އާސެނަލް ނުވަތަ ނިއުކާސަލް ޔުނައިޓެޑަށް ބްރެޒިލްގެ ތަރި ފިލިއްޕޭ ކުޓީނިއޯ ވިއްކާލަން ބާސެލޯނާއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 27 އަހަރުގެ ކުޓީނިއޯ މިދިޔަ ސީޒަނުގައި ލޯނު އެއްބަސްވުމެއްގެ ދަށުން ކުޅުނީ ބަޔާން މިއުނިކަށެވެ. ލޯނު އެއްބަސްވުން ހަމަވެ 110 މިލިއަން ޕައުންޑަށް ކުޓނިއޯ ގަތުމަށް ލިބުނު ފުރުސަތުގެ ބޭނުން ބަޔާނުން ހިފާފައެއް ނުވެއެވެ. އެހެންކަމުން އަންނަ ސީޒަނަށް ބާސާއިން ކުޓީނިއޯ ވިއްކާލަން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

އެގޮތުން ބާސާއިން ކުޓީނިއޯ ވިއްކާނީ އާސެނަލް ނުވަތަ ނިއުކާސަލް ޔުނައިޓެޑަށް ކަމަށް ދާދި ފަހުން މީޑިއާތަކުން ވަނީ ރިޕޯޓުކޮށްފައެވެ. އެ ދެ ކްލަބުގެ އިތުރުން މެންޗެސްޓާ ޔުނައިޓެޑް އަދި ޗެލްސީންވެސް އަންނަނީ ކުޓީނިއޯ ގަތުމަށް މަސައްކަތް ކުރަމުންނެވެ. މީގެ ކުރިން ކުޓީނިއޯގެ އޭޖެންޓް ވަނީ ކުރިއަށް އޮތް ސީޒަނަށް އިނގިރޭސި ޕްރިމިއާ ލީގަށް ބަދަލުވާން ކުޓީނިއޯ ބޭނުންވާކަން ހާމަކޮށްފައެވެ.

ރިޕޯޓުތައް ބުނާ ގޮތުން ބާސާއިން ކުޓީނިއޯ ވިއްކާލަން މަސައްކަތް ކުރަމުން އަންނަނީ މިފަހަރުގެ ޓްރާންސްފާ ބާޒާރުގައި އިންޓަ މިލާނުގެ ފޯވާޑް ލަޓާރޯ މާޓިނޭޒް ގަތުމަށް ޚަރަދުކުރަން ޖެހޭތީއާއެކުއެވެ. އެކަމަކު މީގެ ކުރިން ބާސާގެ ކޯޗު ކިކޭ ސެޓިއެން ވަނީ ކުޓީނިއޯ އަންނަ ސީޒަނުގައި ބާސާގައި މަޑުކުރާނެ ކަމުގެ އުންމީދު އެބައޮތް ކަމަށް ބުނެފައެވެ.

2018 ވަނަ އަހަރުގެ ޖެނުއަރީ މަހު ލިވަޕޫލުން 142 މިލިއަން ޕައުންޑަށް ބާސާއަށް ބަދަލުވި ކުޓީނިއޯއަށް އެ ކްލަބުގައި އެންމެ އެދެވޭ ކުޅުން ދެއްކިފައެއް ނުވެއެވެ. އެގޮތުން ކުޓީނިއޯ ބާސާގައި ކުޅުނު 76 މެޗުގައި ޖެހިފައިވަނީ 21 ލަނޑެވެ. އޭގެ ފަހުން މިދިޔަ ސީޒަނުގައި ލޯނު އެއްބަސްވުމެއްގެ ބަޔާނަށް ބަދަލުވި ކުޓީނިއޯއަށް އެޓީމަށް ކުޅެދިން 34 މެޗުގައި ކާމިޔާބުކރެވިފައިވަނީ އެންމެ 9 ލަނޑެވެ.