ފުލިދޫ ގިރަމުންދާ މައްސަލަ ހައްލުކުރުމަށް ކަމާބެހޭ ފަރާތްތަކަށް ގޮވާލާ ގަރާރެއް ހުށަހަޅައިފި
މިގަރާރު ހުށަހެޅުއްވީ ފެލިދޫ ދާއިރާގެ މެމްބަރ އިބްރާހީމް ފަޒުލް ރަޝީދު
ފެލިދޫ ދާއިރާގެ މެމްބަރ އިބްރާހީމް ފަޟުލް ރަޝީދު މީގެކުރިން ބޭއްވި ޖަލްސާއެއްގައި ވާހަކަދައްކަވަނީ
ވ.ފުލިދޫ އާދަޔާ ޚިލާފަށް ގިރަމުންދާތީ މިކަމުގެ ސަބަބުން ފުލިދޫގެ ތިމާވެއްޓަށް ދިމާވެފައިވާ ނާޒުކު ހާލަތުގެ ސަބަބުން ރައްޔިތުންނަށް ދިމާވެފައިވާ ދަތިތަކާ، ގިރަމުންދާ މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ ފަރާތްތަކަށް އިލްތިމާސް ކުރުމަށްޓަކައި ފެލިދޫ ދާއިރާގެ މެމްބަރ އިބްރާހީމް ފަޒުލް ރަޝީދު މަޖިލީހަށް ގަރާރެއް ހުށަހަޅުއްވައިފިއެވެ.
އަންގާރަ ދުވަހުގެ ޖަލްސާއަށް ގަރާރު ހުށަހަޅުއްވަމުން ފަޒުލް ވިދާޅުވީ ފުލިދޫ އާދަޔާ ޚިލާފަށް ގިރަމުންދިޔުމުގެ ސަބަބުން ރަށުގެ ތިމާވެއްޓަށް ކުރިމަތިވެފައިވާ ނާޒުކު ހާލަތުގެ ސަބަބުން ފުލިދޫގެ ރައްޔިތުންނަށް ބިރުވެރިކަން ކުރިމަތިވެފައިވާ ކަމަށެވެ. އަދި ރައްޔިތުންގެ ގޯތިގެދޮރަށް ކުރިމަތިވެފައިވާ ނުރައްކަލުގެ ސަބަބުން އެފަރާތްތަކުގެ ދިރިއުޅުމަށް ކުރިމަތިވެފައިވާ ގޮންޖެހުންތައް ބޮޑުވެފައިވާ ކަމަށް ވެސް ފަޒުލް ވިދާޅުވިއެވެ.
އެގޮތުން ފުލިދޫ މިސްކިަތް ހުންނަ ސަރަހައްދު ގިރައިގެންގޮސް މިސްކިތުގެ އިމާރާތަށް ގެއްލުންވުމުގެ ފުރުސަތު ބޮޑުވެފައިވާ ކަމަށާއި ޒުވާނުން ކުޅެން އޮންނަ ބޯޅަ ދަނޑުގެ ވަށާފާރާހަމައަށް ގިރައިގެންގޮސްފައިވާ ކަމަށް ފަޒުލް ވިދާޅުވިއެވެ.
އެހެންކަމުން ފުލިދޫގެ ތިމާވެއްޓަށް ކުރިމަތިވެފައިވާ މައްސަލަ ހައްލުކޮށްދެއްވުމަށް ސަރުކާރުގެ ކަމާބެހޭ އިދާރާތަކުން އެޅުއްވެން ހުރި ހުރިހާ ފިޔަވަޅެއް އަޅުއްވާ ދެއްވާ، ފުލިދޫގެ ރައްޔިތުންނަށް ސަލާމަތްތެރިކަމާއި، ރައްކާތެރި މާޙައުލެއް ހޯއްދަވާ ދެއްވުމަށް ކުރައްވަންޖެހޭ ކަންކަން ވީހާވެސް އަވަހަށް ކޮށްދެއްވުމަށް އިލްތިމާސް ކުރުމަށްޓަކައި ރައްޔިތުންގެ މަޖިލީހުގެ ޤަވައިދުގެ 167 ވަނަ މާއްދާގެ ދަށުން ޤަރާރު ހުށައަޅުއްވާ ކަމަށް ފަޒުލް ވިދާޅުވި އެވެ.
މި ގަރާރަށް އަންގާރަ ދުވަހުގެ ޖަލްސާގައި މެމްބަރުން ބަހުސްކުރުމަށް ވަނީ ހަމަޖެހިފައެވެ.
