އެވަޓަން ބަލިކޮށް ޓޮޓެންހަމް އަށްވަނައަށް

އިނގިރޭސި ޕްރިމިއާ ލީގުގައި އެވަޓަން ބަލިކޮށް ތާވަލުގެ އަށްވަނައަށް ޓޮޓެންހަމް ހޮޓްސްޕާ ޖެހިލައިފިއެވެ.

އަމިއްލަ ދަނޑުގައި ހޯމަ ދުވަހުގެރޭ ކުޅުނު މެޗުން ޓޮޓެންހަމް މޮޅުވީ 1-0 ގެ ނަތީޖާއަކުންނެވެ.

މި މެޗުގައި ފެނިގެންދިޔަ ހަމައެކަނި ލަނޑަކީ މެޗުގެ 24 ވަނަ މިނެޓުގައި އެވަޓަންގެ މައިކަލް ކީން އަތުން ބައިކޮޅަށް ވަން ލަނޑެކެވެ. މި މެޗުގައި ނަތީޖާ އެއްވަރުކުރަން އެވަޓަންއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އެގޮތުން އެވަޓަންގެ ރިޗާލިސަން އާއި ޑޮމިނިކް ކަލްވެޓް-ލެވިން ފޮނުވާލި ހަމަލާތައް ކާމިޔާބެއްނުވިއެވެ.

މި މެޗުގައި ޓޮޓެންހަމްގެ ކެޕްޓަން ހޫގޯ ލޮރިސް އާއި އެ ޓީމުގެ ފޯވާޑް ސޮން ހެއުން-މިންގެ ދެމެދުގައި ވަނީ ކޯޅުމެއް ހިނގާފައެވެ.

ލޮރިސް ހިތްހަމަނުޖެހުނީ ފުރަތަމަ ހާފުގެ ފަހު ވަގުތު އެވަޓަންގެ ކުޅުންތެރިން އެޓޭކު ކުރަމުން ދިޔައިރު، ބޯޅަ ހޯދަން ސޮންގެ ފަރާތުން އެކަށީގެންވާ ވަރުގެ މަސައްކަތެއް ނުފެނުމުންނެވެ. އެގޮތުން ފުރަތަމަ ހާފު ނިމުމާއެކު ލޮރިސް ވަނީ ސޮންއާ ދިމާލަށް ގޮސްފައެވެ. އެކަމަކު އެ ވަގުތު ޖިއޮވާނީ ލޮ ސެލްސޯ އާއި މޫސާ ސިސޯކޯ ވަނީ އެ ދެ ކުޅުންތެރިން ދެމެދަށް ވަދެ ދުރުކޮށްފައެވެ،

މެޗަށް ފަހު ޓޮޓެންހަމްގެ ކޯޗު ހޯސޭ މޮރީނިއޯ ބުނީ ލޮރިސް އާއި ސޮންގެ ފަރާތުން ފެނިގެންދިޔައީ އެ ކުޅުންތެރިން މި މެޗުން މޮޅުވާން ބޭނުންވެފައި ތިބި މިންވަރު ކަމަށާއި އެ ކަންތައްތައް ފެނުމުން އޭނާއަށް ހިތްހަމަޖެހުން ލިބޭ ކަމަށެވެ.

އެވަޓަން އަތުން ހޯދި މޮޅާއެކު ޓޮޓެންހަމް ތާވަލުގެ އަށްވަނައަށް ޖެހިލީ ކުޅުނު 33 މެޗުން 48 ޕޮއިންޓު ހޯދައިގެންނެވެ.

އަދި މި މޮޅާއެކު މޮރީނިއޯ ވަނީ އޭނާގެ ކޯޗިންގ ކެރިއަރުގައި ޕްރިމިއާ ލީގުގައި 200 މޮޅު ހަމަކޮށްފައެވެ. މޮރީނިއޯ އެ އަދަދަށް މޮޅު ހަމަކުރީ ޗެލްސީ އާއި މެންޗެސްޓާ ޔުނައިޓެޑް އަދި ޓޮޓެންހަމަށް ކޯޗުކޮށްދިން 326 މެޗުންނެވެ.