އެސްޕަންޔޯލް ބަލިކޮށް ބާސެލޯނާއިން ސްޕެނިޝް ލީގުގެ އެއްވަނައިގައި އޮތް ރެއާލް މެޑްރިޑާ އެއް ޕޮއިންޓު ގާތަށް ޖެހިލައިފިއެވެ.

ލީގުގައި ބުދަ ދުވަހުގެރޭ ކުޅުނު މެޗުން ބާސާ މޮޅުވީ 1-0 ންނެވެ. މި މޮޅާއެކު ބާސާ ވަނީ 35 މެޗުން 76 ޕޮއިންޓު ހޯދައިގެން ރެއާލާ އެއް ޕޮއިންޓަށް ގާތްކޮށްފައެވެ. ރެއާލް އެއްވަނައިގައި އޮތީ 34 މެޗުން 77 ޕޮއިންޓު ހޯދައިގެންނެވެ.

އެހެންކަމުން ލީގުގައި ހުކުރު ދުވަހުގެރޭ ޑިޕޯޓިވޯ އަލަވެސްއާ ދެކޮޅަށް ކުޅޭ މެޗުން މޮޅުވެގެން ރެއާލަށް، އަނެއްކާވެސް އެއްވަނައިގައި ހަތަރު ޕޮއިންޓުގެ ލީޑެއް ނެގުމުގެ ފުރުސަތު އެބައޮތެވެ.

ބާސާގެ ދަނޑުގައި ބުދަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައި ހަމަހަމ ކުޅުމެކެވެ. މި މެޗުގެ ދެވަނަ ހާފު ފަށައިގެން ފަސްވަނަ މިނެޓުގައި ބާސާގެ ޒުވާން ފޯވާޑް އަންސޫ ފާޓީއަށް ވަނީ ސީދާ ރަތް ކާޑެއް ދައްކާފައެވެ. އަދި އޭގެ ތިން މިނެޓު ފަހުން އެސްޕަންޔޯލްގެ ޕޯލް ލޮޒާނޯއަށް ވެސް ވަނީ ސީދާ ރަތް ކާޑެއް ދައްކާފައެވެ.

މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 56 ވަނަ މިނެޓުގައި ބާސާއަށް ކާމިޔާބުކޮށްދިނީ ލުއިސް ސުއަރޭޒްއެވެ.

މި މެޗުން އެސްޕަންޔޯލް ބަލިވުމާއެކު، އެޓީމު ވަނީ ރެލިގޭޓް ވެފައެވެ. ތާވަލުގެ ފުލުގައި އެޓީމު އޮތީ 35 މެޗުން 24 ޕޮއިންޓާއެކުއެވެ.