މެގުއާގެ ލަނޑުން ޔުނައިޓެޑް ސެމީއަށް

އިތުރު ވަގުތުގައި ހެރީ މެގުއާ ޖެހި ލަނޑުން ނޯވިޗް ސިޓީ ބަލިކޮށް މެންޗެސްޓާ ޔުނައިޓެޑް އިނގިރޭސި އެފްއޭ ކަޕްގެ ސެމީ ފައިނަލަށް ދަތުރުކޮށްފިއެވެ.

އެފްއެ ކަޕްގެ ކުއާޓާ ފައިނަލް މެޗުން ހޮނިހިރު ދުވަހުގެރޭ ޔުނައިޓެޑް މޮޅުވީ 2-1 ގެ ނަތީޖާއަކުންނެވެ.

ނޯވިޗްގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގެ ކުރީކޮޅު ޔުނައިޓެޑުން ވަނީ ލީޑު ނަގާފައެވެ. ދެވަނަ ހާފު ފަށައިގެން ހަވަނަ މިނެޓުގައި ޔުނައިޓެޑަށް ލީޑު ނަގައިދިނީ ފޯވާޑް އޮޑިއޯން އިގާލޯއެވެ. އެކަމަކު މެޗުގެ 75 ވަނަ މިނެޓުގައި ޓޮޑް ކާންޓްވެލް ވަނީ ނޯވިޗަށް ނަތީޖާ އެއްވަރުކޮށްދީފައެވެ.

މެޗުގެ ފުރިހަމަ ވަގުތު ހަމަވާން ދަނިކޮށް ނޯވިޗަށް އިތުރު ގޮންޖެހުންތަކާ ކުރިމަތިލާން ޖެހުނީ މެޗުގެ 89 ވަނަ މިނެޓުގައި އެ ޓީމުގެ ޑިފެންޑަރު ޓިމް ކްލޯސާއަށް ސީދާ ރަތް ކާޑު ދެއްކުމުންނެވެ.

ރީޕްލޭ މެޗު މަދުކުރުމުގެ ގޮތުން އިނގިރޭސި އެފްއޭއިން ވަނީ އެފްއޭ ކަޕްގެ ނަތީޖާ އެއްވަރުވާ މެޗުތަކުގައި އިތުރު ވަގުތު ކުޅުމަށް ނިންމާފައެވެ. އެގޮތުން މި މެޗުގެ 90 މިނެޓު ހަމަވިއިރު ދެ ޓީމު އެއްވަރުވެފައި އޮތުމުން، ކުޅުނު އިތުރު ވަގުތުގެ ދެވަނަ ހާފުގައި ޔުނައިޓެޑުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކެޕްޓަން ހެރީ މެގުއާއެވެ.

ނޯވިޗް ބަލިކޮށް އެފްއޭ ކަޕްގެ ސެމީއަށް ޔުނައިޓެޑް ދަތުރުކުރިއިރު، މިއީ މި މުބާރާތުގެ ސެމީގައި ޔުނައިޓެޑް ކުޅޭނެ 30 ވަނަ ފަހަރެވެ. އެ ޓީމަކީ އެންމެ ގިނައިން މި މުބާރާތުގެ ސެމީ ފައިނަލަށް ދަތުރުކުރި ޓީމެވެ. ސެމީ ފައިނަލުގައި ޔުނައިޓެޑް ކުޅެން ޖެހޭ ޓީމެއް އެނގޭނީ އާދީއްތަ ދުވަހު ބާއްވާ ގުރުއަތުލުމަށްފަހުއެވެ.