އެފްއޭ ކަޕްގެ ފައިނަލް ކުޅޭނީ އަންނަ އޮގަސްޓް މަހުގެ އެއްވަނަ ދުވަހުއެވެ.