ކޮސޯވޯގެ މިނިވަންކަން ބަލައިގަތުމާއި ގުޅޭ މައްސަލަ މަޖިލީހަށް ހުށަހަޅައިފި
1 ޖުލައި 2020 | ބުދަ 06:00ފުލުހުން ބުނެފައިވަނީ އިންޓަރޕޯލް އިން މި މައްސަލަ ބަލަމުންދާ ކަމަށް
ގަރާރު ހުށަހެޅުއްވި މެމްބަރު، ނޮޅިވަރަމް ދާއިރާގެ މެންބަރު މުޙައްމަދު ނަޝީދު ޢަބްދުﷲ
ކޮސޯވޯގެ މިނިވަންކަން ބަލައިގަތުމުގައި ކޮރަޕްޝަން ހިންގާފައިވާ ކަމަށް ތުޙުމަތުކުރެވޭ މައްސަލަ އާއި ގުޅިގެން ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މި ގަރާރުގެ ފުރަތަމަ ކިއުން އިއްވާފައިވަނީ 16 ޖޫން 2020 ގައި ބޭއްވުނ މަޖިލީހުގެ ޖަލްސާގައެވެ.
ކޮސޯވޯގެ މިނިވަންކަން ބަލައިގަނެ، އެކަން ރަސްމީކޮށް އިޢުލާންކުރުމުގައި ކޮރަޕްޝަނަށް މަގުފަހިވާފަދަ ޢަމަލުތަކެއް ހިންގާފައިވާ ކަމަށް ތުޙުމަތުކުރެވޭ މައްސަލައާ ގުޅިގެން ރައްޔިތުންގެ މަޖިލީހުގެ ފަރާތުން މިކަން ހިނގައި ގޮސްފައިވާގޮތް ބަލައި ކަށަވަރުކުރުމަށްޓަކައި މަޖިލީހުގެ ތެރެއިން ކުރެވެން ހުރި މަސައްކަތްތައް ކުރުމަށްޓަކައި މި ގަރާރު ހުށަހެޅުއްވީ ބުދަ ދުވަހުގެ ޖަލްސާގައި ނޮޅިވަރަމް ދާއިރާގެ މެންބަރު މުޙައްމަދު ނަޝީދު ޢަބްދުﷲ އެވެ.
މެމްބަރު ހުށަހެޅުއްވި މި ގަރާރުގައި ވަނީ ކޮސޯވޯގެ މިނިވަންކަން ދިވެހި ރާއްޖޭގެ ފަރާތުން ޤަބޫލުކޮށްފައިވަނީ ދިވެހި ރާއްޖޭގެ އޭރުގެ ފޮރިން މިނިސްޓަރ ޑރ. އަޙްމަދު ޝަހީދު ބޭރުގެ ބައެއް ފަރާތްތަކުގެ އަތުން ރިޝްވަތު ނަގައިގެން ކަމުގެ ތުހުމަތު ކުރެވޭ ކަމަށެވެ. އެގޮތުން، 2009 ވަނަ އަހަރުގެ މާޗް މަހުގެ 5 ވަނަ ދުވަހު އޭރުގެ ރައީސުލްޖުމްހޫރިއްޔާ އެ މައްސަލަ ތަޙުޤީޤު ކޮށްދެއްވުމަށް އެދި މޯލްޑިވްސް ޕޮލިސް ސަރވިސް އަށް އަންގަވާފައިވީ ނަމަވެސް އެ މައްސަލައިގެ ތަޙުޤީޤު މުޅިން ފުރިހަމަކޮށް، ސާފު ސީދާ ނިންމުމެއް ނުވަތަ ފިޔަވަޅެއް އަޅާފައިވާކަން މިހާތަނަށް އައިއިރު ރައްޔިތުންނަށް އެނގިފައި ނުވާކަމަށް ވެސް މެމްބަރުގެ ގަރާރުގައިވެއެވެ.
