ވިޔަރެއާލް ބަލިކޮށް ބާސެލޯނާއިން ސްޕެނިޝް ލީގުގެ އެއްވަނައިގައި އޮތް ރެއާލް މެޑްރިޑުގެ ފަރަގު ކުޑަކޮށްފިއެވެ.

ލީގުގައި އާދީއްތަ ދުވަހުގެރޭ ރެއާލް މެޑްރިޑް ވަނީ އެތުލެޓިކް ބިލްބާއޯ 1-0 ން ބަލިކޮށް ތާވަލުގެ އެއްވަނައިގައި ހަތް ޕޮއިންޓުގެ ލީޑެއް ނަގާފައެވެ. އެކަމަކު ދަންވަރު ކުޅުނު މެޗުން ބާސާ ވަނީ 4-1 ން ވިޔަރެއާލް ބަލިކޮށް، ރެއާލްގެ ފަރަގު ހަތަރު ޕޮއިންޓަށް ކުޑަކޮށް އުންމީދު އާކޮށްފައެވެ.

ވިޔަރެއާލްގެ ދަނޑުގައި އާދީއްތަ ދުވަހުގެރޭ ކުޅުނު މެޗުގައި ބާސާގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު އެޓީމުން ވަނީ ލީޑު ނަގާފައެވެ. މި ލަނޑަކީ މެޗުގެ ތިންވަނަ މިނެޓުގައި ވިޔަރެއާލްގެ ޕައޫ ޓޮރޭސް އަތުން ބައިކޮޅަށް ވަން ލަނޑެކެވެ. އެކަމަކު މެޗުގެ 14 ވަނަ މިނެޓުގައި ޖެރާޑް މޮރޭނޯގެ ލަނޑުން ވިޔަރެއާލުން ވަނީ ނަތީޖާ އެއްވަރުކޮށްފައެވެ.

އޭގެ ފަހުން ބާސާއިން މެޗު ޑޮމިނޭޓު ކުރިއިރު، މެޗުގެ 20 ވަނަ މިނެޓުގައި ކެޕްޓަން ލިއޮނެލް މެސީ ދިން ބޯޅައަކުން ބާސާއަށް އަލުން ލީޑު ނަގައިދިނީ ފޯވާޑް ލުއިސް ސުއަރޭޒްއެވެ. އަދި ފުރަތަމަ ހާފުގެ ފަހު މިނެޓުގައި މެސީގެ އެހީއާއެކު އެންޓޮއިން ގްރީޒްމަން ވަނީ ބާސާއަށް ލީޑު ފުޅާކޮށްދީފައެވެ.

މެޗުގެ 69 ވަނަ މިނެޓުގައި މެސީ ލަނޑެއް ކާމިޔާބުކުރި ނަމަވެސް، ބޯޅަ ހޯދިއިރު އާޓޫރޯ ވިޑާލް އޮފްސައިޑުގައި ހުރުމުން، ވީޑިއޯ އެސިސްޓަންޓް ރެފުރޫ (ވީއޭއާރް) ން ވަނީ އެ ލަނޑު ބާތިލުކޮށްފައެވެ. މި މެޗުގައި ބާސާއިން ކާމިޔާބުކުރި ތިންވަނަ ލަނޑު މެޗު ނިމެން ހަތަރު މިނެޓަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އަންސޫ ފާޓީއެވެ.

މި ނަތީޖާތަކާއެކު ރެއާލް އެއްވަނައިގައި އޮތީ 34 މެޗުން 77 ޕޮއިންޓާއެކުއެވެ. ބާސާ ދެވަނައިގައި އޮތީ 34 މެޗުން 73 ޕޮއިންޓާއެކުއެވެ. ދެ ޓީމަށްވެސް ލީގުގައި ބާކީ އޮތީ ހަތަރު މެޗެވެ.