ހޮޅުދޫ ޓާފް ދަނޑަށް އެއްވެސް މައްސަލައެއް ދިމައެއް ނުވޭ: ވަޒީރު
"ހޮޅުދޫގައި އެޅި ޓާފް ފުޓްބޯޅަ ދަނޑު ހަލާކުވެފައިވާ ކަމަށް ބުނެ ބައެއް މީޑިއާތަކުން އާންމުކުރީ ދޮގު ޚަބަރެއް"
ނ. ހޮޅުދޫގައި އެޅި ޓާފް ފުޓްބޯޅަ ދަނޑު
ނ. ހޮޅުދޫގައި އެޅި ޓާފް ފުޓްބޯޅަ ދަނޑު ހަލާކުވެފައިވާ ކަމަށް ބުނެ ބައެއް މީޑިއާތަކުން އާންމުކުރީ ދޮގު ޚަބަރެއް ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
ބޯކޮށް ވާރޭވެހި ހޮޅުދޫ ދަނޑުގައި އަޅާފައި އޮތް ޓާފް ހިއްލިފައި އޮތް ވީޑިއޯއެއް ހޯމަ ދުވަހުގެ ވަގުތެއްގައި ވަނީ މީސްމީޑިއާގައި ދައުރުވެފައެވެ. އަދި މި ވީޑިއޯއާ ގުޅިގެން ބައެއް މީޑިއާތަކުން ވަނީ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ރާއްޖޭގައި އެޅި ފުރަތަމަ ޓާފް ދަނޑު ހަލާކުވެފައިވާ ކަމަށް ބުނެފައެވެ.
އެކަމަކު މި ޚަބަރުތައް ދޮގުކުރައްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ބޯކޮށް ވާރޭވެހުމުން ޓާފްގެ އަޑިއަށް ފެން ޖަމާވެ ޓާފް ހިއްލުމަކީ އާންމު ކަމެއް ކަމަށާއި، އެއީ ސީރިއަސް މައްސަލައެއް ނޫން ކަމަށެވެ. އެގޮތުން މާލޭގައި އަޅާފައިވާ ޓާފް ދަނޑުތަކުގެ ޓާފްވެސް ބޯކޮށް ވާރޭވެހުމުން ހިއްލޭ ކަމަށް ވަޒީރު ވިދާޅުވިއެވެ. އަދި ހޮޅުދޫގައި އެޅި ޓާފް ދަނޑާއި ގުޅިގެން ޒުވާނުންނާއި އެރަށު ކައުންސިލުން ފާޅުކުރި ކަންބޮޑުވުންތަކަށް ހައްލު ގެނެސް، ދަނޑުގެ މަސައްކަތް މިހާރު އެއްކޮށް ނިންމާލެވިފައިވާ ކަމަށްވެސް ވަޒީރު ވިދާޅުވިއެވެ.
"ޓާރފް ބްލިސްޓާސް" ނުވަތަ ބޯކޮށް ވާރޭވެހުމުން ޓާފްގެ އަޑިއަށް ފެން ވަދެ ޓާފް ހިއްލުމަކީ އާންމުކޮށް ދިމާވާ ކަމެއް ކަމަށް ތަޖުރިބާކާރުން ވަނީ ބުނެފައެވެ. އަދި ވާރޭ ފެން ހިނދުމާއެކު މި މައްސަލަ ހައްލުވާ ކަމަށްވެސް ތަޖުރިބާކާރުން ބުނެއެވެ. މާލޭގައި އަޅާފައިވާ ދަނޑުތަކުގައި ވެސް ބޯވާރެޔާއެކު ޓާފް ހިއްލުމަކީ އާންމު ކަމެކެވެ.
ނ. ހޮޅުދޫގެ ދަނޑަކީ ރައީސް ޞާލިޙުގެ ވައުދުތަކުގެ ތެރޭގައި ހިމެނޭ ރާއްޖޭގެ އެކިކަންކޮޅުތަކުގައި ގާއިމުކުރާ 100 ދަނޑުގެ ތެރެއިން ނިންމާލި ފުރަތަމަ ދަނޑެވެ. ފ. ނިލަންދޫގެ ދަނޑުވެސް މިހާރު އެއްކޮށް ނިންމާލާފައިވާއިރު، ރާއްޖޭގެ އެކި ކަންކޮޅުތަކުގައި ޓާފް ފުޓްބޯޅަ ދަނޑު އެޅުމުގެ މަސައްކަތް ކުޅިވަރާ ބެހޭ ވުޒާރާއިން ދަނީ ކުރަމުންނެވެ.
