ތިނަދޫއަށް އުދަ އަރާ މައްސަލަ މަޖިލީހަށް
މި މައްސަލަ މަޖިލީހަށް ހުށަހަޅުއްވާފައިވަނީ ތިނަދޫ ދެކުނު ދާއިރާގެ މެމްބަރު އަހުމަދު ސަނީފް
.ގދ. ތިނަދޫ އަށް އުދައަރައި، ބަނދަރު ސަރަހައްދުގައި ލޮނުގަނޑު ބޮޑުވެފައި
ގދ. ތިނަދޫއަށް އުދައަރަމުންދާތީ، އެ މައްސަލައަށް އަވަސް ހަލެއް ގެނައުމަށް ގޮވާލާ މަޖިލީހަށް ކުއްލި މައްސަލައެއް ހުށަހަޅައިފިއެވެ.
އަންގާރަ ދުވަހުގެ ޖަލްސާގައި މި މައްސަލަ މަޖިލީހަށް ހުށަހަޅުއްވާފައިވަނީ ތިނަދޫ ދެކުނު ދާއިރާގެ މެމްބަރު އަހުމަދު ސަނީފްއެވެ.
މައްސަލަ ހުށަހަޅުއްވަމުން މެމްބަރު ސަނީފް ވިދާޅުވެފައިވަނީ އުދަ އެރުމުގެ މައްސަލައަކީ ކޮންމެ އަހަރަކު ވެސް މަދުވެގެން ހަވަރަކަށް ފަހަރު އެ އަތޮޅުގެ ރަށްތަކަށް ކުރިމަތިވާ މައްސަލައެއް ކަމަށެވެ. ނަމަވެސް އެކަމަށް އަދިވެސް މިހާތަނަށް ހައްލެއް ލިބިފައި ނުވާކަން ފާހަގަކޮށް އޭނާ ވިދާޅުވީ ރަށުގެ އޮޑިދޯނި ފަހަރަށް ގެއްލުން ވެގެންދިޔުމުން ޚަރަދުބޮޑުވެ, މަރާމާތު ކުރަންޖެހުމުން، ރަށުގެ މަސްވެރިންނަށް މަހަށް ވެސް ނުފުރޭ ކަމަށެވެ.
އަދި މިކަމަށް އެކަށީގެންވާ ދާއިމީ ހައްލެއް ނުލިބިއްޖެ ނަމަ އެކަމުގެ ސަބަބުން ރަށުގައި ދިރިއުޅޭ 12000 އެއްހާ ރައްޔިތުންނަށާއި ކޮންމެ ހަފްތާއަކު އެކި ރަށްރަށަކުން އެ ރަށަށް އަންނަ 1500 އެއްހާ ރައްޔިތުންނަށް އެހާމެ ނުރައްކާތެރި ކަމެއް ކަމަށް ވެސް ވިދާޅުވިއެވެ.
އަދި މިކަން ހައްލު ކުރުމަށް ރަށުގައި ބޭރު ތޮއްޓެއް ލާންޖެހުނު ކަމަށް ވީނަމަވެސް އެކަން ކޮށްދެއްވުމަށް މެމްބަރު ވަނީ އެދިވަޑައިގެންފައެވެ.
ތިނަދޫއަށް އުދައެރުމާއި ގުޅިގެން ރާއްޖެ.އެމްވީއާ ވާހަކަ ދައްކަވަމުން އެ ކައުންސިލްގެ ރައީސް އަލީ އަމްޖަދު ވިދާޅުވެފައިވަނީ، އެ ރަށަށް އުދައިގެ އަސަރު ކުރަން ފެށީ އާދިއްތަ ދުވަހުގެ ހެނދުނުން ފެށިގެން ކަމަށެވެ. އޭނާ ވިދާޅުވި ގޮތުގައި، ތިނަދޫ އަށް އުދައެރުން، ބަސްތާ ޖަހައިގެން ހައްލެއް ނުގެނެވޭނެ އެވެ. ހައްލަކީ ބޭރު ތޮށިލުމެވެ.