މިކަމާއި ގުޅިގެން މޯލްޑިވްސް ޕޮލިސް ސަރވިސްއިން 2009 ވަނަ އަހަރުގެ މެއި މަހުގެ 09 ވަނަ ދުވަހު ނެރުނު ނޫސްބަޔާނުގައި ބަޔާންކޮށްފައިވަނީ އިންޓަރޕޯލް މެދުވެރިކޮށް އެކަން އިތުރަށް ތަޙުޤީޤު ކުރެވެމުން ދާކަމަށެވެ. އެހެންނަމަވެސް އޭގެ ފަހުން މިއަދާއި ހަމައަށް 10 އަހަރު ފާއިތުވެފައިވާއިރު ވެސް މޯލްޑިވްސް ޕޮލިސް ސަރވިސްގެ ފަރާތުން ރަސްމީ ސިފައެއްގައި އެ މުއައްސަސާ ހިންގުމާއި ގުޅޭ ޤަވާޢިދުތަކުގެ ތެރެއިން މި ތަޙުޤީޤާއި ގުޅިގެން ޢަމަލުކޮށްފައިނުވާކަމަށެވެ.
މެމްބަރު ނަޝީދު ވިދާޅުވެފައި ވަނީ މި މައްސަލައިގެ ޙަޤީޤަތްތައް މަޖިލީހަށާއި އަދި ދިވެހި ރައްޔިތުންނަށް އޮޅުން ނުފިލައި އޮތް މައްސަލައަކަށްވެފައި މި މައްސަލައާއި ގުޅިގެން ތަޙުޤީޤީ އިދާރާތަކުން އެކަށީގެންވާގޮތެއްގައި ޢަމަލުކޮށްފައި ނުވާކަން ފާހަގަ ކުރެވޭ ކަމަށެވެ. އަދި އެ މުޢައްސަސާގެ އިޖުރާޢަތްތަކުގެ ތެރެއިން މިކަން ތަޙުޤީޤުކޮށް ނިންމި ކަމުގައިވިޔަސް އެކަމުގައި ޝާމިލުވާ ފަރާތްތަކާއިމެދު ޖިނާއީ ދަޢުވާއެއް އުފުލަންޖެހޭ މުއްދަތު މިހާރު ފަހަނަޅައިގޮސްފައިވާ ކަމަށާއި އެމައްސަލައިގެ ތަހުގީގު އެ ސަރވިސްގެ ތެރެއިން ގެންދިޔުމުގެ ބޭނުން ވެސް މިހާރު ކެނޑިފައިވާކަމަށް ބެލެވޭ ކަމަށެވެ.
އެހެންކަމުން މި މައްސަލަ އާއި ގުޅިގެން މިހާރު ކުރެވެންއޮތް މަސައްކަތްތަކަކީ ހަމައެކަނި މަޖިލީހުގެ ތެރެއިން މި މައްސަލަ ހިނގައި ގޮސްފައިވާގޮތް ބަލައި އެކަމާއި ގުޅިގެން ނިހާއީ ޖަވާބެއް ރައްޔިތުންނަށް ފޯރުކޮށްދިނުން ކަމުގައި ދެކޭ ކަމަށް ވެސް ގަރާރުގައި ވެއެވެ. އަދި މިފަދަ ނޭދެވޭ ޢަމަލުތަކާއިމެދު އިތުރަށް ފާރަވެރިވެވިދާނޭ ގޮތްތައް ބަލައި އެފަދަ ކަންކަންއެކަން ހުއްޓުވުމުގެ ގޮތުން އެޅެންހުރި ފިޔަވަޅުތައް ވަގުތުން ވަގުތަށް އެޅުމަކީ މުހިންމު ކަމެއްކަމަށާއި ކޮސޯވޯގެ މިނިވަންކަން ދިވެހިރާއްޖެއިން ބަލައި ގަތުމާއިމެދު މި ސަރުކާރުން، ބައިނަލް އަޤްވާމީ އެންމެހައި ޤާނޫނުތަކާއި އުސޫލުތަކަށް ރިޢާޔަތް ކޮށް މިނިވަން ދައުލަތެއްގެ ގޮތުގައި ބަލައިގަނެފައި އޮންނަ އޮތުން އަލުން މުރާޖަޢާކުރުމަކީ މުހިންމު ކަމެއް ކަމުގައި ދެކިވަޑައިގަންނަވާ ކަމަށެވެ.
